بسم الله الرحمن الرحيم
حبيت اعمل دليل لقطع غيار فيات القديمه (بولونيز .132.131.125.128)
بس للاسف الوحيده اللي هقدر اتكلم عنها هي 132 لاني امتلكها وسايب بقيه العربيات على باقي الاعضاء اللي بيمتلكوها
وده لان العربيات دي بتشترك في بعض قطع الغيار وعشان نحدد للمشتري المكان اللي هيشتري منه على طول وميدوخش
ودي قطع الغيار اللي غيرتها في عربيتي واسعارها والاعراض اللي خلتني اغيرها واماكن شرائها وياريت الاداره متعتبرش اماكن الشراء ده اعلان لان القصد هو اني اسهل على الناس
وياريت الناس تتفاعل مع الموضوع واللي غير حاجه في عربيتو يساعد الناس و يبينلها السعر واماكن الشراء
1-اول حاجه الكربراتير وده كان مشكلتو انو بيهبب البوجيهات وبيخلي العربيه تقطع غير الدخنه السوده اللي من الشكمان
روحت الاول صلحتو واتكلف 60 جنيه و باظ بعديها بشهرين و رحت غيرتو بواحد استيراد من عزبه شلبي ب450 تقريبا
وده شكلو
2-تاني حاجه الدينامو وده غيرتو عشان البطاريه كانت بتنام على طول غيرتو بواحد تاني من عند واحد في عابدين مش فاكر اسمو بصراحه بس هوو مشهور جدا هناك ب150 جنيه وده شكلو
3-غيرت مارش برضو من عند نفس الراجل وتمنو برضو 150 وده لانو كان بيعتل جامد في الدواره لغايه اما لقيتو اتحرق مره واحده
4-بعد كده غيرت رمان بلي للعجلتين الخلفيتين لاني كنت بسمع صوت ونه طول ما انا ماشي ودول كان سعرهم 25 جنيه للواحده (ايطالي) الله اعلم بأه ايطالي ولا مضروبين
وغيرت معاهم اويل سيل للعجلتين عشان كان في تنشيع زيت من الكرونه على التيل والعجل
5-غيرت صلايب عمود كردان سعر الواحده تقريبا 25 هما كانو اتنين
غيرت فلانشه عمود كردان في منها نوعين التركي 50 ودي جبتها واتقطعت مستحملتش وجبت بعديها واحده تانيه ايطالي ب60 ودي ما شاء الله تمام بس ديمش لاقيلها صور للاسف بس هيا كاوتشه مدوره مفتوحه من النص ومتخرمه من الاجناب بشكل سداسي
اللي خلاني اغير الصلايب و الفلانشه ان العربيه على الاول والتاني كانت بترج جامد والحمد لله اتظبطت
بس مش شرط ان الرجه تكون بسبب الصلايب لا ممكنن يكون المسامير اللي رابطه بين عمود الكردان والكرونه مش مربوطه كويس دي برضو تسبب الرجه
6-تم تغيير مشط وابلاتين للاسبراتير كنت جايبهم جداد من سنه بحوالي 300 جنيه تقريبا وسبب التغيير ان لاقيت العربيه قاطعه كهربا ومش عاوزه تدور ورحت اشتريتهم من شارع مجلس الامه وده شكل المشط
7-غيرت قربه مياه ودي جبتها ب 25 من عزبه شلبي وممكن تلاقيها عند بتوع قطع الغيار موجوده ودي غيرتها لانها كانت مخرومه
8-غيرتفوانيس العربيه الاماميين وجبت اربع فوانيس جداد نوعهم تركي سعر الفانوس الواحد 18 جنيه بس للاسف طلعو اي كلام والعاكس لونه بقا مطفي فنصيحه للي عايز يشتري فوانيش ينزل يجيبها استيراد من الوكاله او عزبه شلبي ملحوظه الفوانيس الاصليه لمبتها شكلها كده
وده شكل الفانوس
اما التقليد بتكون اللمبه h4
8- كنت عايز اغير الجنوط بتاعه العربيه بجنوطها الاصليه(المروحه)لان عندي البارومه كلت الجنط من عند البلوف سعر الجنط الاستيراد بيتراوح من 50 الى130 حسب حاله الجنط
9-سألت برضو على علبه البور لانها بايظه عندي وعايز اغيرها كنت في شارع شمبليون وبتوع علب البور كانو عايزين يركبولي بتاعه الشيروكي عندي نصيحه محدش يعمل كده لان عمرها ما هتتظبط على العربيه عايز تركب ركب الاصليه تقريبا في حدود 400 جنيه
10-غيرت اربع طنابير سعر الطنبوره 70 جنيه جداد من التوفيقيه من محل اسمو الفتح وجبت تيل خلفي بتاع فيات وكان مكتوب عليه لانشيا والبياع قالي انو اصلي سعره 150 جنيه طبعا في ناس هتقول انو غالي بس بصراحه مفيش صوت تصفير وانا ماشي تماما والله اعلم سعره تمام ولا لأ وغيرت تيل امامي تركي ب35 جنيه
بمناسبه الفرامل غيرت مساتر خلفيه ايطالي الواحد ب25 وده شكلها
وغيرت مستر الفرامل الرئيسي بواحد ايطالي سعره 70 جنيه
وغيرت الدوشم الاماميه وجبت اتنين جداد سعر الواحد بعد الفصال وكل الحاجات الحلوه 130 جنيه بس دول دخت عليهم على ما لقيتهم جداد عند محل في عابدين اسمه ربيع وده عنوانه 10 ش محمد مجدي ارض شريف الراجل ده شغال في حاجه فيات القديمه وبيبعها جديدهوده شكل الدوشم
ودول غيرتهم لان كذا مره اغيرلهم الجلد بتاع المساتر(اللي مشاور عليه بالسهم في الصوره) وبرضو الاقيها بتهرب زيت
11-غيرت سلك دبرياج كذا مره وكنت كل مره بجيبيو ايطالي ويبوظ لحاد ما جبت واحد مصري ماشاء الله عليه شغال تمام وده اللي انا مسغربلو وسعره 35 للاطالي و25 جنيه للمصري ودي السلوك اللي اتقطعت
وديما كانت تتقطم من المكان اللي عليه السهم
12-في ال132 ال2000 سي سي الشنطه بتترفع بمساعدين غيرتهم الجوز ب 60جنيه ونوعهم تركي
13-في بقى فتحه بتبقى في الطابلوه بتاع ال132 ناحيه اليمين هيا وش بلاستيك كده ودي لاقيتها بالصدفه في التوفيقيه في مول هناك كده مش فاكر اسمه وجبتها من الراجل ب 5 جنيه
14-قاعده السيرفو ودي فيها عيب موجود في اغلب ال132 ان في جزء بيتكسر المهم غيرتها من الوكاله ب 60 جنيه بعد فصال مستميت والجزء اللي بيتكسر انا مشاور عليه بالسهم
وعالجتو باني حطيت تحتيه حتت الحديده دي ولحمتها
وبعدين قولت برضو اجيب واحده جديده اضمن
15- اخر مره غيرت سير البور كان سعره غالي كان ب 40 جنيه مش عارف ايه السبب وهل السيور كلها غليت كده
16-البوجيهات بجيب طقم ال ان جي كا ب30 جنيه ودلوقتي بيتباع ب 35 على ما اظن اهم حاجه انك تظبط الجاب بتاعه البوجيه على 0.7 في الكهرباء الالكتروني بتاعه ال132
17-بك سلانسيه كهرباء من التوفيقيه ب 50 جنيه تقريبا وده شكله
ومنركبش اي نوعيه تانيه غير دي لان اي بك تاني مش هيظبط العربيه مره جبت بتاع الشاهين والبياع قالي ده تمام وهوه بتاعها وغشني فيه يالله الله يسامحه والعربيه كانت بايظه تماما وكنت فاكر ان العيب من الكربراتير لحد مغيرت البيك ببتاع العربيه وبعدين الدنيا ظبتت
18- غيرت ساعه بتاعه عداد الزيت جبتها ب 50 مش عارف غاليه ولا لا بس المهم اني غيرتها ودي وظيفتها زي سينسور للعداد بتاع الزيت اللي موجود في الطابلوه وجبتها من عند ابو عصام اللي في شارع مجلس الامه
19-علبه شكمان خلفيه طبعا دي عند اي حد بتاع شكمانات وجبتها ب 50 جنيه
طبعا في بعض الاسعار ممكن تكون عاليه و ممكن يكون اتضحك عليه وممكن اكون خدت الحاجه بسعرها
المهم ده متوسط الاسعار
يارب اكون قدرت افيد الناس
واللي عندو اي استفسار تحت امره
المفضلات