لكل اصحاب الانسر كريستالة بتستخدم بنزين ايه؟

بسم الله الرحمن الرحيم

انا عملت الموضوع ده علشان كلنا نستفيد

انا على حسب علمى ان كل الكريستالة كربيتير وموديل 2000 تقريبا انجيكشن بس بصراحة مش متاكد من الموضوع ده...
يترى بقى بما ان الكريستالة كربيتير عادى استخدم بنزين 80 عادى وانا مطمن ويترى كل واحد يقول تجربته

وتقريبا معدل استهلاك العربية كم ...

ولو فيه حد عامله غاز ياريت يقول تجربته....


انا عن نفسى كنت بحط 90 وغيرت لل 80 لانى ال 90 غالى وكمان بيتحرق بسرعة دى تجربتى الشخصية

بس حسيت ان العربية سحب بقى شبه ميت وان فرق كبير فى السحب ومتعة السواقة بين ال 80 وال 90 ....

بنزين 95 للأسف.

اقتباس:

---

المشاركة الأصلية كتبت بواسطة 1.8tee

بنزين 95 للأسف.

---

ايه الاحباط ده يمان

هو فيه بنزين 95 فى مصر؟

بنزين 90

عربيتى موديل 2000 و كربايتير
بحط 92 وساعات 90
مره واحده جطيت 80+ أوكتين ....كرهنى فى العربيه

اقتباس:

---

المشاركة الأصلية كتبت بواسطة 1.8tee

بنزين 95 للأسف.

---

اقتباس:

---

المشاركة الأصلية كتبت بواسطة prosecutor

ايه الاحباط ده يمان

هو فيه بنزين 95 فى مصر؟

---

زمان العربيه خاربه بيتك اولا هيطير بسرعه جدا زى السبرتو وسعره غالى جدا ومش موجود فى اى بنزينه يعنى خساره من كله وعطله كمان

فيه بنزين ايوه 95 لكن مش فى كل البنزينات فى البنزينات الكبيره والمحترمه بس

80 و بتعمل 250 فى الطوالى و جوه البلد وبره 200

انا كربراتير و موديل 98 خليجى كنت بحط 90 بس دلوقتى بقيت بحط 92 الفرق مش مستاهل 2 جنيه فى الصفيحه
يعنى صفيحه ال90 بـ35 و صفيحة الـ92 بـ37
على ايه خلينا فى النظيف شويه
و بعدين كتالوج العربيه بيوصى باستخدام بنزين 91

اقتباس:

---

المشاركة الأصلية كتبت بواسطة sasa3

انا كربراتير و موديل 98 خليجى كنت بحط 90 بس دلوقتى بقيت بحط 92 الفرق مش مستاهل 2 جنيه فى الصفيحه
يعنى صفيحه ال90 بـ35 و صفيحة الـ92 بـ37
على ايه خلينا فى النظيف شويه
و بعدين كتالوج العربيه بيوصى باستخدام بنزين 91

---

ازاى الصفيحة ب 35 هى الصفيحة كم لتر ؟؟؟

وياريت سعر التر البنزين ال 92

سعر اللتر الــ 90 بحوالى 1.75 جنيه يعنى الصفيحة 35 جنيه
سعر اللتر الــ 92 بحوالى 1.85 جنيه يعنى الصفيحة 37 جنيه
سعر اللتر الــ 95 بحوالى 2.75 جنيه يعنى الصفيحة 55 جنيه
وأى خدمة يا باشا

وعلى فكرة بحط بنزين 92
وساعات قليلة بحط 95 علشان انضف المكنة

اقتباس:

---

المشاركة الأصلية كتبت بواسطة prosecutor

ازاى الصفيحة ب 35 هى الصفيحة كم لتر ؟؟؟

---

الصفيحة
20 لتر

انا بحط بنزين 80
والعربية بتستهلك 200 كيلو فى الصفيحة معظهم خارج البلد
مش عارف انا حاسس ان الاستهلاك ده عالى

عالي طبعا خارج البلد
اظبط تاكيهات ونضف الكربراتير وجرب بنزين 92
حتلاقي الاستهلاك ظبط معاك

انا جربت ال3 انواع 80-90-92
وافضلهم 92 في صوت العربيه والموتور والاستهلاك

انا بقى جربت 90 و92 مش لاقى فرق واضح غير ال10 قروش الزيادة بس انا كان معايا فيات 128 كنت بحط 92 والميكانيكى قاللى حرام كان فعلا بيحرق بسرعة انا كنت بحطه لانه فرقه مش كبير بين ال90 وال92

لانسر 97 كاربيرتير بحط 90 من سنه 97 و لو مفيش بحط 92 و مابحطش 80 الا فى الشديد الاوى. اعتقد ان الكتالوج بتعاها كان كاتب 91 اوكتان بس فى ناس كتير اعرفهم كانو بيحطوا 80 و الماكينه باظت منهم و ربنا يبارك لنا جميعا

اقتباس:

---

المشاركة الأصلية كتبت بواسطة funnymickey

عالي طبعا خارج البلد
اظبط تاكيهات ونضف الكربراتير وجرب بنزين 92
حتلاقي الاستهلاك ظبط معاك

انا جربت ال3 انواع 80-90-92
وافضلهم 92 في صوت العربيه والموتور والاستهلاك

---

جرب 95 وحس بصوتالعربية والموتور
وإدعيلى على الصوت والإحساس
بس متدعيش عليا وانت بتحاسب بعد ما تفول وحياة أبوك
هههههههههههههههههه

عن تجربة اضبط الكهربا و حط 80 والأهم ضبط الكهربا و كل فترة رشه فى الكربيراتير بالمنظف و كل ذى الفل باذن الله

معايا لانسر 98 كريستالة و بالمناسبة بمون 80 و كنت شاريها و صاحبها كان بيمون برده 80 و قبل الكريستالة كان معايا دايو لانوس كنت بمونها 92 طبعا الــ 92 أنظف بس أغلى الضعف وربنا يستر

طبعا ........ شتان الفرق بين 80 و90 .......... بس انا بفول 92 دائما جربت 80 العربية سحبها ضعف جدا وتبطل وحاجات غريبة ولاما حطيط 92 الفرق واضح جدا .... بس فى ناس قالتلى ان 92 حامى على الماكنة شوية .. حط 90 بس بقول مش فارقة والعربية ماشية تمام ... بس فى ناس بضبط بنزين وهواء وكهرباء على 80 بيقولوا بيخليها فلة شمعة منورة ..... بس اقولكوا حاجة بالنسبة للى بيقول استهلاك العربية عالية اضبط نفسك الاول واضبط رجلك لو بتكبس بنزين هتشد بنزين بغباء .....فوق 100 كدة انت بتصب بنزين ...... هية بتفرق معايا فى التفويلة مرات بتعمل معايا 500 وساعات 400 وساعات 300 وساعات 200 وفكة فلى الحجدود دى حسب انت ماشى جوة البلد فى زفة ولا فى مشوار والدنيا زحمة والجو حر مشغل التكيف التكيف لما بيشتغل بتاكل جامد ... وياريت نساعد بعض دايما كدة ولى عندة اى مشكلة يكتب موضوع للكرستاولية بس وسأل مجرب احسن ما تسأل الاسطى رجب

انا لانسر 2000 كاربرتير وبحط 92 من ساعة ما جبتها لان كان سحبها قليل علي ال بنزين 90
ويا ريت حد يقولنا جوة البلد الصفيحة تعمل كام كم في بنزين 92

السلام عليكم

انا معايا لانسر كريستاله 99 انا اول مالك ليها و مريت بكل حاجة مع العربية لاني عامل 400 الف كيلو

بالنسبة للبنزين

اول 150 الف كيلو كنت بستعمل بنزين 90 و كان دايما في باك فير " رجه عند تبطيل العربية" علي الرغم من اني كنت بظبط العربية في التوكيل الرجه دي ماكانتشي دايما

البنزين غلي فقولت ال 90 قريب من ال 92 فقولت احد 92 انضف فعلا فيه فرق و الباك فير راح تماما و السحب بقي جميل جدا جدا مع التكييف او بدونه

البنزين غلي تاني و برضة فضلت احط 92 لحد ما زهقت من مصاريف البنزين من و قررت قرار من شهر اني هحط 80 و زي ما يحصل بقي لاني بتحرك بالعربية كتير جدا لانها عربية المشاوير

نتيجة تجربة ال بنزين ال 80 :

اول مرة حطيته كنت خايف جدا بس لقيت العربية ماشية و فيه تسقيف مع الدوسة القوية رحت للميكانيكي ظبطت كهرباء علي ال 80 " مرضيش ياخد فلوس لانه بيلف الاسبراتير لفه بسيطه و بيربط المسمارين تاني" بعد ظبط الكهرباء جربت العربية لقيتها كويسة جدا منغير التكييف و الفرق في حدود 10%

مع التكييف العربية بتتقل شوية بس واحدة واحدة بتتعود بس فيه تسقيف خفيف

علي الطريق : منغير تكييف العربية كويسة بس مش ممتازة و سحبها كويس بس علي المطالع بتتأثر شوية

مع التكييف : علي الطرق المعتدلة العربية معقولة و علي المطالع بتحتاج تحرق شوية عليها

صوت الموتور بقي اعلي شوية برضة حوالي 10%

الحاجة الغريبة بقي : انا فولت العربية 80 من بنزينة وطنية اللي علي الطريق الزراعي عند قويسنا و لقيت فرق رهيب جدا في البنزين ال 80 بتاع الجيش عن البنزين ال 80 بتاع البنزينات اللي بره و مش عارف السبب !!!

الخلاصة : التوفير مع 80 معناه انك بتفقد 10% من الاداء في المقابل بتوفر جامد جدا جدا جدا

البنزين ال 92 فعلا نضيف و بيفرق و بيخلي العربية تجري و تبقي فايقة بس بيدبح في الفلوس

اتمني اكون اضفت ليكم

عن تجربه الفرق بين ال 90 وال 92 مش مجرد 10 قروش و 2 جنيه فى الصفيحه كان زمانى استمريت عليه

انا استخدمت وفضلت ال 90 عن 92 علشان الاستهلاك فعلا البنزين 92 بيطير بسرعه جدا عن ال 90
ومحستش باى فرق اطلاقا ولا حتى 1% فى اداء العربيه بين ال 90 و 92 لذلك قررت انى امشى على ال 90 علطول علشان اوفر بنزين وميستهلكش بسرعه