الموضوع: ماستر الدبرياج و اشتغالات

بسم الله الرحمن الرحيم

ممكن تعزرونى لان دى اول مرة اعمل موضوع فى المنتدى
بس انا حاسس ان الموضوع مهم لملاك اللانسر وكمان عربيات تانية فيها نفس المشكلة فقلت لازم كل الناس تستفاد منه
الموضوع هو ماستر الدبرياج واشتغالات
انا معايا عربية لانسر كرستالة 98 مانيوال اشتريتها مستعملة من سنتين وماشية معايا تمام ومافيش اى مشكلة
ركنت العربية وروحت تانى يوم دورت العربية بس لو راجل حرك الفتيس
الدبرياج بيدوس معايا عادى بس الفتيس ميتحركش من مكانه كانه واخد فياجرا
مكترش عليكم بطلت الماتور ( خد بالك من دى علشان هتحتجها تانى كتير بدل ما تقف مبلول) وحطيت الاول وطلعت على الميكانيكى
الراجل كشف وقالى ماستر الدبرياج العلوى ضارب زيت وفعلا انا اتاكدت من كده
طيب ايه الحل
الميكانيكى :
اطلع على المنيرى ( انا ساكن فى فيصل) اشترى طقم اصلاح ماستر علوى وبس

روحت جارى على المنيرى وخدت دورى فى الطابور تقلش بيبع ببلاش وطبعا الكلمة على القد كانه دكتور ومافيش فصال ( والله بفاصل فى التوكيل وبيدونى خصم) والبركة فى الناس اللى بتخلى المحلات تركبهم .
المهم ماطولش عليكم عاوز طقم اصلاح ماستر علوى يا باشا
المنيرى :
مافيش طقم اصلاح الماستر على بعضه يابانى .

تليفون للميكانيكى الرد اشترى
بكام ياعم احمد يا بتاع المنيرى 165ياباشا
اتفضل الفلوس اتفضل الماستر ( اوعى تنسى تاخد الفاتورة زي مانا عملت ) بس والله وبجد هو كان متردد يدينى الفاتورة حط القلم على الفاتورة وبعدين عمل عبيط مع زبون تانى وانا كنت مستعجل ومشيت ماهو المنيرى بقى يعنى الحته اصلى

الميكانيكى فتح لقيته اخو الماستر اللى فى العربية بالملى ركبه وعلبة زيت باكم تركى مستوردة
كارك سيب كارك سيب (بناخد هواء من الماستر) لما رجلى ورمت الدربياج بقى ناشف وتمام مبروك ياباشا 20جم
3ايام بالعدد ويوم السبت الساعة 12الظهر واخد العيال ومراتى وكنت فى مشوار وماشى على الدائرى وهوب دوس دبرياج البدال فى الدواسة يانهار ابيض
اعمل ايه كلمت الميكانيكى

الميكانيكى
بص على الزيت بتاع الماستر
مليان يامعلم
الماستر باظ تانى
طيب والعمل
يرجع للمنيرى
مافيش فاتورة سلام

طيب مين يخرجنى من الدائرى قلت انا مليش حل غير معروف فى وسط البلد اشترى ماستر او اصلحه الصنايعية هناك على قفا مين يشيل المهم بطل وحط التانى واطلع وفضلت امشى على التانى لحد ما نزلت على وسط البلد وطبعا ماشى بتزل لو حد هدى ولو وقف قدامى
متخافوش ياولاد هنخرج بس نغير الماستر فى 5دقائق على بال ما تكلو كشرى عند ابو طارق

دخلت معروف وركنت
روحت لواحد حبيبى اسمه ابو زيزو بتاع يابانى ودكتور برضه
خدت معايا الماستر القديم وقلتله عاوز زى ده او طقم اصلاح بتاعه

ابو زيزو :
عندى الاتنين
يافرج الله
بكام ده وبكام ده
30جم طقم الاصلاح 60جم الماستر (فى سرى المنيرى الحرامى استغلنى )
طيب ممكن تدينى طقم الاصلاح وتقولى مين يعمله
لا الاول تروح لورشة احمد امام ابو طارق يفكه وتجيبلى الحشو علشان نعرف المقاس واديك زيه

جرى على الورشه لاقيت الاسطة احمد كيمو ( اخر الاسطوات المحترمين) ماجد الكدوانى بالظبط

انا من طرف ابو زيزو ممكن تفك الماستر ده علشان اجيب طقم الاصلاح بتاعه وتركبه
كيمو :
حاضر على المنجله ومفك وفكه

بص بقى يامعلم الماتسر فكرته كلها انه مكبس وجواه سوسته وصباع راكب حواليه جلدتين

ادانى الحشو وقالى على فكرة الماستر مافيهوش ريجه ويعنى كده مش بايظ هو الجلد اللى وحش وعاوز يتغير

طبعا وماخدتش واديت وروحت جرى على ابو زيزو طلع البوكوليس وقاس وبعدين فتح وطلع علبة صغيرة ابيض فى احمر مكتوب عليها باليابانى ومكتوب صنع اليابان بالانجليزى وخرج كيس فيه حشو كامل للماستر (سوسته وحشو وكلبسات بلاستيك) اتفضل 30جم

الحشو ياعم احمد ركب وعمل تيست تمام اتفضل كام اى حاجة فوق العشرة ( الكدوانى بقى) ممكن تيجى تركبه فى العربية
معلش ورايا شغل ممكن اى حد يركبه

جبت ميكانيكى حل بتاع المينرى وركب يا معلم جرب الماستر مش عاوز ياخد هواء
حضر كنسولتو قالو الماستر بايظ وعلشان كده الاسطى مارضيش يركبه
طيب دور على الاولنى واطلع الورشة ياعم كيمو بص على شغلك

كيمو :
جرب لا حل فك الماستر بص يا استاذ الحشو الجلد بتاعه وحش بيروح ومابيردش فى الماستر
العمل ياعم كيمو علشان عاوز اخلص
يا استاذ كل قطع الغيار مضروبة ودى مش اول مرة
روحنا سوا على زيزو عمل فيها برنس بس كيمو ظبطه وفكره بنفس العملة فى عربية كورى ( حاكم العيب ده متكرر فى ( الكيا - والالنترا - والكورلا)

زيزو :
كل طقم الاصلاح واحد خد ماستر جديد وهات 30جم وهرجع لك الطقم الى اتفتح
ماشى
ماستر صينى جدا مش زى بتاع المنيرى بس هيعيش معاك

جرى على كيمو ركب
كارك سيب كارك سيب تمام ونشف وميه ميه
دور الماتور انقل ..... انسى باظ وانا واقف

كنت هعيط العمل يا عم كيمو فك

كيمو :
بص يااستاذ انت تاخد الماستر القديم وتروح لحد شارع زكى تلاقى محل اسمه زكى سليمان بتوع كاوتش ماساتر اديله الماستر هيظبطه وانت واقف

ماشى العيال فى العربية على ما ارجع والواد ابنى بقى ميكانيكى فى شارع شامبليون
جرى على شارع زكى ماهو الساعة بقت 6.30
طلعت لاقيت شاب زى الفل قاعد لوحده شاف الماستر فى ايدى ضحك

ريمون (على ما اظن) :
بقالك كتير
من الصبح
بص يا استاذ القصه كلها بتتلخص فى الاتى
الماتسر لو مافيهوش ريجه يبقى طقم الاصلاح
وعلشان مافيش قطع غيار سليمة يبقى الحل انك تغير كاوتشتين الحشو
بكام
30جم قفل وجرب كله تمام
طيب ايه لزوم الشقلطه اللى انا فيها من الصبح
محدش بيتعلم بالساهل يا استاذ
طيب ممكن سؤال هو ليه الكاوتش ده بينشف رغم انه غرقان فى الزيت 24ساعة
حلو السؤال لان الزيت مضروب يا معلم
هه ازاى ده زيت باكم بيتحط فى الفرامل
مافيش غير نوع واحد سليم انجليزى علبته صاج ومبترشم بصاجه من فوق اسمه لوكهيد وب30جم
هات علبه شكرا

جرى على عم كيمو ركب جرب مش مصدق الماستر بقى زيرو يخرب عقلك ياعم كيمو

كيمو :
ابقى فوت عليا اى يوم تانى نكشف على ماستر تحت برضه

جرى على عم زيزو يا هندسه الماستر طلع زبالة طبعا حورات واكنه عيل من عياله كلته عربية المهم انا مش عاوز فلوس هات اى حاجه ليها لازمة
خدت فلتر زيت و 4بوجيهات ودفعت 5جم
روحت على البيت جرى

كده خلص الجزء الاول

الخلاصة
كل قطع الغيار (اللى مش اصليه) فى السوق مضروبة مهما كان المحل
اكتر حاجه مضروبة اليابانى والسبب ان التوكيل بقاله فترة طويلة مش معا حد وكمان المصرية الشركاء متخنقين ومافيش استيراد
ولان اكتر عربيات فى السوق يابانى يعنى الشغل موجود ده شجع التجار انهم يستوردو من الصين وكمان مجدد زى اللى المنيرى باعه ليا
بس الكورى غبور مغرق السوق علشان محدش يعمل فيه الحركة بتاعة الاستيراد والعربيات تتفضح وسوقه يبوظ

يعنى حضرتك لاتثق الا فى
1 - ربنا
2 - التوكيل
وحاول تصلح الحته البايظ احسن ما تشترى الجديد من بره التوكيل لان الحته اليابانى معمولة تتصلح مش تترمى ( طبعا مش فى كل حاجة فى العربية )

بالمناسبة اسعار الوكيل
ماستر علوى 740جم بدون ضريبة
طقم اصلاح ماستر علوى 250جم بدون ضريبة

ومش موجودين والله معندهمش

علشان متفرحش انك بتخدها من المنيرى او ابو زيزو ولا السرساوى بتراب الفلوس
يعنى لازم تبقى مضروبة امال الفرق راح فين

الجزء التانى
ياترى الماستر تمام ؟
قالو ايه رماك على التوكيل
قالو ايه وداك للوكلاء

مستنى ردكم

اولا الف حمد الله على السلامة للعربية
ثانيا انا عاوز اهنيك علشان الموضوع ده لان الواحد لما بيتبهدل فى حاجة زى كده ما بيبقاش عاوز يفتكر اليوم ده خالص واهنيك على اسلوب سردك لللموضوع علشان الكل يستفاد
ويارب يكون دلوقتى كله تمام ابقى قولنا ايه الاخبار