عملت حادثة وطلعت بالعربية فوق الرصيف ! !
السلام عليكم ورحمة الله وبركاته
اول امبارح مع الاسف اتفاجاة بعربية حدفت عليا مش عارف جت منين حاولت اتفادى كسرت يمين
الطريق كان كله تراب مع الاسف فالعربية زحفت طبعا الكسرة الجامدة مع الفرملة ادت الى ان العربية عملت اكنها بتامرك والتراب طبعا قام بالواجب وزيادة
العربية انحرفت من على الطريق وطلعت على الرصيف اليمين الحمد لله كان بيني وبين عمود النور اقل من مترين بس ربنا ستر
العربية طلعت بالجمب يعني اللى اقصده ان اول عجلة طلعة هي العجلة الشمال لان العربية مع الكسرة اليمين والزحف فطلعت بشكل جانبي ماطلعتش بوشها
العجلة الشمال طلعت الاول والرصيف كان عالي فسمعت صوت خبط فظيع من تحت وشفت الطاسات بتطير قدامي
انا اترعبت بصراحة من الصوت وطبعا كل ده حصل فثواني نزلت من العربية قلت هلاقي الاكصدام في الارض والكبود راح ويمكن الاقي العربية من تحت اتفشفشت
الحمد لله نزلت بصيت كل حاجة سليمة قلت الحمد لله بصيت على العربية من تحت مالاحظتش اي كسور
ركبت الطاسات وطلعت دورت ونزلت من على الرصيف براحة وقلت الحمد لله انها جت على كدة ومحصلش حاجة
بس اللى لاحظته بعد كدة ان الدركسيون بقى خفيف جدا جدا في ايدي خفيف لابعد الحدود
لدرجة اني حاسس انه يكاد يكون مش متوصل بالعجل ! وبان اكتر معايا على السرعات العالية بقيت احس ان فيه اهتزازة بسيطة كدة في الدركسيون
فحد عند خلفية ده ممكن يكون من ايه ؟ هل مثلا العفشة اتأثرت بالخبطة او المساعدين ؟
والف شكر ليكم مقدما ونصيحتي لاي حد يمشي في شارع فيه تراب يمشي على مهله لان التراب بيزحف العربية
لا abs بينفع ولا اي حاجة من الكلام ده
وربنا يسترها معانا كلنا