الموضوع: عايزه أتمن عربيتى لو سمحتوا

نصيحة لله متركينيهاش
اذا كان الواحد لما بيركن العربية تحت البيت بتتسرق وبتتبهدل وتتخربش وتتخبط
مابالك تركينيها عند سايس وما ادراك ما سايس في جراج
لأ ويبقى كمان عارف انك مسافرة وان مفيش حد حييجي يبص عل عربية لمدة سنة
انا رأيي تشوفي اي حد مضمون من قرايب حضرتك يحرك العربية ولو مرة في الاسبوع ويبقى يتابع طبعا ضغط الاطارات والزيوت
واهو بالمرة تبقي عملتي جميلة فيه
يعني ابن عمك ابن خالتك عمك خالك اي حد من الاقارب مادام في عربية وهو مضمون حرام العربية تبقى مركونة ومفيش حد يستفاد منها
بس شوفي راجل يكون كبير وعاقل في السواقة بدل ما تديها لشاب يطلع يشد بيها
ولو مفيش حد فانا ارجح فكرة ان حد ينزل يدورها كل يومين ويطلعها سنة قدام وسنة ورا ده حيبقى احسن من الرفع ومشاكلة
هذا والله الموفق بفتح الفاء على رأي عمر سليمان

الى الأح الكريم سامى عمر
انا قريت ان موضوع صلاحية الزيت لمجرد شهود دى اكذوبه كبرى علشان شركات اللى بتنتج الزيوت تكسب ارباح كبيره جدا من المبيعات ....والدليل ان عربيتى ماشيه زى الفل بس يعنى من نهاية 2007 الى 2011 مشيت اربع الاف كيلو بس بمعدل 4كيلو يوميا فقططططططططططططط ... وعلشان كده صعبان عليا ابيعها حتى ب 70 الف وكمان خايفه عليها من الركنه بالجراج وغالبا مش هقدر اأجرها لأن الموضوع ده له ناسه أسفه مش قصدى أقصد له ناسه من ناحية المعرفه بالسوق وقيم الأيجارات والاعيب اصحاب محلات التاجير وبهدلة العربيه المتوقع وهى على الزيرو تعتبر خساره كبيره فعلالالالالالالالالا ... من كل الأراء اللى فاتت أعتقد ان افضل شىء بالنسبه لى انى أغير الزيوت ( بس لى سؤال هو زيت المحرك هو نفسه زيت الموتور)؟ وكمان زيت الفتيس ...هو فى زيوت تانيه بتحتاجها العربيه؟؟؟؟؟؟؟ المهم هغير باذن الله الزيوت ومايه الردياتير وهنفح العجل زياده وأخلى أختى اللى مش بتعرف تسوق اصلا كل اسبوع يعنى تدور الموتور وترجعها سنه ادام وسنه ورا لمدة 5 او عشر دقايق ...ان شاء الله اعتقد ان العربيه هتكون تمام ومش هغير الكاوتشات كمان بعد عام من سفرى ان شاء الله وهرجع لو كان ليا عمر الاقيها تمام ومن غير اى خساير .......وبرده مستنيه تعليقاتكم

انا مع الراى الى بيقول متركنهاش فى جراج وخلى اى حد يحركها ويتابعها سريعا جدا كل فترة وبردوا تبقى فى جراج

يعنى مثلا كل اسبوع اى حد يحركها ويدورها ويمشى بيها شوية ويرجعها تانى

فى جراج فى العباسية كبير ... هى ساحة كبيرة تبع الجيش ورا برج مصر للسياحة

الجراج دا جمب بيتى على طول الناس بتركن فيه عربيتهم بالسنة

الشهر لعربية مركونة 24 ساعة ب 200 جنية

بس حتحتاجى غطا عشان المكان مش ضل بس المكان امن وكويس