الطريق من أول شبرا الى شارع 15 مايو بهتيم بالسيارة

**aid904** · 02-06-2011 01:39 PM

السلام عليكم
أنا عاوز أروح من أول شارع الترعه من عند محطه مصر الى شارع 15 مايو في بهتيم عند السنترال . يا ريت المساعدة بالتفصيل لاني لا أعرف أسماء الشوارع ومروحتش هناك شبرا الخيمه خالص قبل كدة؟ يا ريت أعرف أزاي أروح وأرجع. ومتشكرا أوي

**Ashraf_Ibrahim** · 02-06-2011 09:13 PM

حضرتك لو هتروح بالعربية هتمشي كالتالي:-
حضرتك هتاخد شارع شبرا في الاتجاه المؤدي إلى أول شبرا ومن ثم هتنزل نفق احمد حلمي وتاخد اول يو تيرن وترجع تاني هتلاقي انك بعد ما تخرج من النفق الطريق هيتقسم معاك جزئين على طول يدخلك على شارع الترعة البلاقية ويمين هيدخلك على شارع أحمد حلمي من أوله
هتاخد يمين وتدخل شارع احمد حلمي من اوله وتاخده على طول ولا يمين ولا شمال واول طلعة كوبري هتقابلك على ايدك اليمين اطلعها دا كوبري عرابي اللي هيدخلك على شبرا الخيمة -دا بعد عبود وموقف عبود مباشرة-
هتطلع الطلعة دي وتطلع الكوبري وخليك على طول هتقابلك نزلة على يمينك سيبك منها ملكش دعوة بيها وكمل لحد ما تنزل من الكوبري
هتلاقي الطريق بيلف يمين لف معاه وكمل على طول
هيقابلك فرع بنك nsgb على ايدك اليمين ومن ثم مستشفى كبيرة اسمها محمد عبده ومن ثم مستشفى تبارك كل دا على ايدك اليمين وبعدين هتكمل في الطريق على طول لحد ما هتلاقي الطريق بينقسم جزئين واحد يمين والتاني شمال
الشمال دا هتلاقي انه على ناحيته فيه بنزينة موبيل انت هتخليك في الشمال
هتكمل على طول بعد الشمال وهتلاقي سنترال شبرا الخيمة على ايدك الشمال وبعديه مباشرة هتلاقي قسم شرطة
على فكرة من اول ما نزلت من الكوبري انت بقيت في شارع 15 مايو يا عزيزي

لو هتروح مواصلات:-
تطلع على شارع احمد حلمي
واكرب اي عربية بتقول بنزينة او ام بيومي او عرابي وانزل كوبري عرابي -آخر عرابي-
ومن هناك اركب اي عربية بتقول بهتيم او مسطرد وقله نزلني السنترال
بس كدة !

أتمنى يكون شرحي واضح ليك
انا ساكن تقريبا هناك لو احتجت اي شيء !

**aid904** · 04-06-2011 10:37 AM

أنا ليا سؤال تاني معلش أستحملني : هو شارع أخر أحمد حلمي بيلف شمال علشان يوازي ترعه الاسماعيليه ولا أخرة كوبري عبود لان من صور جوجل أيرث شايف أن فيه كوبري عبود دة أنا هأطلعه ولا شمال مع الشارع وتكون الترعه على يميني ؟