الموضوع: تعالوا نعرف ازاي نغير تيل و طنابير الفرامل و ازاي نحافظ ع الفرامل

بسم الله الرحمن الرحيم
السلام عليكم و رحمة الله و بركاته

و لسه مكملين معانا و معاكم في سلسلة تعالوا نعرف مع نجوم اف ام ...احم قصدي .. مع نجوم نايل موتورز

و ضميري ابتدي يفوق من البينج اللي حطتهوله في الفسكافيه ( ضميري و بينج في الفسكافيه ؟؟!! هو انت اللي حاطلتي بينج ده انا هوريك النجوم في عز الضهر ده انا هعلقك ده انا.... اتلم ياض و بطل قلة ادب بدل ما اوريك شغلك و تاكل علقة محترمة زي المرة اللي فاتت )

المهم سيبكم من ضميري

انهاردة هنعرف ازاي نغير تيل الفرامل امامي و خلفي
و نعرف كمان ازاي نغير اسطوانة الفرامل

بس قبل ما نشوف ازاي نغير تيل الفرامل و الاسطوانة
لازم الأول نعرف المشاكل اللي ساعات بنواجها مع الفرامل و ازاي نحافظ ع الفرامل ( مبقاش الا انت كمان اللي تقول الناس ازاي يحافظوا ع الفرامل ... يا فتاح يا عليم اول القصيدة ضميري )

يلا نبتدي ع بركة الله

بعض المشاكل اللي ممكن نواجهها مع الفرامل

1- ان تيل الفرامل يتآكل :
طب اعرف ازاي ان التيل اتآكل
هنلاحظ و احنا بندوس ع الفرامل ان الفرامل مش بتستجيب بسرعة و لازم ندوس ع اخر الدواسة عشان تمسك
يا نهار الوان طب و الحل ايه
الحل انك تغير التيل عالطول من غير تفكير

2- ان الماستر العمومي بيسرب زيت :
يا نهار الماستر بيجيب زيت و كمان العمومي طب اعرف ازاي و الحل ايه
يا عم متتخضش اوي كده بسيطة ان شاء الله ...و تعرف انك هتلاقي الفرامل مش اوي معاك و بتروح تنزل تبص ع الزيت في القربة هتلاقيها ناقصة اوي و هتلاقي ان الزيت بيسرب ع السيرفو
و الحل حاجة من الاتنين يا تغير جلدة الماستر اللي هي في الحشو جوة يا اما تغير الماستر العمومي كله بس الأفضل متخليش حد يضحك عليك و يقولك ديه بتسرب زيت لازم تشتري ماستر عمومي جديد ..لف و دور معاه و الحكاية والرواية و الحالة طب مفيش حل عيش يعني في اللف لحد ما يقولك ع الحل انه يغير الجلدة او تجيبهاله انت بطريقة غير مباشرة
و اساسا الموضوع مش هياخد في ايده 15 دقيقة بالفك و التركيب و التفريغ و لو قالك مفيش جلدة للماستر بتاعك خليه ياخد القديمة يشوف اي واحدة عليها.

3- الفرامل بيبقي فيها هوا :
اده الفرامل فيها هوا يعني اروح لبتاع كاوتش يظبط ضغط الهوا
لا يا فطن ده معناها ان الفرامل لازم الهوا اللي فيها يتفضي و الا الفرامل هتنزل ع الفاضي و ده عن طريق مسمار مخصوص عشان تفريغ الهوا و مش هتعرف تعملها لوحدك لازم يكون معاك واحد يقعد مكان السواق و يكارك و بعدين يدوس للاخر لحد ما الفرامل الهوا اللي فيها تفضي و تكرر الموضوع مع باقي العجل و لو مش عارف مكان المسمار ممكن لو ليك ميكانيكي معرفة تخليه يوريك المسمار ده فين

4- سوستة الفرامل ضعيفة :
سوستة الفرامل ضعيفة يعني ايه ؟ اروح عند الترزي يغيرلي الترمسة و لا يخيطلي واحدة جديدة
يا سلام ع خفة دمك اللي تلطش سوستة الفرامل ديه اللي بتساعد ع سرعة رجوع التيل بعد ما دوست فرامل
و ديه لازم تغيرها لو ضعيفة


5- العربية بتتحرك بالعافية نتيجة انك مشيت و فرامل اليد ( الهاند بريك ) مرفوعة
طب ايه اللي يحصل و اعمل ايه ؟
اللي هيحصل ان الفرامل واصلة مع العجل اللي ورا بسلك و وصلات و بتشد
في الحالة ديه تروح لميكانيكي يريحلك الفرامل

6- العربية بتحدف يمين او شمال جامد كل ما تدوس فرامل :
يا خبر ده كده الواحد يروح في داهية شكلها فيها تغيير فرامل كلها و هدفع بقي فلوس
لا يا ريس متقلقش كل الموضوع ان تيل الفرامل اللي ناحية الجهة اللي بتحدف مزيت هتروح للميكانيكي ينضفه

7- انسداد المواسير :
انسداد المواسير ؟؟؟ يعني هجيب السباك تاني ده لسه ماشي
سباك ايه يا عم انت ديه المواسير اللي بيمر فيها الزيت يروح للفرامل مش مواسير المجاري بتاعت بيتكم
لو مواسير الفرامل ديه اتسدت تروح للميكانيكي ينضفهالك او تغيرها


ازاي نحافظ ع الفرامل :
- بلاش تجري تجري و تدوس فرامل فجأة الا لو في حالة الخطر
-قبل ما تطلع المطب هدي سرعة العربية اوي و شيل رجلك من ع الفرامل يعني متاخدش المطب و انت دايس فرامل
- دايما بص ع قربة زيت الفرامل لو ناقصة زودها بالزيت الباكم و ديه علبة بــ 4-5 جنيه الصغيرة
بس لو ناقصة اوي لازم تكشف عليها عشان ممكن تكون بتسرب زيت زي ما قولت فوق
- دايما تغير تيل الفرامل كل ما تتأكل بلاش تسيبها لحد ما الحديد يجي ع بعضه عشان الطنابير
- من وقت للتاني تكشف ع الفرامل والطنابير و المواسير و لو فيه اي حاجة علي تيل الفرامل تتنضف سواء زيت او قاذورات.
كده ان شاء الله الفرامل هتفضل معاك كويس و مفيش اي مشاكل غير التغيير الدوري للتيل


نيجي بقي للتركيب

اولا تغيير تيل الفرامل الأمامي In Front Brake Pads

http://www.youtube.com/watch?v=yYnQxEjGq2A


YouTube - ‪Maintenance and How-to: Changing Break Pads‬‏



ثانيا : تغيير تيل الفرامل الخلفي Rear Brake Pads

YouTube - ‪2009 Honda Accord Rear Brake Pad Change‬‏


ثالثا : تغيير طنابير الفرامل الأمامية Brake Rotter

YouTube - ‪How-To Install New Brakes & Rotors‬‏


بسيطة جدا يعني
لو حد شايف انه مش هيقدر عليها او قلقان
ع الاقل تبقي عرفت القصة ماشية ازاي عشان ميجيش واحد يسرح بيك و ينخور في العربية زي السوس
( عودونا في المدرسة ان السوس بينضرب بالشبشب ... اكيد انت دلوقتي عرفت انا بضربك ليه بالشبشب )

اتمني ان الموضوع يحوذ ع اعجابكم

و انتظروا باقي السلسلة

و بالتوفيق للجميع ان شاء الله