أرجوكم إلحقونى بأفكاركم أنا هيجرالى حاجه (لخبطه فى السنتر والإنذار والكاسيت)
السلام عليكم ورحمة الله وبركاته
عربيتى شاهين موديل 2004
والحمد لله كانت ماشية زى الفل
الاسبوع اللى فات قولت اغير الإكصدام الأمامى بواحد جديد علشان عندى كان مكسور
وغيرت كمان 3 أوكر
طبعا السمكرى فك فرش البابين الأماميين
ومن ساعه ما حط ايده الكريمة
ومن يومها واللخبطة والعك اشتغل معايا وبدأت رحلة العذاب
بعد ما طلعت من عند السمكرى اكتشفت ان السماعه اللى فى باب السائق مش شغاله
رجعتله قالى انا موصلها المهم فتح تانى ووصلها واشتغلت طيب الحمد لله
روحت البيت قفل العربية واستريحت نص ساعه نزلت تانى بفتح السنتر بالريموت السنتر يفتح الأبواب وفى جزء من اللحظة ينزل تانى ويفضل يكرر العملية ديه لازم وانا بأفتح بالريموت يكون ايدى على الأوكره علشان ألحق افتحها بسرعه ولو حالفنى الحظ وفتحت باب السائق باقى الأبواب بتقفل
كمان الراديو كاسيت بقى بيخرف كل يوم بحس كإن البطارية اتفصلت عنه انا بسجل فيه إذاعه القرآن الكريم وغيرها من الإذاعات لما بركن العربية فترة وبفتحها تانى كل الإذاعات المتسجلة بتتمسح الحركة ديه مكنتش بتحصل إلا لما بفصل البطارية بقت بتحصل كل يوم
الألعن بقى انى ساعات بشغل الكاسيت شاشته بتنور والقراءة عليه بتقول انه شغال بس مفيش اى صوت طالع من أى سماعه بمجرد فتح الباب وغلقه ألاقى الصوت اشتغل أقول للكهربائى كده يفكرنى مجنون :angry06:
طب شوف ياعم الكهربائى السنتر فتح باب اللى بجوار السائق وقعد يلعب فى المنفاخ بتاع السنتر وبعدها السنتر مبقاش بيعلق طول اليوم بس بيعلق مرة أو مرتين طوال اليوم
رجعتله بقوله بيعلق الصبح أول ما ببدأ يومى يقولى مهو زى الفل اهوه وفعلا مش بيعلق قدامه مهما جرب
إمبارح كنت فى مشوار وجيت اركب العربية علشان امشى شغلت الكاسيت وبدور العربية لاقيت الكاسيت طفى والإنذار اشتغل وحلف ماهو طافى فضلت احاول فى الإنذار بالريموت مفيش فايده السرينه شغاله متواصل كإنى حرامى بيسرق العربية مشيت بالعربية كده والسرينه شغاله وقولت أروح للكهربائى بالدليل على ما قربت أوصله لاقيت السرينه طفت وكل شيئ بقى طبيعى الكهربائى قالى الإنذار عاوز يتعمله رسيت وفك الفيوز بتاعته ووصلها تانى وكل الأمور طبيعيه
سيبته وروحت مشوار وركنت ونازل لاقيت السنتر بيخرف
الخلاصة تخاريف غريبه وعجيبه فى السنتر والإنذار والكاسيت هيهبلنى
النهاردة سبت شغلى وتفرغت للافلام ديه بقالى 12 ساعه روحت للكهربائى ولواحد متخصص فى الكاسيت
ولما اروح تلاقى كل شيئ طبيعى
روحت لاقيت فيوز الكاسيت اتحرقت
غيرتها
ونفس التخاريف والعك
مش عارف أعمل ايه
غلب حمارى
:B4_611:
