الموضوع: تركيب فلتر هواء k&n لفيات بونتو بالتفصيل

سلام عليكم
الحمد لله اشتريت الفلتر من Tokyo options فى شارع دمشق ب350 جنيه و خدت معاه الhose فوق البيعة , اللى هى الكاوتشة الزرقاء اللى بتركب فى الmanifold "مدخل الهواء"

بعد كدة بدأت رحلة البحث عن الماسورة المناسبة اللى تسمح ب3 حاجات:
1-انها ماتسخنش من حرارة الموتور و تدخله هواء سخن (علشان الهواء البارد بتبقى كثافته أعلى و بالتالى فيه أكسوجين أكتر و حرق بنزين أحسن)
2- الفلتر نفسه يبقى بعيد عن سخونة الموتور
3- الفلتر يبقى جنب فتحة الاكصدام (اللى فى الصورة) علشان يدخله هواء بارد بسهولة, لأن الشبكة اللى فى الكابوت مقفولة و مجرد منظر



فكرت فى مواسير الpvc بتاعة السباكة ! لأنها خفيفة و قوية و كمان مقاومة للحرارة, و فعلا بالإستعانة بأحمد باستو (لأن والده مهندس معمارى) رحت لمحلات سباكة جبت منها ماسورة pvc قطرها 3 انش و كوع و أفيز معدن و كاوتشة علشان أوصل سينسور الأكسوجين للماسورة

قابلتنى مشكلة ان الماسورة لازم تبقى متنية لتحت علشان أعرف أثبتها كويس و أقفل الكبوت عليها

مليتها رمل و قفلتها بجرايد و سيحتها على البوتجاز حسب نصيحة السباك, بس الموضوع فشل تماما و الماسورة اتدمرت من الأطراف و برضو معرفتش أتنيها كويس لأن قطرها كبير



فإشتريت ماسورة بلاستيك مرنة ب 90 جنيه (سعرها فى العادى 120) و ركبت زى الفل الحمد لله, و عملت فتحة لسينسور الأكسوجين فى الhose بمكوة اللحام علشان لو كنت قطعتها كانت هتكمل و تتقطع كلها
و ثبتت الفلتر بكذا أفيز بلاستيك
بعد كدة فصلت الكابل السالب فى البطارية لحد الصبح علشان الECU يظبط نفسه على كمية الهواء الجديدة اللى داخلة للموتور و يستفيد بيها

لما لاقيت جسم الموتور بقى عريان كدة بعد ما شلت العمة البلاستيك خالص, جبت صفيحة ألمونيا و قطعتها جزئين, جزء كبير فوق الموتور ربطته بنفس مسامير العمة بس تحتها 4 وردات فى كل ناحية علشان يبعد ماسورة الفلتر عن سخونة الموتور , و رشيته فضى بإسبراى عندى
الجزء التانى ثبته تحت الفلتر بمسمار فى قاعدة البطارية علشان ميوصلوش تراب كتير من الشارع و رشيتها اسود!
التكلفة الصفيحة 5 جنيه و الحداد 10 جنيه و مسامير و ورد ب2 جنيه

شوية صور بقى:

الموتور قبل التعديل


الموتور بعد ما شلت العمة البلاستيك و جواها الفلتر


الK&N مع التعديلات التانية







بالنسية للصوت:
أول حاجة لاحظتها فرق الصوت لما بكبس دواسة البنزين لأخرها, صوت الموتور بقى قوى و ممتع جدا و مش مزعج تماما زى اللى بيركب علبة شكمان كبيرة أو ديفل و كدة
الصوت فى العادى بيبقى طبيعى جدا, و بيزيد فى حالتين:
-لو ماشى على RPM قليل (2000 مثلا) و تدوس بنزين للأخر
-لو الRPM معدى ال4000


بالنسبة للأداء:
العربية بقت بتجرى أحسن من الفيرارى و بتجيب ال100 فى 5 ثوانى !


بهزر طبعا , بس إستجابة العربية أو الthrottle response بقت أحسن بكتير, يعنى لما أدوس بنزين و بوابة الهواء تفتح لأخرها , العربية بقت بتجرى و بتاخد وقت أقل بكتير من الأول كأنها بتفكر الأول
أداء العربية كتسارع و top spead زاد بنسبة بسيطة جدا حوالى 3% بس يعنى زمن التسارع من 0 ل100 زى ما هو أو قل بتلت ثانية بس, يوكو قالى مفروض مش أدوس دواسة البنزين للأخر علشان العربية ما تتخنقش و العجل يفرك كتير على الفاضى , هبقى أجرب الموضوع دة و أقول لو فى فرق

الtop spead زادت حوالى 3 كيلو, يعنى العربية بقت بتجيب 158 بدل 155 فى الظروف الطبيعية لأنها ساعات بتجيب أكتر من كدة حسب اتجاه الريح و حاجات تانية

أولا أداء العربية بليل بيبقى أحسن كتير من الصبح, بحس ان الفلتر الصبح بيدى صوت مع كبس البنزين و خلاص !
تانى حاجة استهلاك البنزين طبيعى طول ما أنا ماشى عادى و بنقل بدرى على 2500 rpm مثلا, بس لما أكبس بنزين على أى سرعة بشوف أرقام استهلاك فى الشاشة غريبة جدا على!

صوت الفلتر بيخلى عربيات كتير عايزين يشدوا معايا طول ما أنا ماشى بسرعة !! الخطوة الجاية بقى الموتور ال1400 ال95 حصان ان شاء الله

اتمنى التقرير يبقى مفيد و شكر خاص لأحمد باستو و يوكو


تم التعديل بواسطة
مشرف القسم 6ب