فى حد زيي ولا كدا انا مش طايق نفسي

**wa7d** · 05-06-2011 07:59 PM

اتخنقت من لعب العيال فى الشارع ليل نهار , انا شقة دور اول علوي فى منطقة شعبية , طول النهار عيال وشباب وادامي محل بلاستيشن وكمان حاطط ادامه طرابيزة بنج بونج وطول النهار صريخ وشتيمه وصداع

الناس اللي فوقي على طول عندهم بت شقيه طول النهار بتهبد علي السقف عندي وصداع , دماغي ورمت منها , البت نازله هبد ورزع فى علي السقف

جيراني اللي جنبي ميعرفوش يتكلموا الا لما يصرخوا , دا غير بقي اللي طالع واللى نازل على السلم والاطفال

الباعة الجائلين وما ادراك ما البائع الجائلين , مره بتاع روبابيكيا ومره بتاع بطيخ ومره بتاع عيش بايت ومره بتاع خضار لما خلالالالالالالالالالالالا لالالالالالالالاص

وغيره وغيره وغيره كتير

انا عايز اعرف بقي يا تري فى حد بيعاني زيي ولا انا لوحدي فى الحوار دا ؟

**Ahmed_lol2007** · 05-06-2011 08:42 PM

والله انا عندى نفس المشكلة ادامنا ارض فاضية والعيال مقضياها لعب كورة وطبعا أنا بمتحن غير بنت عمى الصغيرة ساكنة فوقينا ونازلة تنطيط ولعب وقرف
المهم أنا زعقت للى ف الشارع ودلقت عليهم ماية وخليتهم مشيو وبقالهم بتاع 4 ايام مش بييجو والحمد لله غيرو نشاطهم من كرة قدم للعب البلى بس بعيد عنى
وخليت بابا يكلم عمى على بنته دى خلاها هديت شوية بس بفكر أعمل أى حوار عشان اخليها تسكت خالص

**Ralliart** · 05-06-2011 09:06 PM

دي مشكلة كل المصريين عدم احترام الناس ولا حقهم في الهدوء

**زينة الله** · 05-06-2011 09:25 PM

أجر الشقة و اتأجر فى مكان تانى اريح هههههه :) بس ما تبعهاش إلا اذا كنت هتكمل و تشترى واحدة تانية

**wa7d** · 05-06-2011 09:48 PM

المشكلة انا اساسا شارعنا كان شارع هادئ جدا , كان يعتبر اهدى شارع فى المنطقة كلها , بس حالة اتقلب مره واحده , انا فعلا ناوي اعزل لان بجد اعصابي تعبت جدا ومش عايز اعمل مشاكل لاني عصبي وممكن اعمل مصيبة

البنت اللي فوقي كلمت امها مره وبعدين يومين ورجعت البت تتنطط تاني خايف اكلم امها تاني ولا ابوها يضربوها ودي فى النهاية طفله وبصراحة ضميري حيوجعني لما اكون سبب فى ضربها ومخلهاش تعلب براحتها , بس انا كمان تعبان

المشكلة مش بس فى الطفلة اللي فوق المشكلة بجد فى الشارع ككل والمنطقة , انا فعلا محتاج اعزل , بس انا مش عايز اعزل فى منطقة شعبية يبقي معملتش حاجة والفلوس اللي معايا حاليا متجبش شقه فى حته هادية

شكلي كدا حروح اقعد فى العباسية ولا مستشفي المعمورة اريح اعصابي هناك

**Ralliart** · 05-06-2011 10:35 PM

المشاركة الأصلية كتبت بواسطة زينة الله

أجر الشقة و اتأجر فى مكان تانى اريح هههههه :) بس ما تبعهاش إلا اذا كنت هتكمل و تشترى واحدة تانية

+1
ده حل سليم جداً أجر شقتك وخد الايجار كمل عليه واجر شقة في حتة اهدى وتبقى دخلت دي في دي ولا كأنك دفعت حاجة
انا عارف ناس كتير عاملين كدة

**wa7d** · 06-06-2011 01:49 PM

موضوع اني انقل اجر شقتي دي وانقل فى شقة تانية , مينفعش اولا الشقة بتاعتي ايجار قديم يعني مينفعش اجرها , تاني حاجة حتي لو تمليك انا شقتي متوضبه كويس ولو اجرتها حتتبهدل .

انا فعلا ناوي انقل بس الفلوس معجزاني دلوقت , بس انا كنت بسأل بس , انا كدا طبيعي فى خنقتي دي ولا انا خلقي ومش طايق دبان وشي

احلا حاجة وانا بكتب الرد دا تحت دلوقت بياع بصل وماسك المكرفون وبيلحن

**تامر.محمد** · 06-06-2011 02:30 PM

لا خنقتك في محلها

انا ساكن في تالت دور و مش طايق نفسي من الزيطة ليل و نهار
:(

**AmAhmed** · 06-06-2011 02:32 PM

عندي مشكلة مماثلة لاني بنزعج من الدوشة قوي - بعد دردشة مع اكثر من شخص طلعت انا غلطان لاني مش مركب الومنيوم بزجاج مزدوج لمنع الصوت

و ده تعبير عن طريقة المصريين في التعامل مع المشاكل عن طريق تفاديها و الالتفاف حولها و محاولة التعايش و التعامل معها