الموضوع: مازدا 3 2010 ... انطباعات اولية

السلام عليكم
قبل اي حاجة نفسي اعرف قسم المازدا نايم اوي كدا ليه مع ان اعضاؤه كتير
انا كنت عايز اجيب عربية عشان ابطل ابرشت علي عربية اخويا و انا بالنسبالي اما ببص في العريية ببص علي كل حاجة فيها و بصراحة مبحبش اركب حاجة منتشرة جامد
المهم كانت المقارنة الاخيرة ليا بين المازدا 2010 و جولف 2005 و رغم ان كان نفسي في جولف الا ان فرق الموديل خلاني ارسي علي المازدا في الاخر
نيجي بأه للانطباعات الاولية و ده لعد سواقة يومين بس
الشكل الخارجي:
العربية من ادام smiley face شكلها ظريف اوي بس مش aggressive و فوانيسها جميلة جدا
من ورا رغم ان فوانيسها شكلها حلو اوي لكن كان ممكن يكون احسن و دي برضه ازواق
في المجمل العربية فيها انسيابية غير عادية
الشكل الداخلي:
العربية واسعة جدا من ادام لكن ضيقة من ورا يعني تاخد 4 مستريح لكن 5 حيبقي اللي ورا مش مستريحين
الدركسيون بعلامة مازدا في نصه مع الكاسيت اللي زرايره حمرا و خط ازرق جميل جدا عاملين شكل رائع للتابلوه و دي اول مرة يعجبني كاسيت زرايره كتير
طبعا اكتر حاجة عجبتني شاشة الهيد يونت اللي داخلة جوه زي الميجان اللي مبتفرقش سواء صبح او ليل
العدادت واخده شكل رياضي مع الشاشة اللي في النص
الموتور و الفتيس:
الموتور عنيف كعادة الياباني الكيك داون متوحش السحب اعلي من الميجان و اقل من الصني لكن التجميع سريع و الفتيس نقلاته سلسلة متحسش بيها
عيبه بالنسبالي انو زجزاج و انا مبحبش الزجزاج اوي
انا برضه لسه مقرصتش عليها جامد
التكييف:
نو كومنت بصراحة اشد تكييف شوفته مش هقول اكتر من كده
Misc:
قطر الدوران بتاعها مش عاجبني اوي الميجان كانت افضل في النقطة دي
خامات التابلوة عالية لكن مازات اقل من الميجان لكن فرق مش كبير
جميل اوي خاصية انك ممكن تفتح الازاز بالريموت
الاستابيلتي مفيش كلام عليه من ادام ماكفيرسون و من ورا مالتي لنك
الفرامل شديدة جدا باليه بي اس

دي الحاجات اللي في دماغي دلوقتي و لول افتكرت حاجة تانية حاضيفها و لو حد حب يضيف حاجة يتفضل

و في الاخر عايز اسأل سؤالين:1-ايه هي المراكز المعتمده من التوكيل؟و ايه افضلهم؟
2-ايه سعر الفواجات و المالتي فنكشن و الزينون؟

المشاركة الأصلية كتبت بواسطة thebutcherr

ربنا يباركلك فيها

الف شكر ربنا يكرمك

المشاركة الأصلية كتبت بواسطة levelpower

الف مبروك و ربنا يبارك فيها
1- مفيش مركز معتمد من التوكيل غير مركز صيانه ابو رواش وده بيبعد كيلو متر من توكيل هيونداى القديم اسأل اى حد هيدلك
2- بصراحه اسعار الشكل الجديد مش معايا بس طبعا الزينون بيتراوح ثمنه من 350 الى 1200 تقريبا
و الف مبروك و نورت مازدا

شكرا و حتي تكنو وان اللي في اعلان عنه في المنتدي؟؟

المشاركة الأصلية كتبت بواسطة mohamed456

مبروووك يا باشا
انا معايا مازدا 3 2010
انا معاك قطر الدوران مش كبير
واطية شوية دا حتى كان فى واحد معاه مازدا سودا خليجى و سألنى عليها قلت لة هيا بتحك فى المطبات
الماتى فانكشن ممكن تتابع الموضوع على اسعار الاكسسوارات ال قدمتها غبور من شهر
الفوجات مش ح تلاقيها
التكيف انا جالى برد بسببها
البنزين حراقة
انا معايا هوندا مانويل كنت بفول مرة واحدة فى الشهر
و المازدا دولوقتى بفول مرتين فى الشهر
يمنك المانويل اقل استهلاكا من الاوتوماتك ................. الله اعلم
و مبررررروك علينا و عليك

الله يبارك فيك و ربنا يكرمك
لكن ممكن تقولي اجيب منين الاسعار اللي من شهر دي؟

المشاركة الأصلية كتبت بواسطة adel1414

تقرير مممتاز ...ربنا يكفيك شرها وتستعملها فالخير

شكرا ربنا يخليك