عاوز أجرب العدسات اللاصقة

**Centurion** · 06-06-2011 02:34 PM

السلام عليكم،

أنا زهقت من النضارة و كنت بفكر أعمل ليزك بس قلت بلاش منها دلوقت لغاية لما أسأل عنها وأفكر كويس

وعقبال لما أخد قرار نهائي فكرت ان أنا أجرب العدسات اللاصقة أهو على الأقل أعرف ألبس نضارة شمس عدلة

فكنت عاوز أسأل هل الأحسن ان أنا أروح لعيادة خاصة ولا مركز كبير زي المغربي؟

والكشف تقريبا هيكلف كام هو والعدسات والمحلول؟

أنا سمعت ان في عدسات دلوقت ممكن تلبسها علطول بس مش عارف الأنواع دي موجودة في مصر ولا لأ؟

وعاوز أسأل برضو أنا عندي استجماتيزم خفيف كده -1 تقريبا في العينين فهل هتنفع العدسات عادي ولا لأ؟

ياريت ياخونا تحكولنا تجاربكم

**tarekzein** · 06-06-2011 03:08 PM

بأذن الله حد ثقه يرد عليك

نفس المشكله

والأمنيات :)

**azmeralda** · 06-06-2011 03:42 PM

شوف العدسات مبتصلحش الأستجماتيزم بيطنشوه

بس سمعت ان فى انواع نزلت للموضوع ده لكن ما شفتهاش

انا بشترى من عند دكتور بيبقى فاتح مركز عدسات معرفش اصلا ان مغربى بيبيع

اكتر نوع عجبنى كوبر لأن عينى حساسة وانواع كتير جبتها ورميتها بس ممكن تبقى معاك كويسة الفلوس من اول 60 لحد 400 ج

انصحك تجيب اللى بتقعد 3 شهور او 6 شهور بس الأول جربها وشوف هترتاح فى استعمالها ولا ل أ لن جو مصر بترابها وحش جدا عالعدسات لو عجبتك اشترى السنوية ممكن تبدأ من 200

المفروض ان بوش اند لومب حلو برضه لكن سوفى لنس ده معجبنيش

المحلول حوالى 40 ج

احسن نوع عجبنى اوبتى فرى بلس

اهم حاجة تحافظ على نظافتها لأن دى بتحطها فى عينك ايدك تكون مغسولة وتحتك فوطة عشان متوقعهاش عالأرض
متكونش مربى ضوافرك لأن ممكن تقطعها

وتحطها فى المحلول عدد الساعات المطلوب عشان تتعقم وياريت تجيب الملقط البلاستيك ده تمسكها بيه

منصحكش باللى بتتلبس علطول دى لازم العين تتنفس وكل ما العدسة نفاذيتها للأكسجين تكون اعلى كل ما تكون احسن

كمان متجيبش اكيوفيو اللى بتتلبس يوم واحد وتترمى دى سيئة

لو عندك رمد ربيعى او جفاف فى العين مش هينفع اصلا

الكشف مفروض بيشيله من تمن العدسة

**MOUSTAFA_SAAD** · 06-06-2011 06:37 PM

انا لسه مجربه جديد من 3 اسابيع بس
هى مغلبانى فى الشيل والحط لانى بخاف اول لما امد صبعى على عينى او اى حد يقرب صبعه من عينى حتى الدكتور دوخته وهو بيجربهالى واول اسبوع كنت بخلى اختى تشلهالى وتلبسهالى لغاية لما تخنقت منى وقالتلى اتصرف انت ياما بطل تلبسها
فبقيت اعتمد على نفسى فيها والمشكله انى بحاول فيها كذه مره علشان البسها لانها بتتعلق على رموشى وبتقع منى كتير فالمحلول اللى بحطه عليها قبل اللبس بيقع فبتبقى نشفه وده يمكن تاعبنى شويه وبيحمر عينى
انا معايا نوع اسمه
zeiss
contact
day 30 spheric
هو المانى بس ده اللى مكتوب على العلبه مش عارف بقى انهى اسم بتاعها
الطقم 6 قطع زائد محلول ب 180 جنيه
الدكتورقالى حتعيش معاك انت وشطارتك لغاية لما تتقطع
نصيحتى ليك لما تجيبها انك تصبر عليها لان انا كنت خلاص حازهق منها وارميها لولا انى صعب عليا الفلوس تترمى على الارض فى الاول حتبقى صعب تتعود عليها بس بعد كده الامور حتمشى

وعلى فكره لو امكانياتك تسمح بعملية الليزك اعملها مفيش مشاكل
انا اختى عملتها من 3 سنين والحمد لله زى الفل وانا نفسى اعملها ان شاء الله

**azmeralda** · 06-06-2011 07:24 PM

مفيش حاجة اسمها لغاية ما تتقطع ده خطر جدا هى كيس ساندوتش : ) هى لها مدة معينة وعادة بتبوظ قبلها

**Ralliart** · 06-06-2011 07:31 PM

انا بقالي سنة بستخدمها ،بجيبها من عند دكتور في الدقي هو اللي بيكشف وبيجيبها ب180 جنيه 3 عدسات كل واحدة بتقعد شهر ونص نوعها frequency انجليزي

في الاول هتتعبك شوية لكن بعد كدة هتتعود عليها
اهم حاجة تنضفها كويس بالذات من الشعيرات الصغيرة اللي بتلزق عليها من الجو وتحطها في محلول نضيف ولو لبستها ولقيتها بتوجعك وجع بسيط متنفضش اخلعها واغسلها تاني بالمحلول والبسها
يا ريت لو حد جرب انواع كويسة يقول

**Ralliart** · 06-06-2011 07:34 PM

المشاركة الأصلية كتبت بواسطة azmeralda

مفيش حاجة اسمها لغاية ما تتقطع ده خطر جدا هى كيس ساندوتش : ) هى لها مدة معينة وعادة بتبوظ قبلها

+1 صح ده كدة خطر جداً وبتجرح في العين هي ليها مدة وبتترمي
انا مررة مكنتش فاضي انزل اجيب تاني فضلت لابسها 15 يوم زيادة اتقطعت وانا في مشوار وكانت بتجرح في عيني لحد ما روحت وخلعتها

**azmeralda** · 06-06-2011 07:43 PM

انا مرة اتقطعت فى عينى برضه بس كانت جديدة وحسيت ان دبوس فى عينى اتشقت نصين كل نص لوحده والدكتور بقى قعد يقول اسباب عبيطة قال ايه كنتى بتسحبيها من العلبة بصباعك فبتتجرح ما كله بيتعمل فى كده

**MOUSTAFA_SAAD** · 06-06-2011 07:55 PM

المشاركة الأصلية كتبت بواسطة azmeralda

مفيش حاجة اسمها لغاية ما تتقطع ده خطر جدا هى كيس ساندوتش : ) هى لها مدة معينة وعادة بتبوظ قبلها

طيب مدتها كام على كده
ومش عارف ايه العلاقه بينها وبين كيس الساندويتش

**Ralliart** · 06-06-2011 08:29 PM

المشاركة الأصلية كتبت بواسطة moustafa_saad

طيب مدتها كام على كده
ومش عارف ايه العلاقه بينها وبين كيس الساندويتش

المدة على حسب النوع والموديل يعني في بيعد يوم وفي بيعد سنة
اللي حضرتك جايبها في حدود 180 يبقى غالباً مدتها شهر ونص ممكن يزيدو اسبوع بس مش اكتر من كدة دي عينك لازم تحافظ عليها