الموضوع: ايه السبب فى الموضع الغريب ده

المشاركة الأصلية كتبت بواسطة sala7

حضرتك بتكلمني انا ولا بتكلم مين ؟؟؟

بكلمك انت

MMamdouh

المشاركة الأصلية كتبت بواسطة sala7

نفس الاسلوب ده اللي خلاني المرة اللي فاتت اسيب المنتدى و اكبر دماغي اشارك فيه معاكوا بأي معلومة
كل الناس مصممة على النمطية و كل ناس فاكره انها بس فاهمة و الباقي مش فاهم
انا رجعت للمنتدى اني حسيت اني مجرد متفرج و احرجت من نفسي اني بخش اتفرج من غير ما اشارك بأي حاجه و ابقا معايا معلومة و ابعدها عن الناس .

عادي يا محمد باشا ولا يهمك والله انت كاتب مثل جميل اوي في التوقيع بتاعك و فعلاً المفروض احنا كلنا نقولة بصوت واحد

يلا كلنا يا جماعه نقول هجس كما هو المعتاد ... تخيل لو واحد بينقل معلومة من مكان موثوق فيه و بينقلها للمنتدى فا بالك بقا لو واحد حافظ مش فاهم .
ده لمجرد اني بقيت بجادل و في الباطل و في حاجه مفروغ منها

بس هو ايه اللي مفروغ منه يا استاذ محمد ممدوح ؟؟؟؟؟؟

معرفش ايه لزمة القصة الطويلة اللى فى الاول دى بس انا حرد على سؤالك اللى فى الاخر

المفروغ منة هو تلف الطنابير نتيجة الاجهاد الحرارى... و دى الحاجة اللى انت مش عايز تقتنع بيها... بالرغم من انك بتنادى بان يبقى فيه تقبل لاراء الاخرين بدون افتراض ان فيه طرف صح طول الوقت و دة اللى المفروض اننا بنعملة و انت جبت ادلة على ان فيه توكيلات بتخرط الطنابير و انا مصدقك

ليه بقى انت مش عايز تسمع من الناس و مش مقتنع بالكلام اللى بيقولوة؟؟... ليه معتبر ان الاجهاد الحرارى حاجة وهمية لا وجود لها؟... طالما انت بتتحاور من المنطلق دة يبقى الحوار مش حيوصلنا لحاجة

و للعلم فقط ان قصة الخرط بتكون لعلاج عدم الاستواء فى سطح الطنبورة اللى بيحصل من طول مدة الاستخدام او فى بعض الاحيان نتيجة احتكاك الجزء المعدنى لتيل الفرامل مع الطنبورة لما التيل يخلص... هنا المشكلة بتبقى عدم استواء فى سطح الطنبورة لكن معدن الطمبورة نفسة مازال قادر على اداء دورة بكفائة بالتالى بيتم تسوية سطحة بالطريقة اللى انت شرحتها

اما لو الطنبورة اجهدت حراريا فا دة بياثر على حواص معدن الطنبورة نفسة و مهما تخرط فيها حتفضل نفس المشكلة موجودة... و للعلم برضة انى جربت الكلام دة عمليا و النتيجة كانت صفر و مكنش فيه اى فرق بين الحالة قبل و بعد الخراطة

و للعلم برضة مصطلح "عالى وواطى" لا يعنى انك حتشوف حتت عالية و حتت واطية فى الطنبورة بعينك... انا مازلت محتفظ بالطمبورة الSK اللى تلفت من الاجهاد الحرارى عندى فى البيت و ممكن اجيبهالك تشوفها لو حبيت... اى واحد حيشوف الطمبورة حيقول دى جديدة نوفى (استعمال 18 الف كيلو فقط) لكن بمجرد ما تركبها و تضغط عليها بفرملة قوية حتشعر بارتجاجات فظيعة

و للعلم برضة الرجرجة اللى بنتكلم عليها مش بتظهر من اول ما تلمس بدال الفرملة ولكن بتظهر بالتدريج و بتظهر اسرع كل ما كانت سرعة العربية اعلى... معنى كدة ان العيب بيظهر لما الطمبورة تسخن من تاثير الفرملة مش مجرد ان فيها ريجة تتاكل على المخرطة

كل ما سبق انت مش عايز تقتنع بيه... مع اننا مصدقين ان فيه ناس و توكيلات بتخرط الطنابير... يعنى احنا اشترينا منك و سمعنا اللى عندك و ادلتك اقنعتنا... فى حين انك مش عايز تسمع مننا ولا تقتنع بكلامنا و تجاربنا الشخصية... و فى نفس الوقت انت اللى بتشتكى من عدم تقبل الحوار

مش عارف بصراحة اقولك ايه... عموما لو مش مقتنع بكلامنا براحتك... الموضوع مش اجبار ولا فرض راى

MMamdouh