هاااام جدا جدا جدا لكل مالكى السيراتو
السلام عليكم
اولا انا حبيت انقل طراطيش كلام ومش متأكد من صحته وغير مسئول عنه لكن هاقوله عشان لو طلع صح الناس تكون مأمنة نفسها
النهاردة بالصدفة واحد قريبى فى شرطة بيتدرب حاليا فى القسم قال ان كيا سيراتو بدأت تتسرق بكثافة فى الشيخ زايد
بس مش دى القضية اللى كاتب عشانها الموضوع
الكلام الخطير جدا والجديد
انى رديت عليه وقلتله: طول عمر السيراتوا والالنترا بيتسرقوا ولغاية دلوقتى الشرطة مش عارفة تخلى حرامى يعترف ويقر بطريقة السرقة
قاللى بالنص:قديمة .. بيسرقها بريموت تانى
سألته :انت متأكد من الكلام ده؟؟ وايه مصدره؟؟
قاللى :ايوة واحد قال كدة
سألته: مين الواحد دا؟؟
قالى: حرااامى اتمسك
وقال كمان انه لما يروح القسم هيجيبلى كل المعلومات عن الموضوع دا وايه اللى ممكن يتعمل عشان نتجنبها
...........
الكلام ده بالنص كان بينى وبينه من شوية صغيرين
طبعا حكاية الريموت دى صدمتنى لان توكيل كيا قال ان مافيش حاجة اسمها ماستر للسيراتو وماتنفعش تتفتح غير بمفتاحها
ومن وجهة نظرى ان اكيد السيراتو اللى بتتسرق دى ماتنفعش تتسرق بسلك حديد مثلا لان فيها امبوليزر وتكنولوجيا امان كتير
بس التوكيل ممكن يقول الكلام ده عشان يحافظ على سمعة العربية مع انى مش شايف سمعتها هتتهز ولا حاجة لان اى عربية قابلة للسرقة
انا حبيت اقلكوا كل المعلومات اللى عندى بخصوص الموضوع دا وان شاء الله هبقى اسأله ايه الجديد فى الموضوع ...خلوا بالكوا يا كل اهل اكتوبر لان شكل الحكاية بدأت تزيد
لاول مرة باكتب كلام وانا مش واثق فى صحته لانى ماشفتش بعينى بس بردو حرصوا على عربياتكوا من باب الاحتياط
