عرض للطباعة
السلام عليكم ,
انا طالب وكنت عايز اسافر لوالدي في الامارات. جبت شهادة قيد من الكلية وصورة من الفيزا وجواز السفر ورحت بيهم التجنيد قالولي عايزين شهادة تحركات لوالدي اجيبها من مجمع التحرير.
سوألي هو, انا محتاج ايه عشان اطلع الشهادة ديه لوالدي, ناس قالت توكيل و انا معييش توكيل, وناس قالت البطاقة
فحبيت استفسر من اي حد عنده خبرة في الكلام ده عشان انا رايح بكرة ومعاد التذكرة قرب.
وجريل الشكر مقدما.
شهادة التحركات بثطلع من مجمع التحرير الدور الارضى بصورة الباسبور والبطاقة بس انت متاكد انها لوالدك
ايوة, قالولي عشان يتأكدوا اني مسافر ليه. بعتبار اني مينفعش اسافر اثناء الدراسة غير لو رايح لحد من اهلي.
اظن ححتاج حاجات خاصة بيه هو مش انا.
شوف يا سيدي ..
جاوبني علي الاسئلة دي علشان اقولك تعمل اية بالظبط .
1- انتا الاول سنة كام ؟
2- خلصت امتحاناتك ولا لسة ولو ماخلصتش هتخلص امتي والاجازة هتبدا امتي ؟
علشان تطلع شهادة التحركات من مجمع التحرير .. هاتخش المجمع .. تاخد اول يمين لاخرة ثم شمال هتلاقي المكان بتاعة شهادة التحركات ..
هتاخد نموذج تملاة .. وهتملي البيانات باسم والدك مش باسمك ..
الورق المطلوب .. صورة من جواز سفر الوالد صورة من شهادة القيد صورة من البطاقة .. + خلي معاك اصل شهادة القيد علشان ساعات بيطلب يشوفة ( هايشوفة بس ويرجعوه لك تاني )
وخلي معاك فكة من 3 - 5 جنية علشان بتدفع زي دمغات كدا مش فاكر ..
روح قبل الساعة 12 .. هما غالباُ فاتحيين لحد 3 بس خليك في المضمون ..
هتستلم الشهادة تاني يوم الساعة 3 .. بس لو رحت الاربع او الخميس احتمال السبت .. علشان بيقفلوا الخميس الساعة 1 غالباً ..
خلي والدك يعملي سكان للباسبور بتاعة ويبعتة ( اول صفحة )
انا سنة 5 طب, ولسه اثناء الدراسة حاخد الاجازة شهر 12.
عملت شهادة القيد من الكليه و معايا التأشيرة.
شهادة القيد الي حضرتك بتكلم عنها خاصة بيا ولا بوالدي؟ ولو بوالدي, شهادة قيده بايه بالظبط.
وهل لازم صوة من الباسبور مينفعش صورة من البطاقة بس؟
وشكرا والله وفرت عليا كتير قوي.
انا بس بسأل علي حوار الباسبور عشان لقيت علي موقع الوزارة مكتوب صورة ديه أو ديه.
انتا اخر سنة مش كدا ؟
كويس ان اجازتك بعيدة شويا .. شهر 12 !
قصدي شهادة القيد بتاعة الكلية بتاعتك يعني.. بس ممكن يرخموا ويقولوا لك خلي الجامعة تكتب علي الشهادة معاد ابتداء الفصل الدراسي ومعاد الانتهاء ..
------------
لاء للاسف .. لازم صورة جواز والدك .. وعلي فكرة انتا فاكرها صعبة بس هي سهلة ان شاء الله والدك بس يعمل سكان من هناك ويبعتها لك علي الميل .. وانتا تنزلها وتطبعها وبس خلاص ..
وزي ما قلت لك صورة البطاقة بتاعتك .. صورة شهادة القيد بتاعة الكلية .. وصورة جواز الوالد .. وخلي معاك اصل الاوراق للاطلاع فقط ..
لاء دي غالبا مش بتمشي علي الطلاب ..اقتباس:
المشاركة الأصلية كتبت بواسطة icyice
هما عايزيين صورة الباسبور علشان يعرفوا البيانات منة ورقم الباسبور وامتي والدك اخر مرة سافر .. وعلشان يعرفوا اذا كان والدك جوا مصر ولا برا مصر ..
--------------
حبييي, تسلم والله بدعيلك من كل قلبي. انا الحوارات ديه لخبطتني وخلت مزاجي سيء جدا عشان قلت حتعطل جامد وممكن ملحقش معاد السفر. بس انت جزاك الله كل خير طمنتني.
شكرا ليك مرة تانية.
انتا معاد سفرك امتي ؟
وانتا روحت فين علشان تطلع تصريح السفر .. العباسية ولا فين ؟
وملحوظة : لما يسالوك عايز شهادة التحركات لية .. قولهم علشان مسافر لوالدي أو علشان هيئة التنظيم والادارة
وخليك فاكر هتملي نموذج التحركات ببيانات والدك يعني اسم والدك وميلاد والدك واخر مرة سافر امتي .. الخ وهتكتب ان شهادة التحركات موجه لـ هيئة التنظيم والادارة .. ولما تيجي تستلمها هينادي علي اسم والدك .. وخد معاك قلم ضروري جداً علشان مش تحتاس وانتا بتدور علي قلم ..
والشكر لله .. وتسافر بالسلامة ان شاء الله بدون مشاكل .. هو تصريح السفر ده ورقة صغيرة كدا بس تدوخ شويا ..
انا لحد الان محجزتش, بس الفترة الي اقدر اتغيبها من الكلية قصيرة جدا كان مفروض تبدأ من النهاردة لحد اسبوعين كمان , فكل ما بتأخر بتزنء اكتر في الوقت.
ورحت لهيئة التنظيم والادارة الي في العباسية.
انا حروح بكرة الصبح من الساعة 9 ان شاء الله, نفسي يخلصوها بكرة حد قال انها ممكن تخلص في ساعتين او حاجة.
بالتوفيق .. صعب تخلص في نفس اليوم الا بالواسطة .. ممكن تاني يوم ..
وابقي طمننا .. لما تعمل التحركات وتطلع اذن السفر واي استفسار احنا موجوديين :)
شوف انا مش عارف هوا ايه الي طلبوه منك دا بس انا بسافر كل سنه مره او مرتين برا مصر وكل مره مش بعمل اكتر من اني اجيب شهاده زي شهاده اثبات القيد بالظبط من الجامعه بس احنا عندنا في الجامعه بقلهم عايز شهاده علشان التجنيد وباخدها وبطلع علي مكتب التجنيد الي انا تابع ليه وبيشوف الباسبور وبياخد الشهاده الي جبتها من الجامعه وبتستني نص ساعه وبعدين بيطلعلك ورقه كدا متغلفه ببلستك صالحه لمده شهر من تاريخ استخرجها وبياخدوها منك في المطار في الجوازات هنا في مصر
لاكن حكايه شهاده تخركات دي اول مره اسمع عنها بصراحه
شهادة التحركات دي مش بيطلبوها الا في العباسية وخصوصا للطلاب اوقات الدراسة الي مسافريين لاهاليهم ..
انا رحت خلص الورق امبارح.
رحت مجمع التحرير عشان اطلع شهادة التحركات. في الاول قالولي محتاجين توكيل من والدي بعد كده قلتلهم اني طالب و مسافر ليه
قالي معاك شهادة قيد, اديتهاله بص عليها ورجعها تاني.
خد مني صورة من باسبور الوالد و صورة من بطاقتي الشخصية والطلب كتبته بابيانات والدي وامضائي باسمي تحت.
خدت الشهادة في خلال ساعتين. بس هو المفروض بتيجي تاني يوم تستلمها فا غالبا كان حظي كويس اني رحت الساعة 9.
و قالولي فعلا ان شهادة التحركات مطلوبة فقط لو مسافر اثناء الدراسة عشان انا مليش سفر اثناء الدراسة الا لو رايح لحد من اهلي, يعني مليش سفر سياحة و عشان كده كانو عايزين شهادة التحركات عشان يتأكدوا اني رايح لوالدي.
احب اشكر كل الي رد عليا في الموضوع.
جزاكم الله كل خير فعلا.
طب الحمدلله .. جزانا واياكم :) ..
-------------
تطلع تصريح السفر وتطمنا بقي :)
لو سمحت انا طالب وطلعت شهاده قيد من الجامعه وطلعت شهاده تحركات للاب ... الوقتي انا ينفع اطلع تصريح سفر مستعجل من حلميه الزيتون اللي هوا الخدمه المسائيه بالورق ده ولا لازم اروح تنظيم و اداره عشان اطلع تصريح السفر