جولف 4 موديل 2000 1800 سى سى

**debana911** · 07-06-2011 05:07 PM

انا عضو جديد هنا وكنت معايا جولف 2 بهدلت امى مصاريف وبعتها واودامى جولف 4 موديل 2000 1800 سى سى عامله 77 الف كم تانى يد الموتور متسقط بقاله 3 سنين راشه بره ودواخل فبريكه وهاخلص بـ 55 الف
وانا خايف من ان العربيه موديل 2000 وعامله 77 الف بس وكمان الموتور المتسقط وهل ده موتورها الاصلى يعنى هى بتنزل بموتور 1800 ولا 1400مع العلم انى ركبتها وسحبها جامد والعفشه جامده بس فى زنه كده فى الشكمان وعاوزه فرش بابين صاحبها بيقولى انهم بـ250 جنيه وبيقول ان قطع غيارها زى 128 الكلام ده صح ولا ايه المفروض اخلص فيها بعد 4 ايام ارجوكم ساعدونى انا مش عاوز اتعزب تانى بس بحب الجولف بصراحه
قلولى اشتريها ولا لا وصاحبها بيبعها لظروف

**ahmedtunning** · 07-06-2011 05:26 PM

اني مكنه اللي فيها و اقولك قطع غيارها موجوده ولا لا و الفرش النضيف مش اقل من 500 جنيه اسئل تاني بس العربيه اللي بيتسقطلها موتور بالنسبالي مش عيب بس لازم تكشف عليها تاني بالكمبيوتر هيقولك كل حاجة
وربنا يقدم اللي فيه الخير

**debana911** · 08-06-2011 09:36 AM

والله انا مش عارف المكنه انى واحده بس السعر كده كويس ولا ايه؟؟؟
ولمعلوماتك العفشه اللى فيها رياضيه والجنوط 16 جولف والعفشه نازله بيها على حد كلام المالك

والنبى ردو عليا

**أبو_حمزة** · 08-06-2011 10:18 AM

طب ما تاخدها تكشف عليها عند حد من المتخصصين و بما انك كان معاك جولف يبقى عارف الورش المتخصصة
بس رايي مدام تعبت فى العربية اللى فاتت يبقى العربية الجديدة لازم تنقيها رايقة ما فيهاش قلق كتير
دور شوية كمان و ها تلاقى ان شاء الله جولف بحالة احسن

**debana911** · 08-06-2011 03:00 PM

شكرا يا بوحمزه كلامك معقول بردو بس انا شايف انى مش هلاقى الفرصه دى تانى لانها رخيصه عن السوق والراجل مستعجل وانا بردو مش عاوز اتبهدل تانى ربنا يسترها بقى

**mohamed_reda** · 11-06-2011 06:32 PM

أكشف على كبس الموتور والحساسات بالكمبيوتر بناءا عليه استخير و اتوكل على الله ... خد بالك لو كبس الموتور ضعيف هتبهدلك وهتلاقيها بتاكل ويت و تحتاج تعملها سيرفيس كتير و بردو بيبان على صاحبها .. اقصد استعماله بيبان على شكله و طريقه كلامه معاك

**behman** · 11-06-2011 07:12 PM

اكشف عليها و لو كويسه اتوكل علي الله و خدها

**behman** · 11-06-2011 07:23 PM

مع ان 77 الف كم مش منطقي علي 2000 ... بس ممكن
و بالنسبه لقطع غيارها ... مش 128 طبعا ... وانت كنت راكب جولف 2 وعارف
و الموتور 1800 اي موديل فيه بيكون جامد جدا

**SYD** · 12-06-2011 12:57 PM

المشاركة الأصلية كتبت بواسطة behman

مع ان 77 الف كم مش منطقي علي 2000 ... بس ممكن
و بالنسبه لقطع غيارها ... مش 128 طبعا ... وانت كنت راكب جولف 2 وعارف
و الموتور 1800 اي موديل فيه بيكون جامد جدا

1111111111111+

بس انا بصراحة بفضل الموتور الفابريكة والي خلاه يفرم موتور الفابريكة في حوالي 7 سنين هيخليه يفرم موتور استيراد في 3 سنين

والله اعلم