ممكن إجابة عن خبرة لأختكم بونبونى ولكم الأجر والثواب عند الله

**Bony** · 25-04-2008 10:02 PM

سؤال مهم وأتمنى الإجابة عن خبرة

أجيب تيريوس ولا تويوتا آفانزا

الحقيقة أنا بميل للآفانزا لأنها يابانى

وكمان البادى مش عالى زى التيريوس وده يديها ثبات أكتر على ما أعتقد فمتتقلبش بسهولة

صحيح التيريوس 1.6 والآفانزا 1.5

بس أعتقد أن الماتورات اليابانى قوية بما يكفى علشان تستحمل التكييف

نسيت أقولكم إنى فى الحالتين هجيب مانيوال مش أتوماتيك

علشان أنا بعشق السواقة أولا

ثانياً السحب فى المانيوال أسرع وبالتالى العربية تاخد سرعتها أسرع
وده مفيد فى القيادة فى زحام القاهرة وتعرف تخلص نفسك

يارب حد يفيدنى ويقولى أنا صح ولا فى حاجة مخدتش بالى منها

المشكلة إنى ملقتش حد عنده شكوى من الآفانزا
أكثر من إن شنطتها صغيرة ودى حلها سهل

ولكن اللى قلقنى إنها مش موجودة كتير فى شوارع القاهرة

عكس التيريوس اللى إنتشرت وبنشوفها كتير

ياريت حد يكون إشتراها ويقول رأيه فيها وفى التوكيل علشان الصيانة
لأن توكيل التيريوس عبد اللطيف جميل مفيهوش كلام

وكمان يفيدنى عن الدفع فى الاثنين أمامى ولا خلفى

وبعد كل الكلام ده تيريوس ولا أفانزا؟؟؟؟

**معاذ الشرباصى** · 25-04-2008 10:29 PM

معلش تصحيح لبعض المعلومات

1- التريوس يابانى و الافانزا اندونيسى (تقريبا) بس الاكيد ان الافانزا مش يابانى

2- الافانزا فى منها 1300 و 1500 اما التريوس 1500 فقط

3- الافانزا تقفيلها فقير جدا جدا,اما التريوس فأحسن منها بمراحل

4- الافانزا ثباتها وحش, اما التريوس فهو جيد (على الاقل احسن من الافانزا طبعا)

5- الافانزا خلفى, اما التريوس فموجود منها خلفى و موجود منها دفع رباعى

طبعا لو فى مقارنة بين الاتنين, يبقى التريوس ببساطة تكتسح

**Hassan Khalil** · 26-04-2008 12:05 AM

المشاركة الأصلية كتبت بواسطة معاذ الشرباصى

معلش تصحيح لبعض المعلومات

1- التريوس يابانى و الافانزا اندونيسى (تقريبا) بس الاكيد ان الافانزا مش يابانى

2- الافانزا فى منها 1300 و 1500 اما التريوس 1500 فقط

3- الافانزا تقفيلها فقير جدا جدا,اما التريوس فأحسن منها بمراحل

4- الافانزا ثباتها وحش, اما التريوس فهو جيد (على الاقل احسن من الافانزا طبعا)

5- الافانزا خلفى, اما التريوس فموجود منها خلفى و موجود منها دفع رباعى

طبعا لو فى مقارنة بين الاتنين, يبقى التريوس ببساطة تكتسح

أفــاد و أجــاد :)

**crazylambada** · 26-04-2008 12:30 AM

و حاجة اخيرة
الزحام في القاهرة المناسب ليه الاوتوماتيك مش المانيوال
بس ممكن اسال حضرتك سؤال رخم
اشمعنى اخترتي العربيتين دول؟؟؟؟؟؟؟؟؟؟؟؟؟؟

**fahd_628** · 26-04-2008 12:34 AM

بصراحة الأفانزا سيئة جدا

انا رأى التيريوس تكتسح و على فكرة السواقة فى الزحام الأوتوماتيك اريح بكتييييييير

**mohamed ibiza** · 26-04-2008 12:48 AM

الافانزا لا تعرف معني الثبات نهائييييييييييييييييييييي يييييييييييييييييييي العربية دي الناس بتنخدع في مظهرها و حجمها لكن الحقيقة انها ثباتها تعبان جدا جدا جدا التريوس ثباتها احسن منها و الافانزا مش ياباني التريوس ياباني و 1500 مش 1600 و الافانزا و علي فكرة التريوس ثباتها احسن من الافانزا لكن برضه الثبات متوسط يعني مش عالي و التريوس ب 112 الف و118 الف و 132 الف انا رأيي تتكبري دماغك من العربيتين دول و تجيبي جين 2 احسن

Ibiiiiiiiiiiiiiiiiiiiiiiiiiiiiizzzzzzzzzzzzzzzzzaa aaaaaaaaaaaaaaaaaa For Ever

**Chicco** · 26-04-2008 12:55 AM

أولا أهلا و سهلا بحضرتك في المنتدى و نتمني دوام المشاركة إن شاء الله .....لو ممكن حضرتك تقولي متطلباتك في السيارة إيه و ساعتها نقدر نقول بدائل أحسن ...

**Bony** · 26-04-2008 12:57 AM

المشاركة الأصلية كتبت بواسطة crazylambada

و حاجة اخيرة
الزحام في القاهرة المناسب ليه الاوتوماتيك مش المانيوال
بس ممكن اسال حضرتك سؤال رخم
اشمعنى اخترتي العربيتين دول؟؟؟؟؟؟؟؟؟؟؟؟؟؟

إسمح لى أعترض

السواقة فى زحام القاهرة مناسب ليه الأوتوماتيك لتوفير الجهد والقيادة فى خط مستقيم
لكن مناسب ليه المانيول لتوفير الوقت والقيادة فى الفراغات اللى بيتيحها لك الزحام
لأن المانيوال سحبه أسرع وبالتالى تقدر العربية تاخد سرعتها على طول فتسد معاك
وصدقنى ده عن تجربة ;)

ليه إخترت العربيتين دول سؤال مش رخم
بس أنا بحب الاستايل ده من العربيات
يمكن علشان أول عربية ركبتها كانت عربية جيب:o
وحالياً معايا السبورتج وهى 4×4

عموماً هى صراحة كانت المفاضلة بينهم وبين البيجو 207
وأنا كنت برجح الـ 207 لأنى بعشق البيجو لأنها سريعة وقوية وسحبها حلو
يعنى عربية بجد وكمان تناسب أسلوبى فى السواقة
بس بعد العربيات العالية بحس إنى بسوق من على الأرض

ولما شوفت الأفانزا عجبتنى من الخارج سواء ألوانها أو شكلها مبهر
بس الصراحة مجربتش أسوقها ولا شوفت تقفيلها من الداخل
وكمان كنت فاكراها يابانى وأعرف إنها دفع خلفى
فقولت دى تبقى عربية جامدة جداً وتستحملنى:o

بس بعد الكلام اللى سمعته منكم والمداخلات المقنعة
أعتقد إنى غيرت رأيى

بس لسة مش عارفة برضه مين فيهم يعنى 207 ولا تيريوس

ولا حاجة تالتة خالص الله أعلم

**SEATLOVER** · 26-04-2008 01:06 AM

الافانزا عربية ممتازة و ثباتها كويس جداً بعد ال 160 وكمان فيها كرسيين زيادة
وكفاية انها تحمل اسم تويوتا

حاول تجربيها الاول و خصوصاً على سرعات عالية .... ممكن تكون هى الحل :)

**Bony** · 26-04-2008 01:07 AM

المشاركة الأصلية كتبت بواسطة معاذ الشرباصى

معلش تصحيح لبعض المعلومات

1- التريوس يابانى و الافانزا اندونيسى (تقريبا) بس الاكيد ان الافانزا مش يابانى

2- الافانزا فى منها 1300 و 1500 اما التريوس 1500 فقط

3- الافانزا تقفيلها فقير جدا جدا,اما التريوس فأحسن منها بمراحل

4- الافانزا ثباتها وحش, اما التريوس فهو جيد (على الاقل احسن من الافانزا طبعا)

5- الافانزا خلفى, اما التريوس فموجود منها خلفى و موجود منها دفع رباعى

طبعا لو فى مقارنة بين الاتنين, يبقى التريوس ببساطة تكتسح

الحقيقة أفادنى ردك كتير
وأنا كنت بتكلم على الأفانزا 1500 وأنا شوفتها من الخارج فقط والحق يقال مبهرة
سواء شكل أو ألوان بس واضح إن المظاهر خادعة جداً
يعنى خدعتنى لدرجة إنى كنت هشتريها وأنا أصلا مش محتاجة الكنبة الإضافية أصلا

بس بعد المداخلة الوافية دى أعتقد إنى غيرت رأيى فيها

جزاك الله كل خير أخى العزيز