مشكله فاميه وارجو منكم الحل
سلام عليكم
اخواني انا كنت عايز احكي موقف واعرف رائكم فيه ضروري
الاول انا طالب في كليه طب
والمشكله تتعلق بالفاميه وانا حاطه مش منظر حاطه علشان الشمس لاني عامل عمليه في المخ
المهم بقي
معدي امبارح بليل الساعه 8 قدام اللجنه الي عند اول فيصل
وقفني عسكري وكان في ظباط كلهم بنجمه ونجميت بس عيال شكلهم عيال اساسا ومش ثابتين كده زي الي كنا نعرفه عنهم
المهم قالي الرخص قولتله ليه قالي علشان الفاميه قالي الرخص لو سمحت اديتهاله قالي طيب علي جنب بقي وتعالي هنسحب رخصه العربيه
المهم ركنت ونزلت وقولتله يعني انا حاطه علشان عامل عمليه في المخ ومعنتش مستحمل الشمس وكذا مره يغمي عليا وانا سايق بسبب الشمس
للعلم الشمس للي عامل عمليه في المخ زي الي عنده جرح وبيحط عليه شطه ده بس للتقريب والتوضيح وربنا يحفظ الجميع يارب من اي مرض
المهم قالي مينفعشي والرخصه هاتتسحب يا كده يا تدفع 40 جنيه
المهم دفعتهم وخت الوصل وانا مخنوق جدا ومضايق من الموقف
المهم لما روحت ببص في الورقه الي ادهالي لاقيته كاتب مخالفه وقوف في المخالف وفك كلابشات
طيب ازاي مش المفروض ان المخالفه تبقي زجاج ملون
وازاي اساسا ياخد فلوس مش الوزير قايل مفيش مخالفات فوريه << ولا خلاص رجعت تاني وانا معرفشي
انا طبعا كنت عايز ادفع الفلوس وامشي لاني مكنتش نمت يومين ومرهق وراجع من الامتحان وجايب اخري يعني فده الي مخلاش الكلام يجي في بالي ومشيت علي طول
مستني ردكم واعرف ايه الحل بقي
لانه قالي ركب يابيه ستاير بيطلع بيها رخصه عادي
مع العلم اني في الستاير فعلا مش بشوف نهائئ بقي وفي الفاميه بشوف وانا مركب الدارك لان دي الي بتمنع الشمس بس مش منعه الرويه بس باليل بشوف عادي بنزل الازاز وبشوف
علي فكره انا حاطط الفاميه علي الازاز وعلي الابواب كلها لكن في الخلف لا مش حاطط حاجه
وحتي هو قالي طول ما انت ماشي ومحدش بيكلمك بيكتبك مخالفه وانت بتعدي علي الكمين ولما تروح تجدد الرخصه هاتلاقيك عندك مخالفات كتيره
مع اني عمري ما عديت علي كمين ولاقيت حد ماسك ورقه اساسا وبيكتب حاجه
ايه الحل بقي مع العلم بردوا اني مش هقدر اشيله لان معني اني اشيل عازل للشمس اني هاموت بمعني الكلمه كده
ولو حد هايقول امال بتمشي في الشارع ازاي هاقوله بمشي بشمسيه لان فعلا الشمس مشكله ليا