الموضوع: 7 نصائح لكل فتاة تكرة الرجال ج 1

و اكتبها تحت عنوان: "ازاى تقرفيه وتطلعى عينه علشان يعرف قيمتك"
الذى دفعنى لكتابة هذه النصائح هو ايمانى الراسخ بدور المرأة فى الحياة و ما لاحظته فى الآونة الأخيرة من تقاعس بعض افراد جنسنا النسائى عن القيام بدورنا الاساسى فى هذه الحياة الامر الذى ادى الى انتشار ظاهرة غريبه وغير مقبولة فى مجتمعنا الشرقى الا وهى اننى – وبكل اسف - اصبحت ارى بعض الرجال مبتسمين ويشعرون بالسعادة
ان دورنا فى هذة الحياة ليس تربية الاطفال بل هو تربية آباء الاطفال وليس رعاية المنزل بل رعاية مصالحنا وحقوقنا الفردية و ليس نظافة بيوتهم وانما تنظيف جيوبهم وليس طهى الطعام بل طهيهم هم على نار باردة, ليست مسؤليتنا غسيل الملابس يكفينا ان نغسل امخاخهم
للاسف تناست قلة منا هذة الادوار وارتضت لبنات جنسها- حين ارتضت لنفسها- الذل والهوان وخدمة ذلك المخلوق ذو الشارب , ربما كان هذا الضعف مقبولا فى العصور القديمة والرجعية والمتأخرة اما اليوم فلست ارى مبررا لهذا اطلاقا ولست استطيع ان التمس لاى واحدة منهن عذرا
فنحن الان لنا حق ان نخلعهم كما كان لهم فى الماضى حق ان يطلقوننا , ولنا الان ميزة حضانة ابنائهم وان نحرمهم من رؤية اطفالهم وان نذلهم حتى يروا اطفالهم مع احتفاظنا بحق تقرير متى واين ولكم دقيقة يحق لهم رؤية الاطفال
نحن الان الجنس الارقى... نستطيع ان نعمل فى اى مجال بل لنا الافضلية فى كل المجالات ونُعامل فى كل مجالات العمل معاملة خاصة.....فلنا ان نعمل اقل وان نحتفظ فى نفس الوقت بنفس المميزات والمرتبات ان لم نستطع ان ننال اكثر منهم...فنحن فى هذا الموضع نستطيع ان ناخذ ماليس من حقنا عن طريق ادعاء ضعفنا الذى نستطيع اظهارة او اخفاؤة حسبما نشتهى
و لاننا نتستطيع ان نعمل فى اى مكان فقد اصبحنا نمتلك المال... ذلك الشىء الذى اخضع اسلافنا مدة طويلة لسيطرة وجبروت الرجل, نحن الان نملك من المال ما نستطيع بة ان نمتلك الرجل نفسه
نستطيع ان نعيش بدون الرجل....المال اصبح ملكنا..... والكلمات الرقيقة نستطيع استجلابها ببعض المكياج او بعض الملابس او........ اترك لكن فهم الباقى, واعذرننى ان كتمت بعض البديهيات التى نعلمها انا وانتى فانا لا اضمن ان يتم اختراق جروبنا ببعض العناصر الرجالية بما يكشف بعض اسلحتنا و وسائلنا التى نحسن استخدامها
و انطلاقا من عقيدتى التى لا تتزحزح باهمية المرأة واهمية قيامها بالدور المنوط بها للحفاظ على كرامة و استعلاء بنات جنسها و املا ان ادل اخواتى من نون النسوة على طريق الحقيقة....فقد قررت ان ادلكن على الطريق الاسهل التى تستطيعن بها ان تنغصى عليه حياته و ساحاول تنويع الوسائل وكتابة كل ما اعرفه منها بما يساعد كل واحدة منكن ان تختار ما يناسبها و ان كنت اتمنى ان تتفنن كل واحدة منا فى ابتكار كل طريقة لتعذيب و تكدير ذلك الكائن الذى يزاحمنا على كوكبتنا الارض
اولا: نصائح للبنت المخطوبة:
لاحظى اختى المخطوبة انك الان تمتلكين اول رجل فى حياتك وانتى الان فى مرحلة تشكيله وتطويعه, و قبل ان تبدأى معه فى مراحل تربيته وتطليع عينه قد يساعدك امر من اثنين: ان كان ابوك واخوك مطلعين عينك ومطهأينك فتذكرى انه رجل مثلهم وان القدر ساق اليك الفرصه لتردى لذلك الجنس ما قدموه لك
اما ان كان الاب حنون والاخ مريح.... فتذكرى انهم اولى بك من هذا الغريب وانه جاء لياخذك من حنانهم لقسوته ومن مملكتهم لخدمته... فعليكى ان تنتقمى لنفسك منه... وحاولى تتغدى بيه قبل ما يتعشى بيكى
لكن دائما كونى حريصه ان تحافظى علية حتى كتب الكتاب فهذه الورقه هى بمثابة صك عبوديته عندنا, لهذا لا مانع ان تتنازلى احيانا من اجل الغايه الكبرى.... ان تمتلكيه, وان حدث وافلت منكى احدهم وفسخ ارتباطه بكى فيكفيكى انك حاولتى وتأكدى انكى ستكونى اما اضعتى عليه بعض الوقت وبعض المال او اذقتيه مرارة التجربة..... المهم انك اذا شعرتى انه يريد الخلاص فاحرصى ان يكون القرار من ناحيته وليس منكى لتحتفظى انتى بالغنائم- اعنى الشبكة والهدايا- ولتحافظى دوما على شكلك كمظلومة ومجنى عليها..... ولا تقلقى سيقول ابيكى وامك واخوتك وكل من يعرفونك انك انتى من تركتيه لانه سىء الاخلاق او مش راجل..او او او......الاسباب كثيرة فلا داعى للقلق.
نبدأ معاً والله المستعان فى ترشيح بعض الطرق لتنغيص حياة الرجل فى مرحلة الخطوبة:
1- لا تقبلى باى شبكة, لابد ان تشترى شيئا يليق بكى كأنثى... ولا تترددى ان تختارى من المحابس اثقلها ومن الخواتم اغلاها... و حاولى تاخدى سلسة او انسيال مع كام غويشة.... و يكونوا تقال قد ما تقدرى.... هما دول الحاجات اللى ممكن تطلعى بيها من الخطوبة اساسا لو الموضوع اتفشكل..... وكونى دوما حريصه ان تظهرى له انك اخترتى حاجات رمزيه لانك شرياه... اولا علشان تحسريه على نفسه انه مش قادر يجيب لك حاجه عليها القيمة وثانيا علشان ما يفهمش بدرى ان عنيكى على جيبه.
2- لو ابوكى اللى هايدفع تكاليف حفلة الخطوبة... قولى للملحوس خطيبك ان مالوش لازمة نعمل هيصه وان هو كفايه عليكى و....و..... اى كلام كده من النوع ده, اما لو هو اللى هايدفع التكاليف فكونى رقيقة اوى وانتى بتقولى له ان انتى نفسك فى حفلة خطوبه زى بتاعت رانيا بنت خالتك...... وطبعا ما تنسيش تقولى له مش مشكله لو معهوش فلوس ومش قادر يعملك حفلة خطوبه تليق بيكم انتم الاتنين...... وكأن انتى بتطلبى كده علشانه هو مش علشانك..... لو قدر يتصرف ويعمل لك الحفلة اللى انتى عايزاها تبقى ضربتى 3 عصافير بحجر واحد: الاول انك اتعمل حفلة تتباهى بيها ادام صحباتك..... والتانى انك دفعتيه دم قلبه وحرقتى دمى ادام كل قرش هايدفعه وخليكى متاكده ان دمه هايتحرق.... والتالت تبقى كده بداتى تعوديه انه يعملك اللى انتى عايزاه وجوزك على ما تربيه وتعلميه........... اما لو المنحوس مش عاه فلوس ومعملش الحفله اهو بردك تبقى كسبتى عليه بنط ان انتى عزراه وشرياه وبتضحى علشانه بس ما تنسيش كل شويه تفكريه بالتضحية العظيمه دى علشان يفضل دمه محروق وحاسس بالعجز والفقر ويفضل شايل جميلك على اللى تتقطع.... برافو عليكى...اصدى راسه طبعا....
3- كنت هانسى اقولك تاخدى بالك وانتى بتنقى الفستان اللى هاتلبسيه فى حفلة الخطوبه لازم تاخدى بالك من كام حاجه...... اولا لو هو متدين اختارى فستان مش حشم وسيبيه يتحايل عليكى تختارى غيره ولو العكس يبقى العكس بردك..... ثانيا لازم تلفوا على اكبر عدد ممكن من المحلات لحد ما تختارى فستان.... اقطعى نَـفَـسُه واوجعى قلبه.... وطبعا اوعى يعجبك اى فستان رخيص حتى لو شيك لازم من اولها كده تعوديه ان كل حجاتك غاليه...ايوه مانتى متعوده على كده فى بيت بابى...........
4- اللى قلناه فى الفستان ها نطبقه هو هو فى الكوافير بس ياريت تضيفى كمان انك تختارى كوافير بعيد شويتين عن مكان الحفلة وطبعا يا ريت يكون فى مكان مدخله صعب شويه علشان يطلع عينه وهو جاى ياخدك من هناك وكمان وهو رايح يوديكى...... ولو تعرفى تخلى البنت اللى بتعملك الكوافير تاخرك حبتين بحيث تلطعيه برده هو واللى معاه لما تخرجى تبقى بنت تمام .......
5- نيجى بقى للحفلة..... اولا ممنوع يمسك ايدك الا بعد ما يكتب الكتاب....حتى لو ايدك او ايده مسكت ايد المتظاهرين بتوع جمعة الغضب كلهم..ممنوع يلمس ايدك..... بس علشان يعرف قيمتك ويفضل حاسس انه مش طايلك..... اما لو هو اصلا متدين ومش هايحاول يمسك ايدك....يبقى دورك انك تقعدى تقولى له انك بتحلمى باليوم اللى ايدك تحضن ايدة...بس فى الحلال طبعا... الغرض بس ان احنا نحرق دمه اد مانقدر ..........
6- ما تنسيش فى الحفلة تشكرى له فى كل اهله...و تقولى فيهم شعر لو بتعرفى وعامليهم كويس اوى اوى ادامه..... انما من وراه بالجزمه وما تكبريش حد....... بس ده طبعا بعد ما تضمنيه فى البوك بتاعك....يا اما تاجلى النقطه دى بعد كتب الكتاب.......



7- كونى حريصه فى اول الخطوبه انه كل ما يزركم ياكل عندكو.. علشان تبقى تعيريه بعد كده ان لحم كتافه من خير مامتك... وانه كان جعان وانتوا اللى بتأكلوه وانه اكل فى بيت مامتك اللى ما سمعش عنه فى بيت ابوه.. انا باقول مامتك باعتبارها من جنسنا وعلشان تبقى المرارة اكبر.... بس بردك الاكل له نظام علشان يبقى بصحيح بالسم الهارى.....خدى عندك:
· كترى فى العزومات من الاكل اللى ما يعرفش ياكله او لو أكله يبهدل نفسه..... مثلا السمك المقلى- بس تسيبيه سليم مش جزل- بحيث لو اكله ايده تتزفر وريحته تفضل معاه لحد ما يروح يا اما ما ياكلش والاكل قدامه بس تتحسب عليه اكله.... وما تقلقيش على نفسك... لما يغور فى داهيه ابقى كلى زى مانتى عايزه
· اوعى تعملى اكل هو بيحبه ابدا..... وكترى من الاصناف اللى بتخلى النفس تجزع سواء اللى سمنتها كتير او التقيله على المعده... وانسى بقى انك تقولى ان الاكل من عمايل ايدك والكلام اللى كان ايام ايام العبوديه ده...... النهارده لازم تقولى انك مالحقتيش تعملى الاكل معاهم لانك جيتى من الشغل متاخرة او لانك بتفضَّلى تشترى الاكل جاهز من بره اسرع..... او انك اصلا مش بتعرفى تطبخى... والهدف مش اى حاجه غير انك تعرفيه من اولها انك مش ملزمه تطبخى لجنابه ولا تعملى اكل من اصله........ وجوزك على ما تعوديه
· بصى على اسنانه... لو مش سليمه...يبقى لازم اللحمه تبقى نص سوه علشان ما يعرفش ياكل..... ولو سنانه متفرقه يبقى كترى الفراخ و سويها اوى..... علشان ترشق فى سنانه ويفضل قاعد قرفان... بس اوعى تدى له فرصه وتسيبيه لوحده لاينضفها ومحدش شايفه... وطبعا اوعى تغلطى وتدى له عود خله......
· كترى من السلطات على الاكل علشان يبقى مرغم انه ياكل منها وبالتالى ما يستمتعش بباقى الاكل... الا لو كان خطيبك مليان و وزنه زيادة... كترى من النشويات وشيلى السلطات خالص..... وما تنسيش تقولى له انه لو خس 2 كيلو يبقى جسمه مثالى اكتر..........
· نيجى للفاكهه......افضل الفواكه هيا المانجو ثم الخوخ...... علشان ما يعرفش ياكلها وطبعا لازم ياكل والا يبقى مش جنتل...و انتى كمان لازم تفضلى تقعدى تسأليه.... ايه مش بتحب المانجه وللا ايه علشان يضطر ياكل ويبقى شكله مسخرة اديكى تضحكى شويه عليه ...او يتكسف ياكل وانتى تعملى زعلانه.....و بردك انتى ابقى كلى لما هو ينكشح...
· بالنسبه للمشروبات...... انا بافضل تعملى له نسكافية وتقللى السكر لو بيحب الحاجه مسكرة او تعمليه معسل لو بيشرب الحاجه ناقصه سكر....... وطبعا المبرر موجود...اصلها لازم تبقى مش مسكره اوى علشان تحس بطعم النسكافية, او اصلها لازم تبقى زياده سكر علشان تغطى على مرارة النسكافية...... المهم تحسسيه انه عمره ما شرب الحاجات دى... وان لولاكى كان هايفضل طول عمره فلاح .........
· يا ريت بمناسبة المشروبات كمان تلاحظى النقط اللى جايه: لازم الشاى لو حصل وعملتوه تديهولوه بارد شويه يعنى سيبيه شويه قبل ما تقدميه له..... و اقعدى كلميه شويه او اساليه سؤال يحتاج شوية وقت انه يجاوب عليه وافضلى كلميه لحد الشاى ما يبرد..... كتير من الرجاله ما بتحسش بطعم الشاى الا وهو سخن.... فلازم تحرميه من المتعه دى........ اما لو كان بيشربه بارد او لاحظتى انه بيسيب الشاى لما يبرد..... فدورك بقى انك تقعدى تساليه ايه رايك فى الشاى؟... اجيب لك سكر؟..... المهم تخليه يشربه وهو سخن علشان يتلسوع وما يقدرش يفتح بقه... وبكده تبقى علمتى جوزك من ايام الخطوبه...علمتيه ضبط النفس معاكى... علشان ما يخدش عليكى ويقعد يقول حلو و وحش..... ياكل وهو ساكت ويشرب وينقطنا بسكاته......
· اول ما ييجى عندكم اهريه مشاريب... مش محبه لا سمح الله... لكن علشان بطنه تتملى وتتنفخ ويفضل طول الليل منفوخ.... ويا ريت تختارى مشاريب مالهاش دعوة ببعض.... مثلا شاى وبعديه ليمون وبعديهم حاجه ساقعه بيبس , وبعدين عصير فراوله...... او اعملى له كوكتيل و اوعى تنسى وتغسلى ايدك قبل ما تعملى العصير...... ولو جاله تسمم تانى يوم اوعى تفوتى الفرصه..... احرقى دمه بان السبب انه كال حاجه مش متعود عليها او انه كتتر فى الاكل اوى على غير ما هو متعود..... او انه لما روح اكل فى بيتهم حاجه بايظه....

مقالة اكثر من رائعة .. شكرا لك
في انتظار باقي الخطة ما بعد الزواج و تفاصيل اكتر