الموضوع: تعالوا نعرف مميزات و عيوب السوزوكي ألتو

بسم الله الرحمن الرحيم
السلام عليكم و رحمة الله و بركاته

انهاردة يا شباب هقدملكم جزء جديد من سلسلة تعالوا نعرف
لكن المرة ديه في قسم السوزوكي مش القسم التعليمي
و المرة ديه هترتاحوا من ضميري لأنه منمش من امبارح و هيس و نام

و نظرا لأني ملقتش موضوع يضم مميزات و عيوب الالتو
فهتكلم عن مميزات و عيوب السوزوكي التو 800 سي سي بشكل مفصل شوية زي تقرير من وجهة نظري
و للأسف معرفتش اصور العربية و لو تابعتوا السلسلة من اولها هتعرفوا السبب
فاضطريت استعين بصور كانت موجودة في القسم عضو نزلها في موضوع اسمه صور الالتو

نبتدي ع بركة الله

اولا :الحجم

1-خارجيا


حجم الالتو يعتبر متوسط صغير و اكبر من الماروتي شوية
و طبعا بيأهلها انها تاخد غرز وسط العربيات و تقدر تركن في اماكن صغيرة زي الماروتي



2-داخليا



السواق و الكرسي اللي جنبه القعدة كويسة مهياش واسعة اوي و لا ضيقة اوي
لكن لو الشخص ممتلئ ممكن يتضايق من علبة حزام الامان لأنها مدمجة بالكرسي غير كده القعدة عادية

الكنبة ورا تتسع لشخصين او 3 مزنوقين و لو رفيعين اوي يقعدوا عادي
لكن لو السواق او اللي جنبه رجعوا ضهر الكراسي اوي اللي ورا هيضايق اوي

و عامة العربية مخصصة لنقل 4 اشخاص
و انا عن نفسي ركبت 2 جنبي و 4 ورا يعني العربية بسم الله ما شاء الله كانت شايلة 7 بيا لكن كانت ورا نازلة
لأن اخرها تشيل ورا 3

الشنطة ورا تحت الفرش الاستبن و الكوريك الفبريكة و العدة
فوق الفرش الحجم يعتبر كويس مش وحش


--------------------------------------------------------------------------

ثانيا : الشكل


1- خارجيا







شكل العربية جميل يشبه الماروتي الي حدا كبيير لكن مع تعديلات في الفوانيس و الحدود و الزوايا و الحجم خلوها تبان بشكلها الجميل ده لكن الاستيل شبيه بالماروتي جداا

مكان الاشاارات ورا و قدام كويس جدا بحيث ان محدش يبقي عنده حجة
اللي ورا يشوف و اللي في الجنب يشوف و اللي قدام يشوف

تقسيمة الاكصدام حلوة مش واحشة بس اتخيل لو كانت بفوجات لكن عامة متناسق مع شكل العربية

2-داخليا







-بالنسبة خامات التابلوه و الابواب واحدة و بصراحة مش اد كده تعتبر عادية لكن الجزء الاسود اللي في الوسط مديها شكل حلو

- تقسيمة الطابلوه انا شايف انها حلوة و الحاجات المهمة في متناول اليد زي مثلا زرار الانذار الواحد ساعات بيضطر يدوس عليه فجأة فهو موجود في مكان كويس جدا ع عكس مثلا الماروتي في العلبة بتاعت الطارة و ممكن تعاكس اللي سايق

-كذلك زرار الحرارة للازاز اللي ورا جنب الانذار
و في زرارين تانين مقفولين و ينفعوا لو حد عايز يضيف حاجة للعربية تشتغل بزرار

- تحتهم الزرار الخاصة بالتهوية او التكييف

-ثم الكاسيت

- م الدرج المفتوح و اللي شايف ان مكانه مثالي ان اي حد يحط فيه موبيل او محفظة و مش هيكون ظاهر و بعيد عن الشباك

- ثم الطفاية و الولاعة

ع شمال السواق الزرار الخاص بمستوي الاضاءة يعني لو عايز اضاءة الفانوس تمتد لمسافة بعيدة او تقل المسافة

يعني انا شايف انهم قسموا التابلوه من الاهم للمهم فالاقل اهمية

درج الطابلوه حجمه مش وحش انا شايل فيه بلاوي من اول اعلانات و شرايط لحد تصريح دخول الجامعة

توزع فتحات التهوية عادية يعني واحد لكل كرسي قدام في الجنب ناحية الازاز غير الفتحة اللي عند الازاز قدام بطول الطابلوه
و اتنين في الوسط للورا لكن ممكن يتوجهوا للقاعدين قدام برده
و فتحات تهوية تحت الطابلوه

يعني شايف انهم مش عايزين مكان قدام الا لما يكون فيه تهوية للتكييف او المروحة

تحت مكان الطفاية حامل كوبيات و تقدر تحط حاجتين و ورا مكان فاضي تحط فيه اي حاجة شرايط و غيره

الفتيس مكانه يعتبر عادي و كنت اتمني انه يكون اعلي و اقرب شوية زي اللانسر كده بس كويس مش وحش يعني

الهاند بريك في مستوي كويس لكن ممكن تبقي مشكلة شوية لو حبيت تحط مسند بين الكرسيين كبيير
لكن لو اللي حجمه صغير مش هيبقي فيه اي مشكلة

الكنبة ورا متقسمة بنسبة 1:2 و ناس شايفنها مفيدة و ناس شايفنها ملهاش لازمة

انا شايف انها كويسة انك ممكت تقفل مكان اتنين و تحط حاجات و تسيب مكان لشخص يقعد او العكس تقفل اللي مكان شخص و تخلي اتنين يقعدوا
لكن مشكلتها انك هتبقي محتاج تفصلها فرش مخصوص او تحط فرش عادي و تتعامل معاها ع انها قطعة واحدة بتتقفل و تفتح

مسند الراس في الكنبة فكرته حلوة بحيث تناسب اي شخص يقعد في العربية يعني لو قصير او متوسط او طويل يقدر يغير وضع المسند زي ما يحب
لكن عيبه انه لو اتفتح لاخره هيضايق السواق شوية انه يبص وراه

بالنسبة لحزام الامان ورا الحزام بيطلع من الشنطة ع جسم العربية اللي هي متعلقة فيه ع الكنبة
و كنت افضل انها تكون من الشنطة ع الكرسي عالطول زي مثلا حزام الامان اللي بيكون في العربيات الكابورليه شماعة الحزام مدمجة بالكرسي

الرف بتاع الشنطة حجمه كويس لسماعتين صب

الابواب اللي قدام فيهم زي جيب تقدر تحط فيه اي حاجة خفيفة مثلا جرايد او فوطة او سفنجة الحاجات الخفيفة ديه

العربية كلها مفيهاش غير مسند واحد لتعليق الايد اللي بيبقي فوق الشباك و مكانه الشباك بتاع الكراسي اللي جنب السواق

مقبض فتح البنزين تحت كرسي السواق ع الشمال

مقبض فتح الكبوت في التابلوه ع الشمال تحت

تقدر تتحكم في مرايات الجنبين من جوة

الازاز الخلفي بينزل 3\4 و ده تقريبا لأن الباب حجمه مش كبيير فالازاز مينفعش ينزل كله

العدادات شكلها بسيطة جداا و ممكن لو حد عايز يفنن و يركب ورق عدادات يركب

لمبة الصالون في الوسط بين الشماستين و سهلة الفتح لأنها كبس

في تناسق في الالوان بشكل عام

لكن الاضاءة بتاعت الطابلوه و العدادات الاضاءة الحمرا العادية

بالنسبة لحوض العربية كل حاجة ظاهرة و سهل ان اي حد يشتغل فيها مش معقدة يعني و لازم الواحد يقعد يلف و يدور حوالين العربية عشان يطلع حاجة

و عامة انا شايف ان العربية تصميمها بسيط في كل حاجة يعني اي حد يعمل فيها اي حاجة بسهولة
--------------------------------------------------------------------------

ثالثا : البدن
للاسف الصاج ضعيف الي حدا ما
و كله كوم و الاكصدامات الفيبر ديه كوم

--------------------------------------------------------------------------

رابعا : الاداء

العربية في طلعتها بحس انها عايزة تجري الي حدا ما
وصلت بيها لحد 130 و مرضتش اقرص عليها اكتر من كده لأنها ابتدت تهدي في السحب
متنسوش انها 800 سي سي
زميلي جاب بعربيته برده التو 800 سي سي 150 و مازدتش معاه عن كده
اعتقد سرعة كويسة بالنسبة لعربية 800 سي سي و بالحجم ده
و الموضوع 12 صمام ( اقنعني ههههه )

صوت الموتور يعتبر عادي لكن بيزيد مع زيادة سرعتك

الدريكسيون ناعم كأنه باور و ع السرعات بعد الـ100 بيفضل محتفظ بثباته

عفشة العربية بسم الله ما شاء الله حلوة مع المتابعة الدائمة لتربيط العفشة

الفرامل كويسة

العربية ثباتها لحد سرعة 130 حلو و مفيش اي مشاكل

العربية كويسة في المطبات الغلسة لكن لو انت محمل ورا ممكن تحك في المطبات الغلسة لكن العادية مفيش مشاكل

العربية في الحمولات العادية بتكون كويسة مفيش مشاكل
تبتدي الحمولة تزيد السحب بيقل شوية نظرا للحمولة
و العربية بتنزل من ورا لو الحمولة اكتر من اللازم

كعادة الياباني الحرارة ثابتة

استهلاك البنزين عادي لتر كل 15-20 كيلو ع حسب طبيعة المكان و سواقتي و العربية طبعا انجيكشن

رشاشات المية بتوزع المية كويس ع الازاز

--------------------------------------------------------------------------

خامسا : خلاصة العيوب

-قطع الغيار قليلة شوية و الي حدا ما سعرها عالي

-الصاج ضعيف الي حدا ما زي عربيات كتيير

-مفيش عداد ار بي ام ( لكن ممكن انك تجيب واحد و تركبه )

-الاكصدامات بتاعت العربية فيبر و كنت بفكر لو ممكن ندعه من جوة بحاجة بحيث يستحمل الخبطات كنت سمعت ان في فووم بيتصب و الله اعلم
العربيات اللي مش فول اوبشن تلاقي الاكصدام اسود غير لون العربية هو ساعات بيبق لايق لكن انا شايف ان المفروض العربية تنزل كلها لون واحد بيحسسوني انهم عايزين يعلموا الناس اللي في الشارع
بس ممكن الواحد يروح يرشها لكن لو فكر يبيعها هتنزل معاه في السعر شوية عشان النا سهتقولك عامل حادثة عالطول هههه

- لو في الارض فتحات او نقر جامدة او خدت مطب جامد اللي قاعد ورا هيزعل اوي يعني بيحس باي حاجة لكن اللي قدام عادي

- احيانا بيكون في عضة خفيفة جدا في الفتيس لكن نادرا ما تحصل معايا

يعني زي ما شوفتوا كلها عيوب ليها حلول
ماعدا موضوع قطع الغيار

لكن هي كعربية في الفئة بتاعتها حلوة
و هي مناسبة لشباب او اسرة مكونة من 4 افراد 5 بالكتييرر اوووي
طول مانت محافظ ع العربية ديه هتفضل شغالة معاك تمام و مش هتتعبك ابدا

العربية لما بتتظبط شكلها بيبقي حلو نظرا لأنها شبابي

باقي المميزات قولتها من خلال الموضوع

و اتمني ان يكون الشرح واضح

و بالتوفيق للجميع ان شاء الله

الموضوع غير منقول
و هو مجهود شخصي