وسائل الأمان فى النيسان الصنى هى سر تفوقها
اخوانى الكرام
بتختلف نظرة كل واحد فينا للعربية اللى عاوز يركبها والإمكانيات اللى هو عاوزها تتوفر فيها وده شىء طبيعى لكن فيه نظرة كانت غايبة عن اذهاننا جميعا كمصريين لفترات طويلة وهى عدم التقدير لوسائل الأمان الموجودة فى العربية وطبعا الحذر لا يمنع القدر لكن احنا مأمورين بالأخذ بالأسباب ... وعشان كدة شركات كتير كورية وصينية وشركات اخرى كتير بتهمل وسائل الأمان (اللى هى سعرها بالفعل غالى بالنسبة لمكونات العربية) عشان ترخص فى تمن العربية الإجمالى وبتبعتلنا نسخ فى مصر اقل وصف نقدر نوصفه بيها انها (فاضيييييية ومش امنة) وانا مش عاوز ادى امثلة بعربيات كورى رهيبة الشكل وعاملة زى لعب الأطفال وسفن الفضاء ومفيهاش حتى ايرباج واحدة. وعشان كدة حبيت اتكلم معاكم فى العربية المحترمة اللى انا بعد دراسة استقريت عليها وهى نيسان صنى وعوامل الأمان فيها:
عوامل الأمان بينقسم ل عوامل رئيسية وانا هحاول اشرح كل واحد منهم على قد ما اقدر:
1. القدرة على السيطرة على السيارة
وده فى نيسان بيتحقق عن طريق توفر 3 انواع من انظمة الفرامل المتميزة واللى بتضاهى بيها نيسان ارقى السيارات من الفئات المتوسطةوالكبيرة وهى
- ABS (Anti Blocking System او مانع الإنزلاق واللى بيدى قدرة عالية على المناورة فى الأماكن الزلقة عن طريق الضغط المتذبذب للفرامل على الطنابير عشان مايسمحش ان العربية تتزحلق فى اتجاه مستقيم ممكن يسبب فى اخطار على العربية وعلى المارة
-EBD (Electric Brake Force Distribution) وده نظام بيدعم التوزيع المتساوى لقوة الفرامل على العجل كله بالتساوى عشان الفرملة يكون ليها اكبر واسرع تأثير لوقف العربية فى اقصر مسافة
-BA (Brake Assist وده نظام متطور جدا وفيه تكنولوجيا بتخلى الضغط على البدال الفجائى فى المواقف الفجائية بعد ضغطة معينة ينتج عنه قوة اكبر للفرامل عن القوة اللى المفروض تنتج فى حالة الضغط العادى عشان يلحقك فى المواقف المفاجئة والحرجة
2. الوضوح التام للطريق والعدادات وده ناتج عن عدادات واضحة وفوانيس هالوجين قوية امامية وفوجات امامية بتنور الطريق كويس جدا عشان امانك اثناء القيادة
3. السيارة تكون مصفحة ضد الصدمات الجانبية والأمامية وده متوفر فى نيسان عن طريق قضبان الحماية الجانبية والتصفيح الأمامى ضد الصدمات
4. عدد 2 ايرباج امامية لضمان اقصى امان للسائق والراكب الأمامى عند التصادم
وانا بقول للأخوة اللى بيفكروا فى اى عربية (هى دى مواصفات الأمان فى النيسان اليابانية التجميع المصرى) واللى بيفكر فى الأمان بتاع العربية زى الشعوب المتقدمة اللى الأمان عندهم هو اهم شىء يقارن المواصفات دى بأى عربية تانية ويقارن السعر وان شاء الله ربنا هيهديه للخير
كلامى ده موثق من موقع نيسان وده اللينك بتاعه
Nissan SUNNY : Overview
وجزاكم الله خير
