الموضوع: خرطوم و فلتر البنزين في الفنتازيا - مشكلة غريبة

تعرضت لمشكلة غريبة مؤخرا و أود مشاركتكم و أرائكم فيها .
من اسبوع تقريبا , ذهبت الى واحد من افضل مراكز الصيانة المعتمدة لسكودا لعمل صيانة الـ 20000 الف.
و غيرت فلتر البنزين طبعا و كله تمام.
بعد 3 ايام , و اثناء انتظاري بالسيارة لزميل لى بالعمل .. توقف المحرك فجأة و مش عايز يدور تماما .
بعد 10 دقائق من المحاولة , فوجأت أن تحت السيارة بركة من البنزين (تقريبا ربع التانك وقع على الأرض).
طبعا أنا كنت شامم رائحة بنزين بس مائخدتش بالي إنو من عندي لأني كنت واقف جنب بنزينة.
المهم ربنا ستر الحمد لله .. واتضح أن خرطوم البنزين الداخل لفلتر البنزبن من التانك مفكوك , و كان كل محاولة مني عشان أدور العربية الخرطوم السايب بيرمي بنزين على الأرض لأن طرمبة البنزين بتسحب بنزين من التانك بس مبيدخلش على الفلتر و بالتالي دورة البنزين مابتكملش ولا بتوصل للموتور.
بعد تركيب الخرطوم و ربطة بـ أفيز (كوليية) العربية دارت , طبعا ذهبت لمركز الصيانة لعمل مشكلة أو لفهم المشكلة من أيه.
كنت ثاير جدا , وحاولو يقنعوني بكافة الطرق أن المشكلة دي أول مرة تحصل و مستحيل الخرطوم يتفك لوحدة لأنه بيستحمل ضغط 4 بار , و مش محتاج للأفيز لأنه في طرف الخرطوم من جوه في كلبس بتمسك في شفة الفلتر وده كافي لإحكامة.
و الصراحة , بعد رفع السيارة كلنا حاولنا نفك الخرطوم و كان بيتفك بس بصعوبة (مش من أول ولا تاني ولا تالت محاولة).
المشكلة غريبة , و نصف الفنيين اتجمعوا لدراسة الوضع , وبعدها .. مدير مركز الصيانة جالي و كان ذوق جدا ووعدني أني مش همشي غير لما أكون مرضي تماما.
و بعد تجربة تركيب فلتر بنزين قديم , الخرطوم مسك اكتر من الي راكب عندي , و هنا قررنا تغيير فلتر البنزين لتاني مرة لإمكانية وجود عيب صناعة .
وفعلا , اتضح أن نصف قطر شفة فلتر البنزين الي كان راكب عندي اصغر من القديم , اتغير و كله تمام و مشيت.
الكارثة , ان اليوم على المحور وأنا ماشي على 120 , اتكررت تاني و العربية طفت مني .
الحمد لله ربنا ستر تاني , و انا بنفسي ركبت الخرطوم و ربط الأفيز عليه (الأفيز كنت سايبه إحترازيا , وأهو نفع) , و العربية دارت و رجعت البيت .

بماذا تنصحوني ؟؟؟ و هل في حد واجه المشكلة دى قبل كدة ؟؟
أروح مركز الصيانة تانى ولا على التوكيل في غمرة !!؟
اركب 2 افيز بنفسى للضمان و أنسى المشكلة !!؟

انا الي زعلان منة العربية 2011 و مكملتش 9 شهور أستخدام و تحصل مشكلة زي ديه .

أفيدونى .. أفادكم الله ...