الموضوع: الشد مع الجيتز ... وكالعادة ياريستي دايما رافعة راسي

السلام عليكم ورحمة الله وبركاته

الاسبوع اللى فات تقريبا كان عندي امتحان الصبح الساعة 9 تقريبا وكان طالع عيني مذاكرة اخوكم في كلية صيدلة واخر سنة فمطحون طحنة غير عادية

وانا ورايح الكلية (اللى هي جامعة MSA للى يعرفها) وماشي في امان الله على طريق اكتوبر !

مع ان كلمة امان ماينفعش تيجي في جملة مكتوب فيها طريق اكتوبر ! الطريق ده بالذات في وقت الصبح بيبقى ماهو الى حلبة سباق سيارات !

بلامانة الطريق بيتحول الى طريق شد وجري وغرز مابين طلبة الجامعات خاصا ان الطريق اتشالت من عليه كل الرادارات ! ! فبقى كل واحد بيجري زي ماهو عايز

ربنا يسترها معانا كلنا

الواحد والله بقدر الامكان بيحاول انه يمشي براحه ووقت مابجري بحاول بقدر الامكان ابقى مركز وماكسرش على حد ومادخلش على غرزة الا وانا متاكد 100% انها هتجبني وابقى شايف انا داخل على ايه

وربنا يسترها في الاول وفي الاخر

المهم نرجع لصلب الموضوع كنت ماشي لقيت عربية جاية يمين في شمال واخدة الطريق كله رايح جاي

حسبتها في البداية بيكانتو

قلت خليني اشوف هعمل معاه ايه

جرينا شوية بعدين اخوكم اتنزق في الدخلة اللى في اليمين اللى بدخلك على الدائري او المحور مش متذكر انهي واحدة

وطبعا كلكم عارفين ماهو احساسك لما تبقى بتشد مع حد وتلاقي عربيات قفلت عليك الطريق وياريت اي عربيات

لاء ترليات ومقطورات وطبعا دول ماينفعش معاهم الهزار خالص ! !

بحس ان سواقين المقطورات معندهمش فرامل ! الفرامل بتاعتهم هي الكلاكس يعني وسع والا هشوطك

اتنزقت زنقة سودة وكان نفسي انزل اولع في سواقين المقطوارات كلهم

بعدها ببص لقيت صاحبنا اختفى من قدامي تماما ! ! ! لدرجة اني مابقتش عارف هو راح فين

قلت انا وانت والطريق لسه طويل وفضلت اجري يمين شمال يمين شمال لحد مافي الاخر لقيت صاحبنا بياخد المطب اللى بعدها اعتقد المطب اللى بعد وادي دجلة او اللى عنده المعهد العالي للاهرامات مش متذكر بالظبط

عديته وفرقت عنه بصيت عليه في المرايا لقيت برضوا ترلا قفلت عليه وزنقته ! قلت استناه عشان نحرق جمب بعض وانا طبعا على بالي انها بيكانتو

بقيت كل ماستناه ويقرب مني ونبقى جمب بعض ونحرق اعديه بفرق كنا بنبقى على سرعة تقريبا 120 لما بنكون قريبين من بعض وبعدها بنحرق

وفضلنا طول الطريق على كدة هو في ضهري ومش عارف يعديني وكل مبيقرب بحرق بلاقي نفسي بعدت عنه بفرق

طبعا كل ده مش مقياس لاننا مابدأناش حرق مع بعض الى غير ان الغرز والسواقة ليها عامل كبير جدا !

الى ان وصلنا الى المطب اللى عند دخلة جهاز اكتوبر

كان هو ورايا هدينا بعدها لقيت عربية فيرنا بتاخد المطب عديته من الشمال ورحت راجع لصاحبنا وهنا اكتشفت انها هيونداي جيتز !

طبعا هو بدأ حرق قبلي بحاجة بسيطة جدا (اللى هي الفترة اللى كنت بتجاوز الفيرنا فيها )

حرقنا كان هو قدامي وانا في نص عربيته بالظبط بمعنى ان الباب الخلفي بتاعه جمب الباب الامامي بتاعي

وفضل الفرق مابينا ثابت لا بيزيد ليه ولا ليا والكلام ده فضل اول وتاني لحد سرعة 80 تقريبا ( لان التاني عندي بيوصلني ل 85 تقريبا لما بحرق عليه )

وللاسف الطريق ماكانش فيه مجال اننا نزود عن كدة بعدين انا خدت يمين عشان ادخل الجامعة وهو كمل علطول !

طبعا ناس كتير هتقول الطريق كان اغلبيته غرز ومش مواتير خالص ! لكن اللى عايز اقوله ان الطريق كان فيه حتت كتير جدا فاضية خاصا الملف اللى قبل الداخلة بتاعة الجهاز كان فاضي جدا

وانا كنت بستناه عشان نحرق جمب بعض وكنت بعدها بفرق عنه ! ! ولو الجيتز صاروخ على السرعات العالية زي ماهي صاروخ في طلعتها اكيد كان هيعديني مرتاح !

بصراحة وبدون اي زعل تقيمي لاداء الجيتز هي فعلا ماشاء الله طلعتها صاروخ وانا ماكنتش متوقع انها كدة مع انه برضوا معرفش يفرق عني وانا (1300 اتوماتك) والفرق بينا كان ثابت

إلا ان الجيتز على السرعات العالية فوق ال120 اداء متواضع جدا جدا جدا !

دي كانت تجربة الشد مع الجيتز وربنا يعلم اني بتكلم بحيادية تامة وبذكر اللى حصل بكل كبيرة وصغيرة

شفت مواضيع كتير بتتكلم عن الشد والحرق وكان اغلب العربيات المذكورة فيهم (فيرنا - سيراتو - جيتز - كرولا الشكل القديم - جين 2 )

مع اني ماشفتش حد جاب سيرة الياريس ! ! ! ! مع اني شايفها من العربيات اللى فعلا يطلق عليها لقب صاروخ ! ( طبعا بالنسبة لفئتها وسعرها ) انا بامانة ربنا بالياريس اللى معايا طلعت من عربيات كتير 1600 واسماء كبيرة وعالية وماحبتش اذكر الاسماء عشان مايحصلش خلافات ونكون مركزين في موضوعنا اكتر

واتوقع ان الياريس 1500 مانويل ! ! اكيد ليها كلام تاني خالص

طبعا عارف ان كلامي ممكن مايعجبش ناس كتير خاصا اصحاب الجيتز وناس هتدخل تقول انا بطلع من الياريس مرتاح وان دي 1600 ودي 1300

ودي كام حصان ودي كام حصان !

كل الكلام ده على عيني وعلى راسي وعلى فكرة السحب بنسبة كبيرة بيعتمد برضوا على السواق فوارد واحد تاني بتاع جيتز يديني على عيني

انا حكيت اللى حصل بمنتهى الحيادية واترك التعليق الاخير لكم .......