ارجو المشوره و المساعده بخصوص دايو ماتيز

**stars** · 10-06-2011 11:57 PM

السلام عليكم اخوانى ...
فى مشوره كنت محتاجها ولاقتش غير اخوانى هنا يساعدونى فيها بخصوص شراء عربيه دايو ماتيز موديل 2001 للمدام وكنت عايز معلومات عن العربيه ايه رأيكم فيها .. وهل تنفع للستات عموما ..وهل قطع غيرها متوفره زى الانوس لانى معايه لانوس ومستريح معاها كتير فى توافر فطع الغيار .. وكام السعر بتاعهه دلوقت .. ولو فى معلومات تانيه عنها والف شكر لكم جميعا اخوانى

**Mangog** · 11-06-2011 09:33 AM

وعليكم السلام ورحمة الله وبركاته

انا بارشح لك الكورسا او الأتوس ... لان الماتيز عربية منتهية نزلت بس سنتين تلاتة واعتقد انها هتدوخك على قطع الغيار و البيع لما تحتاج تبيع

**stars** · 11-06-2011 06:21 PM

شكرا mangog على ردك ... بس العربيه دى وحشه اوى كده وفيها مشاكل كتير ولا ايه .. وانا بحثت كتير عن موضيع ليها مافيش غير 4 او 5 مواضيع قديمه عنها ومافيهاش اى معلومات
ياريت لو حد معاه العربيه دى او يعرف عنها يقوللى ..

**adel1212** · 11-06-2011 08:14 PM

العربيه كانت مع اخويا
هى عربيه رائعه وممتازة واقتصادية جدا جدا وتصدق انها واسعة من جوه كمان
بس عيبها لما تعوز قطعه غيار يبقى دواخينى يا لمونه دواخينى
مش موجوده ولو موجوده يبقى غاليه جدا
تحياتى

**stars** · 12-06-2011 04:37 AM

انا جربت العربيه وفعلا اوسع من شكلها لان من اول نظره تحس انك مش حتعرف تعد فيها لاكن لقيتها مريحه من جوه وخفيفه وهى تقريبا هاف بور والتكييف بتاعها كويس زى الانوس تقريبا ...
بس واضح انها مش منتشره اوى بين الاعضاء هنا بالرغم انى بشوفها فى الشارع ...
بصرحه موضوع قطع الغيار ده حيخلينى اصرف نظر عنها ..
وحليا حشوف كورسا او سكودا فليشيا ممكن تكون افضل والف شكر لاخوانى الكرام

**kabbo** · 13-06-2011 07:59 PM

العربية دي معايا من 2005 و هي موديل 2002 و ده آخر موديل نزل منها و اتبدلت بشيفروليه سبارك ... و هي عربية ممتازة جوة البلد من ناحية التسارع و المرونة في السواقة و الركن في أي مكان بالإضافة إلي انها ما بتستهلكش بنزين تقريبا يعنى بأفول و انسى بالشهر و الله من غير مبالغة وهي واسعة من جوة عشان عاملين حجم كراسيها مناسب للحجم الداخلي بتاعها و دي المشكلة اللي حسيتها في البيكانتو ال 2012 اللي كراسيها و كنبتها ضخمين للدرجة اللي ضيعت فراغ الراس و الرجلين خصوصا للراكب ورا .. و مش عارف ازاي فاتتهم دي ؟؟...... المهم الماتيز يتاعتى قطع غيارها في الزقازيق جديد و استيراد بكمية معقولة جدا و الحاجة الوحيدة اللي احتجت اجيبها م التوفيقية في القاهرة كانت قربة المية عشان ما رضيتش أحط واحدة استيراد م الزقازيق و جبتها ب 75 جنيه جينيرال موتورز زي الفل ...... المهم العربية زي الفل بس صعب تلاقى واحدة في حالة كويسة عشان آخرها 2002 زي اللي معايا ... إنما لو لقيت واحدة صاحبها محافظ عليها فنصيحة إشترى و هتدعيلي .....