الموضوع: اختى كان جايلها عريس وغير رايه لما عرف انها دكتوره

السلام عليكم و رحمة الله و بركاته ................

بداية أستاذى الفاضل زى ما حضرتك عارف و كل الناس عارفين إن الجواز قسمة و نصيب و أكيد إن شاء الله ربنا هيرزق أخت حضرتك بإنسان أنسب ليها بلاش نقول أحسن من إللى فات لإنه أكيد إنسان كويس و هى برده إنسانة كويسة بس ممكن يكونوا مش متوافقين مع بعض فربنا إن شاء الله هيبدلها الخير و يبارك لها فيه إن شاء الله .

أنا من وجهة نظرى المتواضعة بشوف إن الدكاترة بيبقى عندهم مشكلة فى أوقات شغلهم يعنى نظرا لحساسية عملهم و أهمية ما يقومون به من دور فعال فى المجتمع بإختلاف تخصصاتهم و خصوصا بالنسبة للسيدات أو البنات الدكاترة ففيه بعض الرجال بيخافوا من الجزئية ده إن ممكن مراته يتصلوا بيها فى وقت متأخر أو حتى وقت غير مناسب لإن فيه حالة حرجة أو طارئة و محتاجينها و طبعا نظرا للقسم إللى بيقسموه فطبعا لازم يلبوا النداء أولا و شرف المهنة فوق كل شىء ففيه رجالة ما بيقدروش يستحملوا الموضوع ده و أنا عندى زميل ليا فى الشركة مهندس زى حالاتى متزوج دكتورة أطفال بس إيه مش عايز أقولك .

أنا شايف إن السبب فى الحالة إللى حضرتك بتقول عليها إنه مش موافق مش علشان هيه أعلى منه فى الشهادة لإن هما الإتنين معاهم شهادة عالية و هي طبعا هتكون فخر ليه مش علشان شهادتها و لكن بأخلاقها و طباعها و لكن ممكن يكون علشان المواعيد و الأوقات بتاعت العمل و كده و ممكن يكون هو خايف إن ده يأثر على الحياة الزوجية و الواجبات المنزلية و تربية الأطفال بس أنا عن نفسى مش معاه خالص فى الموضوع ده لو كان ده هو السبب طبعا

هقول راى مع انى حاسس ان صاحب الموضوع ممكن يزعل من راى دة
ما ينفعش تكون الزوجة ذات شهادة اعلى مش موضوع التحكم والكلام الكبير دة
بس قارن بين مرتبها وبين مرتبوا ؟؟
قارن بين وضعها الاجتماعى ووضعوا هو؟؟
فلنفترض انها خرجت مع اصحابها الى متجوزين دكاترة ومهندسين وحبت تعرفهم بزوجها هيكون هو اقل واحد فى القاعدة
انا مش عايز حد يزعل وكل شهادة ليها دورها المهم فى المجتمع
بس الدكتورة مش هينفع تتجوز اقل من دكتور او مهندس او صيدلى حاجة فى نفس المستوى الفكرى والاجتماعى
ولو حصل غير كدة هتواجه مشاكل اجتماعيه صدقنى رخمة اوى
وفى الفترة الاخير بدا موضوع دة يتغير مش علشان هو صح ولا غلط ولكن لظروف البلد وتاخر سن الجواز للبنات
انا تقريبا عندى مشكلة مشابه
انا مهندس واهلى ديما يضغطوا انى اتجوز مهندسة او دكتورة , وانا بفكر فى بنت محاسبه معايا فى الشغل
بس الى الواحد شافوا فى الناس الى حوليه ان مهندسة او دكتورة بيكون ليها تربيه للولاد كويسة جدا
وفى الاخر القسمة والنصيب وربنا يكرمنا جميعا

المشكلة اننا اتربينا على ان مؤهلك الدراسي - الورقة بتاعت الشهادة مش العلم اللي درسته- هي قيمتك الاكبر في الحياة
انما اي حاجة تانية اقل قيمة
و السبب في التفكير اللي بتقول عليه ده هو عادة الزوجة و اهلها
لان مع اول خلاف بينهم هيقولوا للعريس .. انت مش عارف انت متجوز مين ؟؟ .. دي دكتورة ؟؟
و في رجالة تستعاهل الاذلال ده فعلا
انا اعرف واحد كان احد اسباب زواجه من صيدلانيه و اللي امه برضه كانت بتشجعه على الزواج منها لنفس السبب .... انه يفتح صيدلية !!

انا بحثت في شرط الكفاءة شرعا و و صلت للآتي
ان الكفاءة في العلم و الحسب و المال و خلافه شرط لزوم و ليس شرط صحة
يعني لو واحدة غنية و اتجحوزت واحد فقير .. يبطل الزواج ؟؟ لا طبعا انما هي لو اشترطت في الزوج انه يكون غني زيها يبقى ليها الحق و مش حرام عليها الشرط ده
الكفاءة معتبرة من زمان عشان كده العلماء بيقولوا العالم كفء لأي امرأة

و ربنا يزوج شباب المسلمين
آمين

اولا موضوع الشهادة مش مقياس علي تفكير الفرد او ذكائه خصوصا فى مصر , انا اعرف ناس مهندسين ودماغهم دماغ ناس مش متعلمه نهائي واعرف ناس معهمش الاعدادية ودماغهم واسلوبهم اسلوب ناس دكاتره ومثقفة

ثاني حاجة سبب المشاكل فى موضوع الجواز والخطوبة هو المفاهيم المغلوطة فى المجتمع اللي بقالها مليون سنه مترسخه فينا , الراجل راجل والست ست و ان المطلقة سيئه السمعه وان الراجل لو طلق عادي وميبقاش سئ السمعه وان البنت لما تمشي مع ولد تبقي قليلة ادب ولو ولد مشي مع بنت يبقي مقطع السمكه ودلها وان البنت عيب ترد على جوزها وجوزها يضربها ويشتمها عادي لانه راجل

كل الكلام دا والمفاهيم الغلط دي هي اللي عاملة المشاكل بين الراجل والست