الموضوع: استفسار عن الحلاقة فى الجيش وماكينات الحلاقة

المشاركة الأصلية كتبت بواسطة maserati

السلام عليكم و رحمة الله و بركاته

دى وصفة سهلة خالص.

هات مكنة, moser ألمانى أو oster أميركانى .

أنا مش عارف هى بتيجى منين هنا فى مصر, بس كان اتعمل موضوع هنا فى المنتدى على الموضوع ده و كان الأخوة ألفاضل قالوا أنها فى حدود ال180 جنيه.

و عقبال مانباركلك لما تخلص الجيش على خير ان شاء الله.

الله يخليك و يكرمك
بس الانواع دى مسمعتش عنها قبل كدة والماركات المضمونة افضل والضمان والحكاية دى
هحاول برضه اسئل عن الماركات دى واشوف نظامها ايه
شكرا جزيلا لك

المشاركة الأصلية كتبت بواسطة م/مصطفى محمود

مش هيرضوا يدخلوك مركز التدريب بأي ماكينة كهربا ، وأنت وحظك بقى بعد كده فى الوحدة بتاعتك

فأنصحك بأنك تفكر فى الأمواس أفضل وأرخص (علشان متتسرقشي )

أخوك برضوا فى الجيش دفعة 4 (صحيح أنتوا مكنشي في إرجاء ولا كان في ؟؟)

لا مكانش فيه ارجاء
واول كلمة قالها القائد لينا (كلكم من ابناء القوات المسلحة ) :)

وحكاية الامواس دى رخمة قوى لانى بقالى سنين مبحلقش الا بكهرباء لان الامواس مع بشرتى بتبقى مشكلة خصوصا يوميا ولا حتى يومين

لكن شكلها كده هيبقى مركز التدريب امواس وبعد كده نشوف الوحدة هيبقى نظامها ايه
شكرا ليك يا جميل على ردك
جزاكم الله خيرااا جميعاا

على فكرة ممنوع أنك تحلق زيرو فى الجيش . الحلاقة الزيرو دى لما تكون مذنب أو حا تدخل السجن ممكن يتحلق لك زيرو لكن غير كدة ما تحلقش زيرو و بصراحة ما شوفتش أى مكن كهرباء فية حلاق فى الكتيبة بتحلق عندة كان زمان كدة بتشترى بون من الكانين و تروح تدية للحلاق و تحلق لكن مش بتدى للحلاق فلوس فى أيدة .
ممكن يكون النظام اتغير بس عموما لو حالق زيرو معناها أنك مذنب وواخد ذنب.
و بالنسبة للحلاقة العادية حا تتعود و ممكن جدا تحلق دقنك من غير مية اساسا على الناشف يعنى و بسرعة كمان . الطبيعة فى الجيش تتسم بالخشونة شوية

المشاركة الأصلية كتبت بواسطة heshamzaky

على فكرة ممنوع أنك تحلق زيرو فى الجيش . الحلاقة الزيرو دى لما تكون مذنب أو حا تدخل السجن ممكن يتحلق لك زيرو لكن غير كدة ما تحلقش زيرو و بصراحة ما شوفتش أى مكن كهرباء فية حلاق فى الكتيبة بتحلق عندة كان زمان كدة بتشترى بون من الكانين و تروح تدية للحلاق و تحلق لكن مش بتدى للحلاق فلوس فى أيدة .
ممكن يكون النظام اتغير بس عموما لو حالق زيرو معناها أنك مذنب وواخد ذنب.
و بالنسبة للحلاقة العادية حا تتعود و ممكن جدا تحلق دقنك من غير مية اساسا على الناشف يعنى و بسرعة كمان . الطبيعة فى الجيش تتسم بالخشونة شوية

انا افقصد زيرو دقن وليس الشعر :)
وعلى رايك والله هتعود هتعود هروح فين يعنى
جزاك الله خيرا
على ردك وافادتك

المشاركة الأصلية كتبت بواسطة mohamed_selim

ميه ... ناقص تقولى فرشه و معجون حلاقه .....
كويس قوى انهم سامحين بالمكنه العاديه ... لو لقى ميه يبقى يستخدمها ... لو فى وقت ههههههه

ربنا معاك ... انا فاكر اول مره حلقت على الناشف من غير مرايه ... نسيت اخد الحته اللى فوق الرقبه (تحت الفك) و لما مشيت ايدى عليها و عرفت انها مش مظبوطه كان لازم اجمع ... قلت هبص تحت محدش هياخد باله بس حظى طلع فى شاويش قصير (انا 190 سم) فطبعا الحته الوحيده اللى شافها هى اللى متعملتش ....

لا هلاقى معدنية كمان
ههههههه
فعلا كتر خيرهم انهم سامحين بالماكينة العادية
وانا برضه طويل وربنا يرزقنى بشاويش طووووويل :)
جزاك الله خيرا على ردك الجميل

المشاركة الأصلية كتبت بواسطة م/مصطفى محمود

انا فعلا كذا مرة حلقت على الناشف ، مع إن بشرتي حساسة برضوا :d ، فعلا هتتعود على أى حاجه

والله مرة حلقت على الناشف ومن غير مياة ولا مراية وكانت زي الفل ومن غير ولا جرح

هتتعود على كل حاجه متقلقشي ، وخد الحاجات دي بقى معاك وإنت رايح مركز التدريب

(مصلية ومصحف + شبشب + ملائة سرير أو ناموسية (علشان الدبان تتغطى بيها بالليل) + مراية صغيرة ورباط بيادة و 3 فرش بيادة (مهم جدا جدا) + مناديل + بخاخة وديتول سائل + صبانة (علبة بلاستك للصابون) وصابون ديتول (ممكن تستسهل وتجيب ديتول الصابون السائل) + قصافة + ورنيش جزم أسود + 2 شرابات ميري من الشيشينجي (أنضف بكتير من اللى هتستلمهم وهيريحوك) وطبعا مزيل عرق قوي ويُفضل يكون بكرة ، وأهم حاجه فى الموضوع كلة بدرة رجل أيفا ، عدد 3 قفل متوسط)

ولو إفتكرت حاجه تانية هقولك بإذن الله

والله يا بشمهندس مصطفى مش عارف اقولك ايه
انا مكنتش واخد بالى لسه من حكاية اخد ايه معايا
يمكن لان لسه ميعاد جيشى كمان شهر ولسه مبداتش ارتب هاخد ايه
بجد ربنا يكرمك يارب ويجزيك خير ان شاء الله
وهاخد كل اللى قولتلى عليه
لكن بالنسبة للبيادة دى يعنى ايه >>معلشى لسه مستجد بقى
وكمان ايه لازم القفل
وجزاك الله عنا كل خير