دكاترة الفضائيات المحترمين ( سامحنى يارب ) !

**Ghosts** · 11-06-2011 04:18 PM

ياجماعة أوعوا تروحوا للدكاترة اللى بتطلع فى الفضائيات ....
لأن معظمهم مابيعرفوش حاجة فى الطب ....
وأوعوا تنخدعوا بالمظاهر والشهادات المزيفة مدفوعة الأجر ....
بنت خالى راحت لدكتور تجميل بيطلع فى قناة المحور ....
عشان تعالج أثار حب الشباب ....
هى قررت تتعالج مع الدكتور دة عشان كان مكتوب على الشاشة ....
عناوين العيادات بتاعتة فى القاهرة و الأسكندرية وكمان فى دبى ....
فأفتكرت أنة دكتور ملوش حل ....
وفعلآ راحت لة والدكتور قرر أنة يعالجها بالليزر اللى واخد دكتوراة فى أستخدامة ....
وبعدين أتضح أنة مابيعرفش يستخدم الليزر أصلآ ....
لأنة بدل ما يعالجها حرق لها وشها بالليزر ومن أول جلسة ....
وفضلت البنت سنتين تعالج الحرق دة ( بالتأكيد مع دكتورة تانية ) ....
اللى للأسف ساب أثر دة غير أن أثار حب الشباب فضلت زى ماهى ....
ياريت يا جماعة اللى عندة تجربة مشابهة ....
يقول لنا عليها عشان نستفيد من بعض ....

**heshamzaky** · 11-06-2011 04:37 PM

للأسف الدكاترة الى بتعمل اعلانات من النوعية دى لازم كنت تتوقع أنهم اساسا واقعين و تعبانين دة بيعتمد على الماركتينج يعنى تاجر و لس طبيب بالمعنى المفهوم و النوعية دى كتيير للأسف
أسوأ شيىء أنك تروح لدكتور تاجر الى زية مفروض يتقفل المركز بتاعة دة و يتقدم فية شكوى لنقابة الاطباء و تحميلة مسؤلية الخطأ مش ناقصة ناس بتتعلم لسة تجرب على البنى أدمين . و ألف سلامة للمريضة و ربنا يشفيها بأذن الله

**Ghosts** · 11-06-2011 05:01 PM

المشاركة الأصلية كتبت بواسطة heshamzaky

للأسف الدكاترة الى بتعمل اعلانات من النوعية دى لازم كنت تتوقع أنهم اساسا واقعين و تعبانين دة بيعتمد على الماركتينج يعنى تاجر و لس طبيب بالمعنى المفهوم و النوعية دى كتيير للأسف
أسوأ شيىء أنك تروح لدكتور تاجر الى زية مفروض يتقفل المركز بتاعة دة و يتقدم فية شكوى لنقابة الاطباء و تحميلة مسؤلية الخطأ مش ناقصة ناس بتتعلم لسة تجرب على البنى أدمين . و ألف سلامة للمريضة و ربنا يشفيها بأذن الله

فى ظل النظام الفاسد اللى كنا و لازلنا عايشين فية ....
كل واحد يقدر يعمل أى حاجة عايزها ....
يعنى لة واحد حلاق صحة فتح مركز طبى للتجميل ....
حد هيقولة حاجة ؟
طبعآ لأ مادم بيدفع رشاوى ....
للأسف ياجماعة بلدنا بااااظت ....
ومحتاجة وقت طويل من العمل المتواصل ....
عشان ينصلح حالها ....

**tamatemo** · 12-06-2011 07:53 AM

المصايب في دول بتكون اكتر في بتوع التخسيس وبتوع التجميل

**Ghosts** · 12-06-2011 03:39 PM

بما أن القانون لا يحمى المغفلين ....
يبقى لازم نساعد بعض عشان نعرف تصرفات الدكاترة النصابين ....
أنا زى ماقلت تجربة بنت خالى ....
هاقول تجربتى أنا كمان ....
من حوالى 11 سنة جالى ضيق تنفس مع كحة شديدة قوى ....
فرحت لدكتور من اللى بيطلعوا فى التلفزيون ....
قالى أنى عندى حساسية من الأتربة و الأدخنة ....
وعشان أخف لازم أخد مع الأدوية تطعيمات ضد الحساسية ....
التطعيم دة فى حجم القطرة و كان ب 250 جنية ....
ولما سئلتة أنا محتاج كام جرعة ....
قالى جرعة واحدة أو أتنين بالكتير أوى ....
ولما خلصت الجرعتين لقيتة بيدينى الجرعة التالتة ....
قالى دى جرعة أحتياطى عشان الحساسية متجيش تانى ....
بعد كدة لقيتة بيدينى الجرعة الرابعة ....
قالى دة منشط عشان يشغل الجرعات التلاتة اللى فاتوا ....
وبعدين لقيتة بيدينى الجرعة الخامسة ....
قالى الجرعة دى عشان تنشط المنشط ....
وطلب منى أنى أجى بعد شهر عشان أخد الجرعة السادسة ....
وطبعآ كنت ناوى أروح لة لأنى كنت خايف أتعب تانى ....
بس الحمد لله ربنا نجانى منة ....
قبل ماروح للدكتور دة بيومين شفت بالصدفة فى قناة فضائية طبية أسمها نفرتيتى ....
دكتورة كانت رئيسة مركز الأمصال و التطعيمات فى أمبابة على ما أذكر ....
المهم حكيت لها فى التليفون حكايتى وسئلتها أخد الجرعة السادسة ولا لأ ؟
قالت لى سادسة أية و سابعة أية يا أستاذ ....
التطعيمات دى سموم والجسم بياخد مناعة منها بعد تلت جرعات ....
أى جرعة زيادة ملهاش أى تأثير على الجسم ....
المهم بعد أربع سنين وبعد التطعيمات و المنشطات ....
رجعتلى الحساسية تانى وكانت أشرس من الأول ....

ياريت ياجماعة اللى عندة تجربة مشابهة مع دكتور أو جراح نصاب يقول لنا عليها ....

**M.Zaher** · 12-06-2011 04:39 PM

طيب ياريت نعرف اسماءهم عشان محدش ينخدع فيهم تاني

**Ghosts** · 12-06-2011 05:08 PM

المشاركة الأصلية كتبت بواسطة m.zaher

طيب ياريت نعرف اسماءهم عشان محدش ينخدع فيهم تاني

أنا نفسى أقول أسمائهم ....
لأنى متغااااااااااااظ منهم جدآ ....
بس أخاف أن ذكر أسمائهم يسبب مشاكل للمنتدى ....
لأن دة يعتبر تشهير بيهم ....
ولا أنت أية رأيك ؟