الموضوع: تعالوا نعرف ازاي نعمل جراب نضارة في سقف العربية

بسم الله الرحمن الرحيم
السلام عليكم و رحمة الله و بركاته

و مازالت سلسلة تعالوا نعرف مستمرة

و ضميري مازال راشق في السلسلة و نسيت احطله منوم في الفسكافيه ( ايوة انا الراشق ... اخرس)

موضوعنا انهاردة عن ازاي نعمل جراب نضارة في العربية في ناس هتستغرب و تقول ايه اللي بيقوله ده هي كيميا ما نجيب جراب و نحط النضارة في العربية و خلاص ( ايه يا عم الهجس اللي بتقوله ده )
اهو مش بقولكم ضميري عالطول دخل فيها

الفكرة جاتلي لما شوفت الالنترا و السيراتو تقريبا فيها جراب نضارة في السقف

ففكرت في 3 حلول

الحل الأول :
اني اجيب جراب نضارة و احطه في السقف و مش هيبقي مكلف بس ازاي ؟

الحل التاني : اني اروح لأي حد بيبع كماليات و اكسسوارات السيراتو او النترا و نجيب الجراب اللي بينزل فيها و نركبه في السقف بس طبعا اكيد مبلغ و قدره و يا تركب يا متركبش

الحل التالت : ندور ع واحد قديم عند اي حد بيبع استيراد و برده يا تركي يا متركبش

اخيرا رسيت ع الحل الأول
و هو اني اجيب جراب نضارة و احطه في السقف ( يا سلام ع الفتاكة ايه كيميا.... لأ فيزيا يا لمض)

طب ازاي ؟؟ و فكرت في الحل زي ما هنشوف

جريت طبعا ع ركن الورشة اللي عامله في البلكونة ههههه ( الكركبة بتاعتك .... يبني خليك في حالك )

و جبت الادوات اللي هحتاجها



- جراب نضارة يليق مع التابلوه
- علبة اسطوانة
- مسماريين صغيرين اوي بالصامولة بتاعتهم ع اد الفرق اللي بين الجراب و الدعامة اللي هنحطها
- سوبر جلو
- كاتر او سكينة قديمة ملهاش استخدام
- مفك
- شاكوش و مسمار سمكه نفس سمك المسامير الصغيرة عشان الجراب لو معدن من جوة زي حالاتي تعرف تخرمه
- مسطرة و قلم الوان فلوماستر
- و اخيرا و ليس اخرا كوباية فسكافيه بس متصورش شعان خلصته من قبل ما اعمل حاجة ( مفجوع طول عمرك ... نفسي تتكعبل و تقع ع لسانك عشان يتلم)





و نسمي و نبدأ

- جبت مجموعة جرابات من اورطة الجرابات اللي عندي هههههه اوبن بوفيه
و اخيرا اخترت الاسود الحليوة ده اللي فوق ع اليمين عشان يليق مع الحتة بتاعت التابلوه السودا ( طب مانا انت طلعت بتفهم اهو .... ليه شايفني متخلف زييك )



ثم علبة اسطوانة بلاي ستيشن قديمة عندي ( جيم فالي ههههه اوعوا تقولوا محدش يعرفها)

و خدت البلاستيك الشفاف اللي عليها و اديته وش نضافة تحت الحنفية ( أصله خده فومين .. ده انا اللي هخدك فومين )
طبعا بعد الغسلة بقي زي ما احنا شايفين



هنجيب الغطا البلاستيك و نحطه ع الجراب عشان نحد هنقطع اد ايه و بالقلم الفلوماستر و المسطرة و نحدد



نجيب السكينة او الكاتر و نسخنها ع النار و نبتدي واحدة واحدة نمشي ع الخط لحد ما نقطعه



و بقوا بالشكل ده بعد التقطيع




و هنقطع اتنين او واحد زي ما تحب بس اتنين لو خايف ان البلاستيك يكسر بسهولة

نحدد مكان الخرمين في الغطا البلاستيك و الجراب و نخرم الغطا



نجيب الجراب و نشيل الفرش و نخرم مكانهم بالمسمار و الشاكوش كالآتي






نجيب الغطا البلاستيك و الجراب و المسمارين و الصواميل بتاعتهم و مفك و نربطهم و بعدين نلزق الفرض تاني بالسوبر جلو او لو فيه كولة



و ده شكله





بس طبعا قبل ما نركب نظبط البلاسيتك و نساويه بالسكينة عشان المنظر ده انا كنت بس بجرب المقاس طلع مظبوط و لا لأ


جينا بقي للمهمة الصعبة و هي النزول في الشمس و الحر ( منك لله يا جدع خلتني اسيح ...خليك في حالك محدش قالك تنزل ايه البلاوي اللي بتتحدف علينا ديه )


ناخد معانا المفكات و كاتر و ولاعة احتياطي عشان لو في حته زيادة نقطعها فالمفروض اننا قبل ما نعمل نقيس المسافة الأول

نشيل غطا لمبة الصالون



و بعدين المفك و اديها فك في العلبة و قلبي كان هيوقع لأنها كلها حتة واحدة مع اني عملتها قبل كده و صلحت الزرار بتاع اللمبة لكن برده قلب اكسل بقي ع زقزوته





و بعدين نجيب الجراب و نحط الحتة البلاستيك اللي ركبناها في الجراب تحت الغطا و نقفل عليها و بالمفك برده و اديها و نركب الغطا بتاع اللمبة تاني



و ده الشكل بعد ما حطيناها



و ده لما تتفتح

و حطيت نضارة نظر عشان مش فاكر نضارة الشمس حطيتها ( مانت زهايمر طول عمرك ... ع اساس انك انت ذاكرة 2 جيجا مانت مسمينك برشام في العيلة خلينا كده فاضحين نفسنا)



و ها هو الشكل النهائي للجراب اي خناقة :)




و طبعا كل شخص بقي و تفانينه بما يناسب عربيته
يعني لو قفلت اوي في موضوع لمبة الصاله و مينفعش
ممكن يفتح فتحه صغيرة في فرش السقف و يركب الجراب بنفس نظرية تركيب لمبة الصالون فيه و اهم حاجة تخلي حد تمام يخرملك بس اوعي يخرملك سقف العربية نفسه هههه و يقفلها تمام عشان مفيش حاجة تدخل نفس نظرية لمبة الصالون يعني



و اخيرا
اتمني يكون شرحي وافي و قدرت افيد اللي عايز يعمل جراب نضارة للعربية و افيد محبي انهم يشتغلوا بايديهم و يتعبوا نفسهم ههههه

و ان ضميري ميكونش زهقكم كالمعتاد مع اني عارف انه زهقكم بس بغلس هههههه

و ان شاء الله انتظروا باقي السلسلة قريب ان كان ليا عمر

لكن احتمال تتأخر شوية عشان الامتحانات

و بالتوفيق للجميع ان شاء الله