الموضوع: لا يشرفني ان نكون كلنا ( خ.س ) و كلنا عارفين

هل كلنا خالد سعيد ؟ أه كلنا كنا خالد سعيد ، كلنا كنا مُعرضين لما تعرض لة بسبب أو بدون سبب ، حتى ولو الإتهامات اللى بتتهمة بها صحيحية فاللي حصل ده غلط ، وأحنا كنا مُعرضين لنفس الغلط ده ، انا والله كنت ببقى مُلتزم جدا وبخاف لما أدخل على لجنة علشان مضمنشي ممكن يعملوا أية ، ففعلا كلنا كنا خالد سعيد

هل يشرفني إني أنضم للصفحة ؟ طبعا يشرفني إني أنضم وأدافع عن شخص قُتل ظلم وعدوان بدون وجه حق وبدون عرضة على حتى ظابط يقول ده مذنب ولا لأ ، الرسول وقف لمشاهدتة جنازة واحد يهودي ورد على الصحابة اللى تعجبوا بإن دي نفس ، فأنا يشرفني إني أنضم للناس دي اللى قالت على الغلط غلط وحاولت تعمل حاجه من وقفات وما الى ذلك لإسترداد حق خالد وأمثالة

هل الجروب هو نواة الثورة ؟ أه الجروب نواة الثورة ، أنا شاركت فى إضرابات 6 أبريل و 4 مايو و و و ، وكل واحد لازم ياخد حقة ، فعلا الجروب هو اللى حدد اليوم وبعد كده بدأ التنظيم ، فمينفعشي ننكر النقطة دي وإلا نبقى جاحدين

هل خالد سعيد يُسيئ للثورة ؟ أنا شايف لأ طبعا ، خالد إنسان زينا كلنا ، وحتى لو كانت الإتهامات اللى بتقولها صحيحة ، فده ميمنعشي أنة شاب مصري أكيد كان نفسة يبقى أحسن ولم يجد الفرصة ، أكيد كان نفسة يصلح ولم يجد الطريق ، ودي مش مشكلتة هو بس ، دي مشكلتنا كلنا ومشكلة مجتمع واللى من أجلها قامت الثورة

من الآخر

انا أتشرف إني أكون مُنتسب لصفحة كلنا خالد سعيد بإسمها الحالي ، وضد مُحاولات تشتيت الإنتباه (الثورة لسه مخلصتشي وأحنا بنتكلم فى قضية بقالها سنة)

المشاركة الأصلية كتبت بواسطة araberphilosoph

هو انا مش عايز اتفلسف ولا حاجه بس في طائفه معينه في مصر بتفكرني بنظريه درستها في كورس للاهوت البروتستانتي في الجامعه بتتكلم عن الخاكم والفوضي
النظريه بني عليه مارتن لوثر موقفه تجاه حركه الفلاحين ايامه اللي وقف فيها ضد الفلاحين المطالبين بحقوقهم وعمل عليه بناء لاهوتي متكامل
ملخص النظريه
ان الفوضي من الشيطان والشيطان ضد الله وان يكون هناك حاكم ولو مستبد وظالم و و اقرب الي الصواب من اي فوضي ولو كانت صغيره
واي تضحيات بين عامه الناس تقع اهون من انتشار الفوضي او عدم وجود راس عليا للجامعه
المهم ان يكون هناك راس ما وهذه الراس يجب خدمتها باي شكل (ده كان احد اسباب رعايه الكنيسه البروتستانيه للنازيه عكس الكنيسه الكاثوليكيه)
وكنا درسنا ان هذا الفكر مرتبط بكل نظام ديني مهما اختلفت مركباته (انا طبعا كنت باعترض وان الاسلام لا توجد فيه هذه الظاهره نعم هناك علماء سلطان ولكن نظريه وجوب وجود الراس مهما كان تصرفه مرفوضه لا هناك قواعد يسير عليه الجميع في الاسلام)
لكن اظن عندهم حق
ده موجود في كل نظام ديني
وللاسف تسرب الي المسلمين
واسفى

تحياتى لحضرتك
و شكرا لمداخلاتك الثرية فى المنتدى
بجد بتستمتع بمداخلاتك

المشاركة الأصلية كتبت بواسطة dr_magdi2009

بما ان كلامى كلامى كلة بالمستنداات ......... و هاعتبر اصدقائى فى الاسكندرية كذابين و عيال سيس على اللى حكوة على ( خ . س)

نفسى تقرا اللى اتكتب لما مسكوا كام شاب فى الجامعه وقالوا انهم شبكه لقلب نظام الحكم و بيصنعوا قنابل و عندهم شرايط دين

نفسى تشوف تقرير اللى خلوا حبيبه الممثله تتسجن بتهمة قتل زوجها وبعد سنين يطلع ان اللى قتله حرامى وهما استسهلوا القضيه

نفسى تفتكر التقرير بتاع بنى مزار والواد اللى لبسوه الليله وفى الاخر طلع مافيش...

نفسى تفتكر الفيديو بتاع الواد اللى قتل نادين وهما بيلقنوه يقول ايه

نفسى تفتكر اللى مسكوه وقالوا انه فجر الكنيسه وتقارير طول وعرض و فى الاخر طلع برئ

نفسى تفتكر بلال الشاب السلفى اللى قتلوه والتقرير بتاع هبوط الدورة الدمويه

نفسى تفتكر الراجل اللى رموه من البلكونه قصاد مراته وعياله وقالوا انتحر

نفسى تفتكر كام واحد اتقتلوا فى السجن و البهوات اللى ماضيين فوق قالوا هبوط فى الدورة الدموية


هو حضرتك كنت معانا فى البلد دى؟؟؟؟

يا ترى هو سيد بلال كان خمورجى و حشاش برده ؟؟؟ الموضوع مش موضوع خالد سعيد , الموضوع موضوع كرامه و ادميه المواطن المصرى حتى و لو غلطان فيتعاقب بالقانون مش بالقتل من مخبر مايسواش 3 مليم او من اى شخص بالداخليه