شفت حادثة في بني سويف النهاردة
زي ما انتوا عارفين أزمة البنزين في بني سويف لازلت مستمرة على قدم و ساق و أنا بدور على بنزينة و رايح من بني سويف الجديدة الى بني سويف القديمة غرب النيل لقيت تاكسي مقلوب في نص الكوبري مقلوب على سقفه و انفجر زي القنبلة و كان بيني و بينه تقريبا 300 متر رحت واقف على جنب قبل مطلع الكوبري و ده الممر الوحيد من الشرق الى الغرب و الدنيا كلها وقفت على الاتجاهين . و كل الناس نزلت من عربياتها و بيجروا على التاكسي ( طبعا عرفت انه تاكسي من كلام الناس ) و النار كانت رهيبة جدا و الحرارة عالية جدا على مسافة كبيرة من الحريقة .
الناس كانت عمالة تطلب طفايات من العربيات بس محدش طلع طفاية ( يا ترى ليه ؟!!!! عشان الطفاية ب 120 جنيه ؟ و لا مفيش معاهم زيي ؟ ) .
الكويس ان سواق التاكسي طلع سليم . بس العربية مقدرتش اعرف نوعها ايه بعد الحريقة .
الاسعاف وصلت بعد 40 دقيقة من الحريقة .
المطافي وصلت بعد 55 دقيقة و الرائع فعلا و اللي اثر فيا ان كان معاهم خراطيم و التانك مليان مياه ( بجد مش بهزر ) ....
و كعادة الشعب المصري اختلفت الروايات !!!!!!
الحادثة سببها ان العربية غاز و الانبوبة فرقعت ....
الكاوتش الامامي فرقع و ده خلى التاكسي يتقلب و البنزين ينزل على الموتور السخن و ده اللي حرقها ....
مع ان كل الناس اللي سألتها كانت موجودة من بداية الحادثة!!!