في مصر اللي يسأل ميروحش واللي يروح ميرجعش




يا حضرة الاستاذ قول لي . . نعم يا عمدة عايز إيه . . منين نروحو المتولي ؟ اذكر نبينا وصلي عليه . . تمشي كده علطول علطول لحد ما تلاقي عمارة . . تكسر يمين تلقي بتاع فول دكانته علي ناصية حارة . . تفضل كده تمشي وتلف وتخش من مطرح ما طلعت ولما تلقي مقلة لب تعرف بأنك توهت وضعت . . يااااه دي وصفة سهلة دي وصفة هايلة . موضوع يتكرر يوميا دون أن يلاحظه أحد حتي أصبح كأنه قانون يمارسه الجميع وقد أثير هذا الموضوع في المواقع الالكترونية والفيس بوك ويرتبط هذا الموضوع بكل الناس سواء ركاب السيارات أو السائرين علي الأقدام أو ركاب المواصلات العامة فكم من مرة كنت تبحث عن عنوان ما واستوقفت شخص في الطريق لتسأله وما ان تفعل حتي تلتمع عيناه وينفخ صدره ويرفع رأسه للسماء ويضع يده علي كتفك كأنه العالم ببواطن الأمور ويبدأ في الشرح التفصيلي للعنوان المطلوب حتي لو لم يكن حقا يعرف هذا العنوان
انتقلت الي الشارع المصري لرصد آراء الناس حول هذا الموضوع وفي البداية قال سمير فعلا ياما حصلي هذا الموقف بس بصراحة ولازم اشهد ان المواقف دي ساعدتني على معرفة مصر من جميع اقطابها اللي غصب عليا كنت بروحها على ذمة المنصحين والمرشدين" بينما أشار شريف علي ان الشعب المصري بيحب الفتي ولذلك لا نجد أحدا يقول معرفش اضافة الي بعض الشباب المستهتر الذي يتخذ من هذا الموضوع مزحة لكن هناك بعض الناس الذين يعرفون حقا ولكن لأن مشاكل الحياة أرهقتهم فأصبحوا يرشدون الناس خطأ دون قصد أما كيفن هاني فيحكي " كنت راجع بعربيتي من طريق الاسماعيلية الصحراوي وكنت بس عاوز أعرف مدخل القاهرة ولما كانت الدنيا ليل وماقيتش حد اسألوه مشيت ورا اليفط المتعلقة وكانت المصيبة لقيت يافطة مكتوب عليها القاهرة وسهم للأمام فمشيت معاها بتاع ساعة وفجأة لقيت نفسي في مطار عسكري وهناك قالو لي ارجع زي ما جيت وادخل يمين واطلع الكوبري ولما وصلت هناك لقيت يافطة مكتوب عليها فايد فسألت بياع في الطريق فقال لي أنت ماشي كده صح ده طريق القاهرة ومتبقاش تصدق يفط الحكومة"
وقال فتحي أشرف "مهندس" ضاحكا : اللي ميعرفش يقول عدس . . هذا الموقف تعرضت له كثيرا والغريب أنك لو سألت 100 شخص علي نفس العنوان كل واحد سيرشدك الي طريق غير الآخر أما خالد مرسي "موظف في سنترال" فأكد انه صادف كثير من الناس بهذه الصورة حتي هو الآخر أصبح يكرر نفس الموقف مع الناس ومن يسأله عن طريق أو عنوان يقول له أي شيء وأضاف : مادام كل واحد بيفتي علي مزاجه يبقي لازم أضحك علي الناس زي ما بيضحكوا عليا " وذكر جمال رسمي "طالب" أنه يعشق تضليل الناس حتي أصبح هذا الموضوع هوايه لديه ويستخدمه للتسلية والضحك مع أفراد شلته وعندما سألناه عن السبب قال " مش عارف انا بحب اتوه الناس وخلاص ودي حاجة ظريفة بنضحك عليها طول اليوم في الجامعة " ثم أجاب علي سؤالنا هل يمكن أن يفكر في الكف عن هذه العادة ساخرا وقال :" وأبطلها ليه هو في أسهل من الكلام يمين في شمال وهتلاقيه في وشك علطول شوفتوا بسيطة خالص" في حين أشار حسن مصطفي "موظف" الي ان أن هذا الموضوع قد يحدث دون قصد فبعض الناس تتفاجأ بالسؤال ويصيبهم الارتباك وقد يؤدي هذا الي ارشادهم الناس بشكل خطأ رغم أنهم يعلمون الطريق وقد حدث مرة أن سألت شخص عن عنوان فقال لي ادخل شمال وهو يشير بيده ناحية اليمين وكان من الممكن الا انتبه وأسير وراء اشارة يده الخاطئة .
وذكرت عايدة "مدرسة" أن تغيير أسماء الطرق والشوارع من الأسباب الرئيسية التي تؤدي لهذا الارتباك وكذلك تشابهها فمنطقة العباسية كان اسمها قديما الوايلي ورغم تغيير اسمها الا ان قسم الشرطة فيها ما يزال يحمل اسم قسم شرطة الوايلي وأضافت : شوف بقي كام شارع في مصر اسمه شارع الجمهورية وكام جامع اسمه النور أكيد ده بيسبب ربكة كبيرة للناس يعني ودنك منين يا جحا والدليل علي ده ان في واحد سألني مرة عن عبد المنعم رياض فافتكرت أنه عايز يروح عبد المنعم رياض اللي في التحرير ووصفت له علي الاساس ده واكتشفت في الاخر أنه عايز يروح شارع عبد المنعم رياض اللي في المهندسين "
وضحك أمجد عبد المنعم "قائد سيارة" وقال لقد تكرر هذا الموقف معي كثيرا ولكن ما أغاظني كثيرا عساكر المرور كلما سألت واحد عن عنوان او شارع قال معرفش حتي لو كان واقف في نفس الشارع اللي بدور عليه واستطرد " تقريبا كلمة معرفش لها ارتباط بثقافة معينة عند الانسان المصري وفي مصر الراجل اللي ميعرفش بيدخل المحاكم وبيتبهدل وبيتخلع في النهاية وده تقريبا السبب في ان كل المصريين مبيخرجوش الكلمة دي من بقهم " وأكدت سمر الحسيني انها تتعرض للكثير من المضايقات خصوصا من الشباب عندما تسأل عن شارع ما وكل واحد يقول لها تعالي ورايا وأنا اوصلك او امش معايا أنا رايح هناك وذكر محمد الأسيوطي "طالب جامعي" ان أكتر موقف استغرب له لما راح يسأل واحد عن عنوان فبص يمين الأول وبعدين شمال قبل ما يوصف له وقال أكيد ده معناه أنه متردد ومش عارف حاجة.
بعدما قرأنا هذه الاراء قررنا النزول الي منطقة العبور باعتبارها منطقة جديدة ليس بها زحام وشوارعها معروفة ومنظمة بحيث لا تكون هناك فرصة للتداخل والارتباك بين الشوارع وبدأنا نسأل الناس عن عنوان معين وطوال ساعتين متواصلتين ضللنا الطريق بسبب وصفات الناس الخاطئة سألنا 12 فرد 10 منهم قاموا بوصف الطريق لنا وهم لا يعرفون و2 فقط هم من تجرأوا وقالا "معرفش" . . والسؤال الذي نطرحه هو لماذا يتصرف الناس بهذه الطريقة ويرشدون غيرهم بدون علم ولماذا تحولت كلمة معرفش إلي بعبع يخشي الكثيرون قولها؟
بينما وضحت د\ نبيلة أمين علي استاذ علم النفس بكلية البنات جامعة عين شمس أن الشعب المصري يمتاز بالكرم والتعاون ومساعدة الآخرين وهذا ما يجعل لديه الرغبة في ابداء التعاون والمشورة حتي لو كان لا يعرف وهذه هي المشكلة التي نقع فيها أننا نتحدث بدون علم بينما يفترض أن نقول ما نعرفه فقط لأن هذا يؤدي الي تضليل الناس ولكنه تضليل غير مقصود ثم أشارت الي ان الأشخاص الذين يتخذون من تضليل الناس هواية ووسيلة للمزاح لديهم نقص ويحاولون ان يثبتوا للآخرين أنهم يعرفون كل شيء ويتخذون من ذلك نوعا من أنواع اثبات الشخصية. ثم ذكرت ان بعض الناس عندما تسألهم عن عنوان ما يصيبهم الارتباك الناتج اما عن الخجل أو بسبب التخوف من السرقة والنصب وأضافت أن بعض الناس عندما تسألهم عن مكان ما ينظرون ناحية اليمين أولا ثم الشمال قبل أن يبدأوا بالحديث وهذا لا يعني الجهل أو التردد ولكن هي محاولة من الانسان لتجميع أفكاره والتذكر بشكل صحيح لاستعادة الخبرة والمعلومة حول هذا المكان ثم أشارت الي بعض النوعيات المتطفلة من البشر والذين يتدخلون في كل شيء فعندما توجه السؤال لأحد يقفزون الي قلب الكلام رغم أن السؤال غير موجه اليهم وهذا نوع من التطفل الذي يستخدم اما لاثبات النفس أو نوع من الغيرة لانك لم تطلب المساعدة منهم وطلبتها من غيرهم .
" وفي النهاية اقول لكم صلوا علي النبي يا بهوات انتوا تبصوا يمين وشمال وتحت وفوق وفي جيوبكم وبعدين تعدوا الشارع تعدوا ايه الشارع فاهمين هتلاقوه في العمارة اللي فيها ستارة زرقا وغسيل منشور وتحت منها 3 محلات تعرفوا تروحوا ولا تحبوا اجي أوصلكم أصل أنا كنت ساكن هناك وليا حبايب كتير ياما في الحتة دي بس المعلم حلمي صاحب القهوة اللي هناك راجل رذل واتخانقت معاه كتييير علشان صوت الكاسيت والطاولة طول الليل مبعرفش انام منهم ودايما بروح الشغل متأخر ويكتبوني تأخير أصل أستاذ قاسم اللي ماسك الحضور والانصراف الله يقطعه راجل بتاع روتين وسماوي. . الا صحيح انتوا كنتم عايزين تروحوا فين لحسن انتم معطلني وأنا مستعجل الله انتم رغايين كده ليه". منقول