عتاب و سؤال للكثير من الاعضاء - اين نحن من مقاصد الشريعة ؟
سلام عليكم
انا شايف اعضاء كتير هنا جزاهم الله خيرا بيبذلوا جهدهم في الدفاع عن الاسلام على قد ما يقدروا ضد اي تشويه و ضد اي محاولة لنشر الفاحشة و ضد اي محاولة لتحجيم الدين او تسفيهه او نشر المعصية و كل ده جميل و ربنا يجعله في ميزان حسناتهم جميعا و ربنا يجعلنا جميعا ممن يقفون في خندق المدافعين عن الدين
و ده تطبيق مهم جدا لأول مقاصد الشريعة ( حفظ الدين)
لكن .....
و آه من كلمة لكن ...
باقي مقاصد الشريعة
اقتباس:
قال الامام أبو حامد الغزالي: " ان مقصود الشرع من الخلق خمسة: وهو أن يحفظ عليهمدينهم ونفسهم وعقلهم ونسلهم ومالهم..فكل من يتضمن حفظ هذه الأصول الخمسة فهو مصلحة.. وكل مايفوت هذه الأصول فهو مفسدة ودفعها مصلحة.. وتحريم تفويت هذه الأصول الخمسة والزجر عنها يستحيل ألا تشتمل عليها ملة من الملل وشريعة من الشرائع التي أريد بها اصلاح الخلق."
انا مش شايف بصراحة باقي مقاصد الشريعة في اهتمامات اغلب السادة الأعضاء المحترمين
تعالوا نشوفهم
حفظ النفس:
خالد سعيد الله يرحمه , اللي بنقول ده تاجر مخدرات رغم انه لم يثبت ادانته , و رغم ان ماحدش خالص جاب سيرة انه هدد حياة المخبرين اللي قتلوه و بالتالي فهو قتل بدون وجه حق حتى لو كان في ايده طن هيروين, هل تبرؤنا من حق القصاص لواحد زي ده يرضي ربنا و يحقق مقاصد الشريعة ؟ ....اللي حصل ان الجماعة بتوع حقوق الانسان هما اللي جريوا ورا قضيته بدافع انساني صرف رغم ان ديننا بيدينا دافع اقوى منه لطلب القصاص لإنسان بأمر من ربنا سبحانه و تعالى
بلاش خالد سعيد
سيد بلال الله يرحمه, اللي لمجرد الاشتباه , و حتى ما نعرفش اشتباه ليه اتاخد من بيته و رجع جثة هامدة ... حد فينا اتكلم ؟ هل سيد بلال اتقال انه تاجر مخدرات زي خالد سعيد ؟ لأ , هل اتقال عليه اي حاجة ؟ لأ , هل اي حد دافع عنه ؟ للأسف لأ , الجماعة بتوع حقوق الانسان لقوه راجل سلفي و السلفيين مش بيدافعوا عنه , فما اتمسكوش بقضيته زي خالد سعيد , لكنهم برده بيذكروها ...... للأسف ماحدش فينا عمل كده , لو قلنا اننا التبس علينا الامر مع خالد سعيد , فاحنا مالناش ادنى عذر مع سيد بلال
ظهر موضوع جديد , قصة اختبارات العذرية , جرينا نكذب الموضوع بدون تحقق بدون اي شيء , احنا مش عارفين ده حقيقي ولا كذب , هل طالبنا بالتحقيق فيه و تابعنا التحقيق و درسناه بعقولنا ؟ لأ احنا قلنا دول بنات صيع ايه وداهم الميدان في نص الليل , مع انهم اتقبض عليهم بعد العصر على طول , و حتى لو في نص الليل , فما اعتقدش ان ربنا اباح هتك عرض امرأة بحجة تواجدها لوحدها في الشارع بالليل .... يعني فيه جريمة تم طرحها تحت سمعنا و بصايرنا , و كذبناها بدون اي دليل بيقول انها كذب و ما طالبناش حتى بالتحقيق فيها , كل ده لمجرد ان واحد ايا كان قال دول بنات صيع .... هل ده يرضي ربنا يا حضرات ؟
نقط حفظ النفس كتير مش هانخلص منها, و للأسف انا شايف اننا مقلين جدا في الاهتمام بيها ....و مش فاهم ليه
حفظ العقل و النسل ما عنديش عليه ملحوظات
حفظ المال , هاسأل سؤال واحد كبداية للنقاش , كام واحد فينا قرر انه يقود حملة للمطالبة بمحاسبة من سرقوا مالنا و مال ولادنا ؟ و كام واحد فينا قرر انه يقود حملة لفضح اي حد يطلب اتاوة او رشوة ايا كان موقعه ؟
منتظر ارائكم