الموضوع: خاص لمن يريد شراء سياره جديده

شكرا طبعا للأستاذ صاحب الموضوع..

و أنا شخصيا أشتغلت قبل كدة عند معرض شهير هو فرع واحد فقط بس اشتهر بسرعة أوي و لو اني أسمه علي اسم الـ.... ما علينا لحسن يقولوا تشهير و لا حاجة و انا مش ناقص........
المهم زبون جه وانا واقف و كان راجل كبير و معاه زوجته و راكبين عربية فيات131 تعبانة و نزلوا منها واضح انهم واخدين مكافأة المعاش مثلا و هيحطوا جزء منها و يمكن كلها في عربية المهم الراجل و مراته واضح انهم مش فاهمين في العربيات أوي و دخلوا سألوني عن عربية في رينج تقريبا من 60 الف لـ 80 ألف حاجة كدة المهم قلت لهم في هيونداي فيرنا و في هيونداي أكسنت و في دايو لانوس و في دايو نوبيرا و و و و و دي مميزاتها كذا و دي مميزاتها كذا و في عربية أسمها بروتون قالوا لي أيه بروتون دي قلت لهم عربية صناعة ماليزية و دورت لهم العربية و دخلتهم يتفرجوا عليها و كله تمام و لقيت زميل داخل عليا و بيقول لهم علي فكرة حضرتك العربية دي مش ماليزي زي ما زميلي قال لحضرتك (اللي هو انا) دي ياباني و طبعا كلامه مفيهوش أي شئ من الصحة لأني عارف و متأكد من كلامي و مشي الزبون بعد ما شكرنا و طبعا حس اننا بننصب عليه و قرر أنه ينسحب و يمشي هو و زوجته بالـ131
و لقيت زميلي (العزيز الصادق) بيقولي اوعي تقول لزبون اني العربية دي ماليزي قلت له ليه قال لي عشان تبيع قول لهم ياباني و بعد اذنك بقي عشان رايح أصلي!!!!!!!!!!!!!
بصراحة صعقت و أكيد حاليا بيبيعوا العربيات الصيني علي أنها ألماني.
حاجة غريبة و الضمير انعدم و مفيش ثقة في حد للأسف و كأني دي هي أصول البيع و الشراء و التجارة!!!!!!!!!!!
و بجد يا جماعة أرجوكم أي حد معندوش خبرة ناوي يروح يشتري ياخد معاه حد يكون بيفهم في العربيات كويس و الكلام ده للزيرو قبل المستعمل عشان محدش يضحك عليه أو يغشه.