الموضوع: ايه اكتر موقف شيبك وانت سايق العربيه (يعنى) حد كسر عليك او كنت هتخبط فى عربيه او شخص

والله موضوع جميل ومواقف صعبه فعلا

الف حمدا لله على سلامه الجميع
وربنا يستر طريقنا جميعا

الموقف ده حصل معايا من 6 أو 7 سنين تقريباً
كنت مع إبن عمي و كنا جايين من شيراتون رايحين على عمارات العبور .. و في الفترة دي كان إبن عمي من النوع اللي بيجري جامد و ياخد غرز غشيمة شويتين .. فكان بيجري في صلاح سالم و مقضيها غرز هوب الطريق زحم فماشيين براحة لقينا فورد توروس جاية جنبنا فيها إتنين رجالة كبار بتاع 50 سنة تقريباً واللي سايق من ناحية إبن عمي بيشتمه بأمه ... فإبن عمي تلقائياً راح شاتمه بنفس الشتيمة .. راح الراجل كاسر علينا و موقف الطريق و راح نازل من العربية هوة و اللي معاه .. إبن عمي ساعتها كان بيلعب تايكوندو و كان معاه حزام أسود فنزل بقى مش هامّه عامل حسابه لو قلبت خناقة إنه مش هيتضرب و نازل يشتم بقى و داخل يمسك في الراجل و أنا كنت لسة نازل من العربية .. هوب لقيت الراجل بيزعق بأعلى صوته و بيشتم و راح مادد إيده في المنطلون و مطلع طبنجة 8 مم و موجهها ناحيتنا و بيزعقلنا بأعلى صوته " خشوا جوة العربية ياولاد التيييييييييييت " !! منظر الراجل ساعتها كان يخض لأنه كان أبيضاني و وشه أحمرررررررر بطريقة غريبة ... طبعاً إحنا وقفنا متثبتين بتاع نص دقيقة كدة و هوب رحت أنا ناطط في العربية و إبن عمي ورايا .. الراجل ركب عربيته و مشي ..و إحنا من كتر سيبان الرُكب متحركناش بالعربية!
و من ساعتها تقريباً إبن عمي بطَل يجري في صلاح سالم تاني

الحكاية دي حصلت معايا ايام اللانوس
ماشي على البحر و في امان الله
واحد من اللي بياخدو الطريق كلة غرز دا اخد غرزة من ورايا وطالع قدام فا عربية قفلت علية .. لقيتة بيرمي عليا فا انا تلقائيا رايح الحارة التانية بعد ما اتأكدت ان مفيش حد ورايا .. بس متأكدتش من اللي قدامي
لقيت الحارة فاضية عشان فيها عيلة كاملة واقفة عشان تعدي الطريق .. طبعا مع فرامل اللانوس اللي كانت بعافية مكنتش هلحق نفسي .. رحت رامي على الواد بتاع الغرز دا تاني و الحمد لله عدت على خير

انا كونت مسافر زمان بعربيتى الاولى 128 و اكنت موديل 74 ياعنى مفيهاش سيرفوا !!! المهم كونت ماشى حوالى 110 و دى طبعا سرعه لايستقل بها فى 128 المهم كونت ماشى على طريق زراعى و كان فردى و فجاءة سائق عربيه ربع نقل يركن على اليمين فى المقبل و يعدى الشارع من غير ميبص ولا يمن ولا شمال و انا جاى فى وشه الحصل انى وقفت على الفرامل لدرجه ان الكوتش طلع دخان ابيض و كونت بحول اكسر بعيد عنه بالعفيه ( طبعا مش معايا abs ) و المهم فديته و هو فى نص العربيه او بمعنى اصح جمبى لقيت ان شنطه العربيه هتشيله لان العربيه حدفيت عليه من ورا بس السرعه رحت سايب فرامل بسرعه علشان العربيه تتعدل و اعرف اتحكم و الحمد لله ملمستوش بس الموقف كان معجزه بالنسبه ليا لدرجه ان الناس فى العربيه الورايه قالوا 100% تصرف سليم وانا طبعا كونت صغير و فرحت جدا بس طبعا دمى هرب و فضلت وقف بتاع 5 دقايق كده و بعدين مشيت

انا قبل كده كنت طالع الدائري انا و صحبي و بنجري المهم الي بيطلع الدائري
من مدينة نصر هيعرف الحته الي بقول عليها الي هي في لفه جامده كده
عند المقابر و انت رايح هتلف من عند بنزينة وطنيه
بس و انا بجري بقه معاه وناسي ان فيه لفه بس لقيتها صاحبي الي جامبي
قعد يقولي اهدى اهدى بس دوست فرامل و تقريبا الكاوتش اليمين كان تحتيه رمل
بس العربيه عرضت من وره كده و حيسيت انها بتترفع عليا بس شلت رجلي من على
الفرامل العربيه عدلت تاني و بعدين هديت وتاني و دخلت بقه و خلاص بس الحمد لله
عدت على خيييييييييييييييييير

موقف عمري في حياتي ما نساه
كنت انا و اصحابي زمان راجعين من بورسعيد كانا حوالي 8 اشخاص ...5 في عربيتي و 3 في عربية صحابي انا كاان معايا مرسيدس W114 280 و صحبي معاه Pontiac Trans AM ماشين طول السكه كابسين ورا بعض و بنجري و غرز و كلام من دا
طبعا مع العلم ان البونتياك (امريكي كوبيه هيا) موتور 8 سلندر 6600 سي سي يعني استحالة المرسيدس ال2800 سي سي تعمل معاها اي شي المهم و احنا راجعين الوضع كما يلي صحابي قدامي و انا ماشي وراه جه واحد ببي ام E30 لونها كان برتقالي و معدلها و كبس وريا و اعد يرعشلي و شدنا مع بعض طبعا اللي يذكر انا و البي ام يعني كنا بنشد ام البونتياك دي كانت بتجري بس
كان في عربيه نقل في وسط الطريق و في الشمال عربية نقل محمله حديد تسليح و اليمين خالص عربية ملاكي ف السكه قدامنا قفله و مافيش الا قدام العربية بتاعت الحديد و العربية النقل حته صغير تدخل عربيه بالعفايه و طبعا بتضيق لان الراجل عايز يفتح لنا السكه ف انا و صحبي ماشنا ورا عربيه الحديد بحيث ان اول ما يعدي العربية النقل اللي في النص نعرف نجري تاني لقيت علي غير اي توقع بتاع البي انم الله يجزيه راح جاري جامد و عايز ياخد غرزه من قدام عربيه الحديد الحته اللي متضيق وراح داخل مره واحده ف مسافة متدخلش عربيه راح الراجل بتاع عربية الحديد ماسك فرامل و صحبي ورا بالضبط راح الحديد طار من العربية و دخل في عربية صحبي و انا شديت فرامل و خدت العربية اقصي اليمين و صحبي العربية بتلعب منه و مش بيفرمل و الحديد دخل جوده الكابينه و العربية بتخبط شمال و ترد و لا اكنها في فيلم اجنبي و وققت العربية و انا نزلت انا وا صحابي من عربيتي و رحت ببص علي العربية لقيت كلها دم من عند باب اليمين و الشباك كله دم و فتحت الباب ...طبعا انا مش عايز اوصف وصف دقيق بس الحديد كان مرشق في الكابينه و بالذات في الحته اليمين و صحبي الله يرحمه كان جسمه كله متبهدل من الحديد
طبعا انا اغم عليا و اصحابي بردو اغم عليهم بقي مشهد مرعب و هيستيري كل شويه تلاقي واحد واقع علي الارض و مش عارف تعمل ايه و لا تلاحقها منين ماكنش فيه الا سواق العربية النقل و عربية الحديد و كانوا بيحاوله يطلعوا صحبي من الشمال لان الباب كان اتعجن و مش بيفتح و الناس و الله كنت بتقف محدش منه قدر يعمل حاجة ....ياما ناس تجيي تبص و تقول لا حول ولا قوه الا بالله يا اما يتصعقوا من المنظر و يغم عليهم او يمشوا ...و اعدنا نحاول نطلع الحديد من العربية لحد ما الاسعاف جه
الناتج النهائي صحبي اللي كان في اليمين الله يرحمه و اللي سايق رجله الاتنين و ضلوعه اتكسرو كسور مضاعفه و شرخ في الحوض و ارتجاج في الجمجه و حاجات اخري انا مش متذكرها بس هو كان في بدله جبس حوالي 6 شهور و اللي كان ورا جاه انهيار عصبي لانه للاسف هو اللي شاف كل حاجة بعينه و كدمات ....العربية كان ممكن تتصلح بس اتباعت خرده
و انا اتعلمت درس كبير من الحادثه دي و بقيت بسوق بعقل و بهدوء و حرمت اشد مع حد خالص و اتيقنت ان مهما كانت العربية قويه و ممتعه متستحقش اني اموت او اموت ناس بسبها و الهدف كله اني اوصل سليم
و الحمد الله المصابين اتعافوا و اتعلموا لدرجة اني صحبي اللي كان متددغدغ دا بركب معاه الاقيه ماشي 90 اقوله يا ابني اجري شويه عايزين نوصل يقولي هيا كده بتجري الاول دا كان منتهي التهور و الجنون