ايه اكتر موقف شيبك وانت سايق العربيه (يعنى) حد كسر عليك او كنت هتخبط فى عربيه او شخص

**memo823000** · 12-06-2011 09:58 PM

ايه اكتر موقف شيبك وانت سايق العربيه (يعنى) حد كسر عليك او كنت هتخبط فى عربيه او شخص

على قكره الموضوع شامل لكل الاقسام مش لشيفورليه بس

اصل انا حصلى مواقف تشيب وفعلا حزام الامان ده اهم حاجه فى العربيه

وهحكيهم بس لما اسمع الاعضاء الاول

بس انا عايز شرح تفصيلى عشان نتخيل الموقف كويس مش كلمتين وخلاص

ويجعله عامر (حبيبى والله ياعمده) انت دمك زى العسل

**medo500** · 13-06-2011 05:20 PM

فكرتني بالذي مضي ياباشا زمان كنت في السعودية وكان معانا كابريس كلاسيك وكنت مسافر بيها للرياض والطريق للي مايعرفش طرق السعودية عرض الطريق 10 حارات في كل اتجاه وبين الاتجاهين حاجز خرساني كنت دائما اشغل مثبت السرعة واعيش مع نفسي في كل السفريات بالمنظر ده لغاية ما في اليوم ده كرهت حاجة اسمها مثبت السرعة ساعتها كنت ماشي تقريبا 170 او 180 وماشية امامي سيارة نصف نقل وكانت المسافة بيني وبينه حدود 30 متر تقريبا واحنا الاتنين ماشيين اقصي اليسار وفوجئت بدون اي مقدمات من سائق السيارة النصف نقل دي انه وجد حتة مكسورة في الحاجز الخرساني الي بين الاتجاهين فقرر انه يلف منها طبعا علي سرعة رهيبة كده مستحيل راح ضارب فرامل مره واحده وراح لافف من خلال الفتحه الصغيرة الي في الحاجز كل ده في خلال ثانيتين او 3 ثواني طبعا انا مش عارف ازاي ربنا سترها ومالبستش فيه بس كل الي عملته اني كسرت الدريكسيون اقصي اليمين والعربية عندي قعدت تعمل اخماس في اسداس من ستر ربنا ان الطريق كان فاضي ساعتها وإلا كان حصل ما لا يحمد عقباه طبعا بتاع النص نقل اول ما شاف عربيتي بتعمل كده اخد ديله في اسنانه وقال يا فكيك وتوته توته خلصت الحدوته وربنا يستر علي الجميع ان شاء الله

**zidaneelwaly** · 13-06-2011 07:41 PM

كنت نازل الصبح بدري رايح مشوار فسخنت العربيه عادي و حسيت ان في حاجه مش مظبوطه اول ما اتحركت بالعربيه فقولت اكيد عشان ماسخنتش كويس ماشي 70 80 90 100 ابتديت اشم ريحه مش كويسه طالعه من التكييف قولت حسبي الله و نعم الوكيل اكيد الفلتر مليان تراب و لما وقفت بالعربيه نزلت و مشيت

رجعت لقيت ريحه العربيه زي ماتقولو ........ بصيت تحتها مفيش حاجه طيب في الشنطه مفيش بردو دورت العربيه لقيت في صوت عالي من الكبوت اول مره اسمعو المروحه شغاله بس بترزع
امت فاتح الكبوت بالصدفه لقيت منظر بشع المرحومه القطه متفرتكه و اعدت في الارض مش عارف اعمل ايه و الناس رايحه جايه تتفرج عليا بس الحمد الله قولت لوالدي خد اتصرف انتا مع العربيه عشان بطني مقلوبه

اظن كده موقف تفصيلي عشان يعيشك في الجو يا ميمو

**yoko** · 13-06-2011 07:51 PM

كنت هتفرم بين مقطورة وباسات في غرزة من اليمين على الدائري وكاسر ال٢٠٠كم\س!!!!

وبلاش شتيمة عشان عارف إني غلطان ومكررتهاش تاني

**destaroser** · 13-06-2011 08:18 PM

كنت مسافر اسكندرية ومعايا مراتي والاولاد الساعة كانت 4 عصرا وبعد بوابه القاهرة بـ 40 كيلو في اتجاه الاسكندرية كان قدامي ماتريكس على بعد 15 متر منى وانا كنت ماشى بسرعة 100كم/س (احنا الاتنين فب الحارة الى في النص)وفجاءة لقيتة بيرقص قدامي يمين وشمال انا قلت ده اكيد سكران او بيلعب بالعربية وفجاءة لقيتة انحرف ناحية الشمال وخبط في الحاجز الخرسانى واتقلب في نفس اللحظة لقيت فيرنا سودا جايا عكسي طايرة وماشيا في الحارة الى فى النص اتاري الغلبان بتاع الماتريكس كان بيحاول يفاديها (عشان كدة كان بيرقص بالعربية) وفاديت الفيرنا والماتريكس بمعجزة ومعرفتش انا عملت اية بالظبت (مراتي قالتلى بعدين اني جيت شمال فاديت الفيرنا وبعدين رديت يمين وفاديت الماتريكس) ووقفت على اليمين وحاولت القط نمرة الفيرنا ولكن مالحقتش وجريت على الماتريكس الى كان فيها راجل ومراتو وسواقين النقل اتلمت وطلعناهم الحمد لله سلام وطلبت النجدة والاسعاف (عربيتين اسعاف جم بعد 5 دقايق بالظبت والنجدة بعد 1:30.

اشكر الله الى نجاني انا وولادى وزوجتى واشكر عربيتي اللى للولا ثباتها مش عارف كان حيبقى ايه مصيري

**zidaneelwaly** · 13-06-2011 09:16 PM

بردوا في صلاح سالم كنت ماشي 90 -100 الطريق فاضي بس كان قدامي تلات عربيات في التلات حارات و غالبا ماشيين بنفس السرعه و نفس المسافه فجاه العربيه ألي قدامي انحرفت يمين مره واحده و هوب ب ب ب ب ب ب لقيت واحد واقف في نص الطريق معرفش يكمل تعديه الشارع ادامي بحوالي 3 متر

و كويس انو متحركشي كان زمانو طار و انا في طره ربنا ستر الحمد لله فاديته بعجوبه و تقريبا قفلي المرايا اليمين

**zidaneelwaly** · 13-06-2011 09:25 PM

كنت راجع من مدينه نصر و نزلت من كوبري 4.5 في اتجاه شيراتون و كان يوميها الدنيا بتشتي بغزاره من حوالي شهرين كده فطبعا ماشي 60 70 بالكتير اوي ي

لغايت بنزينه وطنيه كدا كانت في عربيه النترا ماشيه جمب مني 70 نفس سرعتي و الطريق بيلف بينا عند دخله المطار الارض كانت ناشفه شويه فقلت ازود 80 و الالنترا علي يميني و انا علي الشمال فجأه ببص علي الالنترا لقيتهه بتلف (دريفت) جمب الرصيف و بعد كدا نزلت في حفره مليانه ميه لقيت زي موجه كدا ادامي غطت علي الازاز لمده 3 ثواني كده و مش شايف نهائيا و كنا باليل ساعيتها و والدتي صرخت امت عامل المساحه و دايس فرامل العربيه اتزحلقيت شويه بس ظبطتت تاني الحمد لله و قعدت بعد الحوار ده تقريبا ساعه مش مصدق اني نجيت الحمد لله

في مواقف تانيه بس مش عاوزقو تزهقو مني

**nevozaky** · 13-06-2011 09:40 PM

هاحكى لكم على موقف .كنت لسه متعلمة السواقة فى الاول وماشية تقريبا على 90 وبعدين لقيت الطريق فاضى اودامى .فجيت علشان الف قلت ما دام الطريق فاضى هاخد الملف على سرعتى .فبلف على نفس السرعة فلقيت عربية معرفش ظهرت منين
بتلف من تحت الكوبرى .زى كانه ماشى على الزراعية تماما من غير ما يهدى .المهم مش هطول عليكم العربية عامت منى واتفديت العربية التانية باعجوبة .وربنا ستر.بس انا اتخضيت جدا ومسكت اعصابى بصعوبة
طبعا انا كنت غلطانة وفرحانة بنفسى .ضيفوا بقى على كده غشومية السواقة فى الاول .
وكمان صاحبنا اللى كان بيلف وفاكر نفسه ماشى على الزراعية .ههههههههههه
ربنا يسترها معانا كلنا
الحمد لله ربنا ستر