الموضوع: توكيلات السيارات؟؟؟؟!!!

المشاركة الأصلية كتبت بواسطة osama_alam

- يا جماعة انا عاوز اعرف حاجة هوه لازم اشتري عربية تكون داخلة البلد عن طريق وكيلها؟؟؟
- حد يعرف طرق تانية؟؟ وهل لو موجوده مش حتبقه ارخص (يعني سعر السيارة +الجمارك - ربح الوكيل) ؟؟؟
-هل السيارة المشتراة من بره التوكيل (مستودره) يتم صيانتها عادي عند الوكيل ام لا؟؟؟

:-)

استاذ اسامة .. اهلا بيك .. بصفتي شغال في توكيل ميتسوبيشي في مصر وده من أكتر التوكيلات اللي عربياتها بيجي كميات ضخمة منها من خارج التوكيل هارد على اسئلة حضرتك :

- السبب الرئيسي لشرائك العربية من التوكيل هو الحصول على الضمان اللي بيوفره الوكيل لسياراته فقط
طبعا اكيد حضرتك عارف ان الضمان حاجه والصيانة حاجه تانية - يعني الضمان معناه ان لو تلفت احد أجزاء السيارة غير المستهلكة خلال فترة الضمان اللي بتصل الى 100 ألف كيلو دلوقتي عند معظم التوكيلات فهيتم تغييرها في التوكيل مجانا وعلى حساب الشركة الأم يعني التوكيل مش خسران حاجه وبالتالي مش هيكون حريص على اضاعة حقك ، وكلمة المستهلكات مقصود بيها (الفلاتر والسيور وتيل الفرامل واسطوانة الدبرياج)
أما الصيانة الدورية فهي عملية الاصلاح وتغييرات المستهلكات في أوقاتها المحددة من الشركة الأم وده في ميتسوبيشي بيكون كل 10 آلاف كيلو متر.

- طبعا اشهر طرق ادخال العربيات الى مصر بخلاف الوكيل هو ان يقوم معرض او شركة بالاستيراد من دول الخليج وعلشان كده تسمع ان فيه لانسر (أو ماركة تانية) خليجي - سعودي - كويتي - اماراتي - عماني وده غير كمان اللانسر الأردني

وعلشان مستوردي العربية الخليجي يتخطوا مشكلة ان التوكيل بيعلن بوضوح ان العربية الخليجي مش مضمونة عنده فاما بيكون عنده مركز خدمة بيعلن ان الضمان والصيانة بيتم عنده أو بيتفق مع احد مراكز الخدمة على ان المشترين منه هيعملوا الصيانه عنده والضمان كمان عنده

- طيب هل السعر أرخص - بيقل الخليجي عن المصري شوية (حوالي 5000 - 7000 جنيه) طبعا الموضوع بيفرق كمان حسب الكماليات يعني ممكن الكماليات تفرق حسب الدولة الخليجية اللي هي أصل العربية. طبعا مع ملاحظة مثلا ان اللانسر (على سبيل المثال) ياباني سواء خليجي او مصري أو أردني (انما دي مسميات البلد اللي تم الشحن لها من اليابان) لكن مثلا التويوتا كورولا 2008 فالخليجي ياباني والمصري جنوب أفريقيا

- بخصوص العربية من بره التوكيل يتعمل لها صيانة في التوكيل ولا لأ - فيه توكيلات بتقول لأ - وفيه بتقول آه لكن الجميع متفق ان مفيش ضمان - وفيه آه مع زيادة في التكلفة عن العربية المصري (بتاعة التوكيل)

عموما حضرتك حدد بتفكر في ايه بالظبط ورجال المنتدى هيفيدوك اوي في اي حاجه ناوي عليها باذن الله