الموضوع: اسعار النترا من داخل غابور -- اعادة

لو كانت الاسعار دى صحيحة فاعتقد اسعار اول فئة مانيوال و اول فئة اتوماتيك مقبولة شوية لانها نازلة فيها فوانيس شابورة و تارة مالتى فانكشن و اشارات فى المرايا و و .... مع انها مفهاش اى عوامل امان بس فيها اربع عجلات الحمد لله

اما الفئات الاعلى فاستهبال رسمى و سعرها مبالغ فيها جدا على الكماليات البسيطة اللى فيها و مش مقنعة او فيها حاجة غلط, يعنى معقولة اعلى فئة من الالنترا بى 155 الف مفهاش بلوتوث و الاكسنت اللى بى 106 الف فيها بلوتوث!!! و كمان مفهاش مرايات ضم كهرباء و لا كاميرا خلفية و لا مرايات ذاتية التعتيم ذى اللى فى السيراتو اللى 130 الف!!!
و فين باقى الاوبشن زى الكاسيت التاتش سكرين + gps + كراس كهرباء + زينون + 6 ايرباجز + سنسور امامى + بلوتوث + كاميرا خلفية + مرايات ضم + مراية ذاتية التعتيم + ....

كمان غابور حاسب الايرباج الواحدة بى 2000 , و الاثنين بى 4000 و ال abs بى 4000 و الجنوط بى 6000!!! اسعار مبالغ فيها جدا فى الكماليات البسيطة دى, و تعالوا نقارن:

مثال 1 السيراتو ex و السيراتو sx -- اول مانزلوا لانى مش عارف سعرها دلوقتى:



سيراتو ex كان سعرها 109 و sx كان سعرها 116 يعنى فرق 7 الاف قصاد الاوبشن التالية:

• فرامل abs
• 1 ايرباج اضافية
• تكييف تاتش
• سنسور خلفى
• عدادات رياضية
• شكمان نيكل رياضى
• جنوط 17 بدل 16
• نيكل فى الشنطة و البيبان و الدواسات
• فرق فى خامات الفرش الداخلى + خياطة اسبور باللون الاحمر

كل دة توكيل كيا حسبة بى 7 الاف جنية, شوفوا بقى غابور كان حيحسبهم بكام على اسعار كمالياتة دى!!!




مثال 2 فيرنا هاف اوبش و فول اوبشن -- من عند غابور نفسة, فرق السعر 3500 جنية قصاد الاوبشن التالية:

• زجاج كهرباء
• سنتر
• انذار
• عداد rpm
• ساعة
• كرسى السائق بيعلى و يوطى
• دركسيون بيعلى و يوطى
• فتح الشنطة من الداخل
• مرايات بلون السيارة
• نواكل فى البيبان + فرش فى البيبان + خامات الفرش افضل
• الكنبة الخلفية قابلة للطى
• استوب خلفى
• مسند يد للسائق

كل دة بى 3500 جنية فقط, معرفش لية بقى الاستهبال فى اسعار كماليات الالنترا دى!!!! علشان كدة انا مش مقتنع و متاكد ان فى حاجة غلط و اكيد فى كماليات ناقصة قصاد الاسعار دى... و اللى ياكد ان فى حاجة غلط ان الاكسنت معقولة يكون فيها بلوتوث و الالنترا اللى بى 155 الف مفهاش!!!

هوا لسه بيشيل الايرباج !!!!


يعني ايه اشتري عربيه ب 139 و الاقي فيها ايرباج واحده ايه الهبل دا ؟

المشاركة الأصلية كتبت بواسطة virus2007

اعتقد الاسعار منطقية ولاكن بزيادة كماليات فى الهاى لين عن الى مكتوب

عامتا مش حنستعجل كلها كام شهر وحتنزل ونشوف !!

باشا الاسعار منطقية ازاى بس؟؟ طب بص على الفئة اللى بى 143 الف و قارنها بالسيراتو الهاى لاين, حتلاقى السيراتو فيها كل الاوبشن دى بالاضافة الى :

• فتحة سقف
• بصمة
• فرش جلد
• بلوتوث
• كاميرا خلفية
• مرايات ضم كهرباء
• مرايات ذاتية التعتيم
• عتلات فتيس فى المقود

و سعرها خليجى بى 132 الف موديل 2012, يبقى ازاى سعرها منطقى؟؟؟ يعنى اوبشن اقل بكثير و سعرها زيادة 11 الف جنية!!!!



طب احنا لما كلنا شوفنا الالنترا قبل ما تنزل اية اللى عجبنا فيها و خلانا نتوقع انها حتكون غالية؟؟؟ انا شخصيا عجبنى التالى:

• الركن الالى
• السنسور الامامى
• الشاشة التاتش ال 7 بوصة + GPS + كاميرا
• الكراس الكهرباء
• الزينون
• مثبت السرعة
• الماتور ال 140 حصان
• التكييف ال dual
• المرايات الضم
• البلوتوث
• 6 ايرباجز

و هو دة اللى عجبنا فى العربية و خلانا نتوقع انها حتنزل غالية و اغلى من السيراتو طبعا....لان كلنا توقعنا ان كماليتها حتكون اعلى بكتير زى ما شوفناها على النت, لكن بالاوبشن التعبانة دى لية يكون سعرها كدة؟؟؟ مهى كدة نسخة من السيراتو و السيراتو نسخة منها, نفس الفتيس و انظمة التعليق و كل حاجة!!!

اسعار معقولة جدااا لو نزلت كل فئة 5الاف..الخوف كل الخوف لو الناس اتزاحموا عالعربية مليون المية حيزود سعرها لان الزبون كدا كدا حيتوهم بالشكل ولازم حيشترى

تمام كدة, انا بقول انها تستاهل 160 الف و اكتر كمان بس تنزل بكل الاوبشن اللى كاتبها فوق ما عدا الاتو بارك. و قلت الكلام دة قبل كدة من اسبوع فات و ناس كتير اعترضت ان ازاى النترا سعرها يكون 160 الف, و استكترو السعر دة على الشاشة التاتش و ال gps و الزينون و الكراس الكهرباء و السنسور الامامى و ال 6 ايرباجز و الماتور ال 140 حصان!!! تلف الايام و غابور يسعرها بى 155 الف على شوية اوبشن تعبانة.
انا اللى مضايقنى انى استنيت كتير العربية دى و حاسس انى استنيت كتير على الفاضى, يا رب تكون الاوبشن دى غلط و فى اوبشن تانية ناقصة تستاهل فرق السعر دة.