الموضوع: فى حد ممكن يشرح فكرة تخيلية للمارش لو سمحتم؟

السلام عليكم
النهاردة رحت المرور اطلع الرخصة
خلصت امتحان الاشارات


المهم انا صاحية من امبارح الساعة 3 العصر فمرحتش بعربيتى اساسا وخدنا تاكسى
اتفاجئت وقت السواقة المهندس الفنى جاى يقولى بطاقتك ورخصة السيارة اللى هتسوقيها لازم تكون عربيتك
طلع الراجل الزفت الواسطة راجل بخيل ونتن عاوز يخلى المهندس يخلص الشغل وياخد هو مننا فى الاخر الفلوس وميديهوش حاجة والمهندس شكله فهم ان احنا اللى مش هندفع
المهم المهندس طبعا مكنش جاى للبطاقة ولا نيلة كان جاى يقول بالذوق هاتوا الرشوة
انا واخويا بحسن نية اديناه البطاقة فعلا متوقعناش انه هيلبسنا فى الحيطة كده
راح بسلامته خد البطاقة ورخصة عربية الراجل اللى معانا مرسيدس وانا عربيتى نيسان صنى
قالى اهى اتوماتك زى بتاعتك وامتحنى عليها يا نهار اسود
عربية معرفهاش وادخل بها امتحان معرفوش يا خرابى((( تخيلوا طالب كلية تجارة يروح يمتحن تشريح فى كليه طب)))
النتيجة طبعا انى كنت هسلم على الحيطة فرامل الراجل مش سريعة زى عندى ورجلى اكيد متعودتش ولا بتاع
ولا متدربة على الامتحان ولا عربيتى ولا نايمة غير الرعب النفسى من وجود ناس كتير بتتفرج على
وطبعا سقطت بتفوق غير مسبوق بصراحة((بصراحة سقوط مشرف سيبكم بردوا الواحد لازم يسقط بجدارة اشمعنى يعنى النجاح بجدارة وتفوق))
لدرجة ان الرائد قالى بس كده شكرا وضحك وانا اتحرقت جدا وخدت الموضوع شخصى بقى لا تعليم ولا زفت
ولان فى حد نيلة معرفة بدل ما ياجلنى 3 شهور اتاجلت اسبوعين
المصيبة دلوقتى انى لازم اتمرن لانى ان رحت تانى حتى بعربيتى انا فاشلة فى انى اقتنع بشىء مش شايفة ان له لزوم
بيقولى اصل لازم تعرفى ترجعى حرف الاس افرضى خبطتى حد وانتى ر اجعة
على اساس انى هسوق فى الرجوع على 100 مثلا
لازم انجح يعنى لازم انجح حتى لو مش له انا محبش ابقى بشغل اى شىء ومش فاهمهاه او عندى قصور فى فهمه
اللى فاهماه عن المارش انى لو عاوزة اروح شوية يمين الف الدركسيون شمال
ولو عاوزة اروح شمال الفه يمين لو الفكرة دى اللى مركزة فى مخى صح افتكر كده انى عرفت اتخيل والباقى مجرد تقدير

فين الناس الحلوة اللى هتحلقنى هنا ينوبكم ثواب فى بدل ما ابقى بعربية من غير رخصة واقف زى الكتكوت المبلول واقول لاى ظابط اصلى معرفش وانا محامية انى لازم اسوق برخصة ههههههههه
الظابط كان نفسه ياشرلى بس مديتوش اى وش ينفع ياشر به زمانه بيدعى على بدل ما انا اللى ادعى عليه لانى حرمته من الفلوس وسقطت مكنش ينفع ينجحنى ولو بالفانوس السحرى حتى هههههه