السلام عليكم ورحمة الله وبركاته
بعد اللى حصلى النهاردة وغلطتى الكبيرة اللى الله اعلم هتكلفنى كام ده غير حرقة الدم فكان لازم التحذير.
مبدئيا حجزت النهاردة ميعاد صيانة ال30000 لنيو اكسنت ورحت واتعملت الصيانة تمام التمام والحمد لله وبمساعدة عضو معانا هنا.
وخلصت فى الصيانة وطلعت على الهياكل لمشكلة فى مكنة الازاز والحمد لله اتعملت وشغالة لحد دلوقتى.
المهم بقى وانا خارج من الهياكل.اجراء طبيعى انهم بيفتحوا الشنطة يبصوا بصة لو العميل خد حاجة ولا حد حط فيها حاجة.
وذهلت اننى لقيت غطا الفانوس الخلفى شمال مفكوك ومرمى فى الشنطة وفوطة صفرا زفرة مرمية جنبه وقلت يمكن لقوا لمبة بايظة ولا حاجة وصلحوها وركبت الغطا بمساعدة اسطى من الورشة لاننى معرفتش اعمله لوحدى.ومشيت وبعد 4 ساعات قلت اروح اغسل العربية بعد البهدلة.
الاقى خبطة فى الشمال ورا وشفة الفانوس مكسورة وملزوقة والاكصدام داخل لجوة ومحكوك وحاولوا طبعا يداروه بالفوطة الزفرة وده عن طريقة مسح الاكصدام بفوطة زفرة ومع اول تراب فى الجو تلم التراب وكلوا ادارى وتمام يا زبون.
طبعا على كلام التوكيل بعد ما كلمتهم وبعد ما كلمت قسم الشكاوى انا اللى غلطان ياه يا ايمن انت وحش وكخة تروح تخبط العربية برة بعد 4 ساعات وتلزق الفانوس وترجع تتبلى علينا بعد ما خرجت من التوكيل وتقول احنا اللى خبطناها وداريناها وديه مش اخلاق التوكيل خالص.هو احنا ورشة فى الشارع ولا ايه يا باشا ده احنا توكيل محترم.
ارجوكوا بقى يا جماعة.احفظوا حقكوا وزى ما مهندسى الاستقبال بيستلموا العربية وبيسجلوا كل حكة وخبطة فيها يبقى احنا كمان لما نستلم العربية نفليها.
وتفلية يعنى :
تبصوا على الفوانيس كويس اوى.
عتب العربية.
لو عليها اى تراب تمسحوه وتركزوا وانتوا بتمسحوا من اى اعوجاج او اى خبطة متعرفوش عنها حاجة.
ده كله يتعمل قبل ما تطلع العربية من باب التوكيل.
ولو حد يا جماعة حصلتله مشكله مع التوكيل وحابب اضم شكوته معايا لهيونداى كوريا ياريت يبعتلى رقم ال Job وتاريخه وتفاصيل المشكله وانا هبعتها بامر الله.
حسبى الله ونعم الوكيل.
المفضلات