عملت حادثة جامدة و محتاج سمكري أمين و كويس

**amr1501** · 14-06-2011 11:14 AM

السلام عليكم ورحمة الله وبركاته

الحمد لله علي كل حال و إنا لله و إنا إليه راجعون

حصلتلي حادثة علي الطريق الدائري يوم الأحد إللي فات الطريق الدائري المتجة من كارفور المعادي للأوتوستوراد كان متوقف تماما و انا كنت واقف تماما مستني الطريق يتفتح

جت عربية تريله بمقطورة و طبعا معهوش فرامل و قام داخل في حوالي 6 او 7 عربيات و انا الحمد لله كنت عربية منهم و الحمد لله علي كل حال و اللهم لك الحمد إني طلعت منها سليم

فاللهم أجبرني في مصيبتي و أخلفني خيراً منها

المهم دي صور العربية و التلفيات إللي في العربية

===============================================
التلفيات تقريبا
الجنب اليمين كله -الكبوت-البربريز الأمامي - سربنتينه - رفارف - الربع الشمال - الصدر - تني في القايم اليمين - العتب و إللي انتوا شايفينه في الصور

محتاج سمكري أمين و محترف جداً عشان أصلح العربية فأتمني أنكوا تساعدوني في الموضوع ده و إللي ليه تجارب سابقة و صلح عربيته يفيدني بتجربته

وجزاكم الله خيراً

**m_marmoush** · 14-06-2011 11:20 AM

ربنا يعوض عليك و أهم حاجه إنك سليم و فداهيه العربيه والفلوس

**amr1501** · 14-06-2011 11:53 AM

الحمد لله علي كل حال

**amr1501** · 14-06-2011 01:49 PM

يا جماعة مفيش حد يقدر يفيدني في المشكلة دي ؟؟؟؟

**AHMED1718** · 14-06-2011 02:04 PM

ربنا يعوض عليك والحمد لله انك بخير

نصيحة

مفيش سمكرى ولا بوهيجي امين او صنايعى عمتن حتى لو كان اخوك الا قلة قليلة جداا اللى كلهم بيعتبرو نفسهم من القلة دى

طبعا مهما كان درجه المعرفة لازم المتابعة المستمرة اليومية

انا اتقرصت كتير من سمكرية ولسه اخر مرة ف عربية حمايا وانا اتصدرت وللاسف مفيش ولا زمة ولا ضمير

كسمكرة وبويا خلصت ف شهرين ونص الشغل زى الفل بس تيجي تبص بقا لكل الفبر اللى ف العربية متكسر وضايع ازاز متكسر وحاجة زفت
كلفونى تكاليف ملهاش زى ولسه بحاول اصلح اللى انا بقيت سبب فيه

نصيحة اتنين مهما قالك الصنايعي انه معهوش فلوس متدوش غير نص الفلوس المتفق عليها والباقى يوم متستلم عربيتك دايرة وواقفة مفيهاش حاجة

بالنسبة لعربيتك حاول تحسبها لو جيبت نص امامى من غير ماتور طبعا هتبقا التكلفة كام وقارن بسمكرة وتغيير اللى عندك
وربنا معاك

**midooz** · 14-06-2011 02:55 PM

بص يا باشا لو رحت عند ميدان الحرية في عين شمس و سألت على مختار السمكري .. ألف من يدلك عليه ... هوة محترف جداً جداً و أمين في شغله و حرَاق شويتين .. بس بيعمل الصح و صح الصح
أمًا تروحلوا قوله أنا من طرف الشيمي بتاع الجولف البيضا و إن شاء الله خير

**mussolini** · 14-06-2011 03:08 PM

السلام عليكم...

الف حمد الله على سلامتك,اهم شىء انك بخير...

اما بانسبة للسمكرى انا اتعاملت معاه شخصيا و الصراحة شغلة ممتاز بس كعادة كل السمكرية لازم تتابعة...

اسمة عيد , مكانة فى الحرفيين و رقمة: 0116240319

**heshamzaky** · 14-06-2011 03:17 PM

الف حمد الله على السلامة و ربنا يعوض عليك و معلش قدر الله و ما شاء فعل
بص فية سمكرى فى عين شمس أنا تعاملت معة قبل كدة عملت عندة شغلانة كدة بص ولد محترف أنت الشغل الى فى عربيتك محتاج واحد يكون بيعرف يشد زرجينة ممتاز علشان يستعدل الكلام دة
السمكرى دة عملى زرجينة و شوفتة و هو شغال بصراحة ممتاز و عندى صور لشكل الزرجينة الى عملها ممكن أوريهالك لو حبيت
هو كان شغال فى مركز لتصليح التيوتا و اليابانى عموما و فتح لنفسة الورشة