السلام عليكم ورحمة الله وبركاته،،،

لما كنت بادور على عربيه مستعمله عشان اشتريها الناس كانوا بيحذروني إني أشتري عربيه ملاكي أي حاجه غير القاهره والجيزه، ولما كنت بسال ليه كانوا بيقولولي إن في اﻷقاليم صنايعيه مهره جداً جداً ممكن تكون العربيه معجونه ومشيسه وهم يرجعوها زي اﻷول وأحسن كمان.

الناس حذروني بالذات من ملاكي الدقهليه، والناس قالولي كمان إن في ناس في المنصوره بالذات بيشتروا سيارات حوادث ويصلحوها ويبيعوها على إنها عربيه زي الفل وفابريكا جوه كمان.

أنا كمان سمعت إن في صنايعية دوكو في طنطا بيدهنوا العربيات من غير معجون، يعني زي دهان الفابريكا.

الله أعلم مدى صحة اﻷقاويل دية كلها، بس انا باصص للموضوع من زاويه تانيه إيجابيه إلى حد ما:

هي إن الواحد ممكن لما يحب يشد العربيه يروح يشدها في المنصوره مثلاً، ممكن تبقى أرخص وأكيد الشغل هايبقى أنظف؟

يا ترى الكلام ده منطقي ومجدي ولا ﻷ؟ ويا ترى تكلفة المواصلات من وإلى المنصوره مثلاً عشان أطمئن على العربيه مش هاتخلي الفرق في التكلفه مش كبير ولا إيه؟

أرجو الإفاده وخاصة من إخواني اللي ساكنين في اﻷقاليم.

شكراً