الموضوع: ما هذا """؟؟؟؟!!!!

انا متهيألى بيزودا عرض الكاوتش بالمنظر ده علشان يكسب ثبات للعربية وبيبقى ممسوح مفيهوش نقشة علشان يقلل الاحتكاك بالارض فلا يؤثر على السرعة والله اعلم

للأسف المشاركة اللي فاتت المعلومة اللي فيها غلط..
ومش عارف مين اللي عامل عليها +1 كده وخلاص !!

عرض الكاوتش بيبقا لزيادة الاحتكاك بالأرض
وانه يكون ممسوح كده ده عشان يزود مساحة السطح الملامس للأسفلت وبالتالي يكسب زيادة إضافية في الاحتكاك
واللي انت بتشوفه انه بيعمل BurnOut قبل ما يطلع ده عشان يحرق طبقة رقيقة من سطح الكاوتش
بينتج عن الاحتراق ده ان الطبقة الرقيقة دي بتسيح وتعمل طبقة شبه لزجة على سطح الكاوتش تزود مقاومة الاحتكاك وتخليه صعب يفرك

كل ده الهدف منه زيادة الـ Traction لامتصاص عزم الموتور وتحويله إلى طاقة حركية تؤدي لسرعة اندفاع السيارة بأقل قدر من الفرك في المكان..
وده كله لأن بالبلدي كده انت لما بتطلع أمريكاني بالعربية فالفركة دي بتخسرك ثانية أو ثانيتين وعلى العربيات اللي مواتيرها معدلة دي وعزمها رهيب ممكن العربية تقعد اكتر من 5 ثواني بتفرك في مكانها..
فالهدف من ده كله هو تفادي هذا الموقف لأن زي مانت عارف الأجزاء من الثانية بتفرق معاهم بين المكسب والخسارة


وأخيرا..
معلومة عامة
كلما زاد عرض الكاوتش وكلما زادت مساحة السطح الملامس للأسفلت:
1- زاد ثبات السيارة
2- تقل قابليتها للتزحلق
3- تقل قابليتها للفرك في المكان
4- تزيد قدرة الفرملة والوقوف في مسافة أقل
5- يزيد معدل استهلاك البنزين بشكل طفيف
6- يقل معدل التسارع بشكل طفيف
7- يقل الإحساس بخشونة الطريق والمطبات

لا هو فعلا نقطة الثبات صحيحة..
لكن انا ماتكلمتش عليها لأن مش هي الهدف الأساسا من الموضوع ده..

الكاوتشات دي استخدامها الأساسي بيكون للدراج ريس Drag Race
يعني بتحاول تعمل أحسن تسارع Acceleration مابين نقطتين في خط مستقيم
فانت محتاج الثبات في إيه ؟؟؟ مش محتاجه في حاجة طبعا..
وإنما هدفك الأساسي هو زيادة الاحتكاك Traction وده اللي انت بتلعب عليه عشان تكسب بيه وقت..

عزم الموتور القوي + الاحتكاك القوي هو اللي بيخلينا نشوف في بعض الأحيان عربيات بترفع حصان من قدام في طلعتها !!
قوة الاحتكاك نتج عنها تحويل كل طاقة العزم إلى طاقة حركية تدقع السيارة للأمام ولذلك بترفع بسبب التأثير العكسي لعزم الموتور
لو الاحنكاك قليل وأي كلام عمرها ما كانت ترفع كده.. كانت هاتفرك في الأرض بدل ما ترفع...

الأمر أشبه بالظبط لو عندك طيارة هيليكوبتر بالريموت مثلا..
امسك الطيارة وشغلها هاتلاقي المروحة بتلف..
طب لو مسكت من المروحة وشغلت ؟؟
حاجة من اتنين يا المروحة من قوتها تفوت في إيدك وتلف غصب عنك يا إما لو انت إيدك قوية أوي (Traction) يبقا هاتفضل ماسك المروحة كويس وهاتلاقي الطيارة هي اللي بدأت تلف حوالين محور المروحة

برضه ده اللي بيحصل لما يكون في تراكشن عالي والكاوتش ماسك في الأسفلت بقوة شديدة..
مع العزم المفاجيء أو الشديد هاتلاقي العربية تبتدي بتلف إجباري حوالين محور العجل

الكاوتش اللي صورته محطوطة فوق ده مالوش أي علاقة بالـ F1
الكاوتش ده مخصص فقط للدراج ريس والدراج ريس مالوش كاوتش غير ده

أما الفورميولا وان بيستخدموا فيه أنواع متعددة من الكاوتشات منها المنقوش ومنها المخطط ومنها اللي بدون نقشة شبه بتاع الدراج ريس
لكن خصائص كاوتش الفورميولا وان بتختلف تماما عن أي كاوتش مخصص للعربيات العادية ليتحمل السرعات الفائقة والحرارة المتزايدة باستمرار
أولا بيكون التراكشن بتاعه أعلى بكتير + الخامات بتاعته أنقى بكتير + عضم الكاوتش بيكون سميك أوي والمساحة المخصصة للخوا بتكون قليلة
كما أن معدل التآكل بتاع كاوتشات الفورميولا وان بيكون أعلى بكتير من معدلات الت’كل بتاعة الكاوتش العادي بسبب لزوجتها العالية وقدرتها الفائقة على التلامس والاحتكاك القوي بسطح الطريق..

بالنسبة لأنواع كاوتش الفورميولا وان فهي متعددة ومتنوعة
ولكن صدق أو لا تصدق.. النوع الممسوح أو اللي بدون نقشة ده هو أقل الأنواع من حيث الثبات والاتزان !!
ويعتبر هذا النوع من الكاوتش هو الأقل استخداماً في سباقات الفورميولا لأنه مخصص للاستخدام في الأجواء الجافة جدا بدرجات حرارة عالية ورطوبة منخفضة

الهدف الرئيسي من النقشات في الكاوتش هو إيجاد فراغ مناسب لامتصاص الحصى الصغير أو حبات الرمل والتراب إن وجدت لأنها تؤدي لانزلاق السيارة إذا تواجدت تحت السطح المخصص لملامسة الطريق..

وأيضا تجد في الإطارات خطوط طولية أو مائلة (حسب اختلاف النقشة) وهي مخصصة لامتصاص السوائل كمياه الأمطار وتمريرها من تلك الفتحات لنفس السبب السالف ذكره..