السلام عليكم.
إمبارح رحت فرعين توكيل كيا ( العامرية و سموحة ) و بجد حسيت بمدى اللاحترافية و عدم الخبرة و قلت لازم أشارككم برأيي و بكل أمانة :
أولا : أنا كنت مركب إنذار في التوكيل و كان بيهيس أحسن هياس و بيضرب في أي وقت و من غير سبب و ما يحلاش ليه الضرب غير الساعة 2 - 3 الصبح و الجيران إشتكوا
ثانيا : أنا عمري ما سيبت البنزين في العربية يقل عن الربع بس بالصدفة في مرة لاحظت إن لمبة البنزين مش بتنور لما بادور العربية فقلت أسيب العربية تفضى عن عمد و أشوف إذا مانت هتنور و بالفعل مكانتش شغالة
ثالثا : كنت جايب فوجات اصلية و عايز أركبها ,بالمناسبة جبتها من التوفيقية في بـ 275 جنيه و كان التوكيل عايز يبيعهالي بـ 650 جنيه
المهم توكلت على الله و عديت الأول على التوكيل في العامرية و كانت الساعة 1 ظهرا, مهندس الإستقبال قاللي دي حاجات كتير و مش هقدر اعملهملك كلهم و بالنسبة للفوجات طالما مش شاريهم من عندي مش هضمنلك أي مشكلة تحصل بسببهم ,قلتله طب إفرض اللي بيركبهم عمل غلطة و بوظ حاجة أشربها أنا سكت و معرفش يرد و قاللي ماشي و التركيب بـ 330 جنيه قلتله معطلكش و قلت أروح أشوف المشكلتين التانيين في توكيل سموحة و الفوجات هركبها بره طالما في كل الأحوال مفيش ضمان.
المهم توكلت على الله و رحت سموحة , مهندسة الإستقبال أنسة لطيفة كدة استقبلتني قلتلها على المشكلتين, بالنسبة للمبة البنزين أضحكوا بقى, قالتلي ممكن تكون نازلة من غير لمبة بنزين قلتلها نعم و مقدرتش أمسك نفسي من الضحك, المهم دخلت الإدارة و رجعت قالتلي لأ لازم يكون فيها - إستغربت جدا من إنها مش عارفة حاجة بسيطة زي دي - المهم خدوا العربية و بعد ساعتين نادوني في الصيانة و روني لمبة البنزين و هي شغالة و كله فل و قالولي كدة الإنذار إتصلح, قلتلهم الله ينور جربوه بقى يا جماعة و كانت المفاجئة و صلة ضرب مبرح لعربيتي و هي صابرة و مستحملة و لا قالت "أي" و لا كأن فيها إنذار راح الكهربائي منادي المهندس و قاله على القصة و قعدوا نص ساعة يقولوا نجرب و دي يقول ممكن و دية يقول طب جرب و كأنهم بيتعلموا في العربية و بعد ساعة قالولي إحنا ظبطنالك المشكلة و بقت الساعة 6 و قالولي طب تعالى بكرة من أول النهار نجربلك تاني قلتلهم شكرا و خدت بعضي و يا فكيك مع نية عميقة لا تتزعزع - حلوة لا تتزعزع دي ؟ - بغني مش معتبها تاني.
و روحت طالع على سموحة و كان واحد ابن حلال من اعضاء المنتدى قالي على كهربائي بيقف في الشارع قدام سعيد نصار إسمه متولي روحت طالع عليه صاحبنا شاف الفوجات قالي دي حاجة معتبرة تاخد كام يا عم قالي 80 جنيه قلتله لا كتير قاللي 70 قلتله توكل على الله كان معاه صنايعي تاني في نص ساعة زي القرود كانوا مظبطين العربية و كان في مشكلة في راديو العربية ظبطوها ع الماشي و كأنهم تخصص كيا بيكانتو الناس عارفة هي بتعمل إيه و بمنتهى الشطارة, و بعد ما خلصوا روحت دافع الـ 70 جنيه و 10 جنيه بقشيش كمان و لا الحوجة للمصرية
أسف للإطالة بس قلت اشارككم التجربة
المفضلات