الموضوع: استهلاك الكهرباء ؟

احسن حاجه انك تظبته على درجه حراه مثلا 25 علشان يقدر يفصل علشان يقلل استهلاك الكهرباء وفى نفس الوقت الجو يبق تمام بس بيستهلك قد ايه معرفش بالظبط وكنت بسال نفسى السؤال دا انبارح علشان من يومين شغلت التكييف حوالى 10 ساعات فى اليوم وربنا يستر

السلام عليكم

الحقيقه لازم نعرف شويه حاجات بسيطه كده عن جهاز مكيف الهواء ( بننطقها غلط تكييف الهواء ) المهم ندخل فى الموضوع :

اى جهاز حديث الصنع من الخمس سنوات السابقه نلاقيه بيحتوى على فى الريموت او لوحه التحكم بتاعته على :-

1/ رمز او زر مروحه فقط - وده فى الغالب محش بيستخدمه.
2/ رمز المود - وده اللى فيه بنختار احنا عاوزين نشغله مروحه او تبريد او دفايه او جاف ( dry ) او نوم ( sleep ) و هنا بيت القصيد-

يعنى الفترة اللى الحراره فيها تبقى مستلزمه نشغله نضبطه على الوضع التبريد ( cool ) و نضبط درجه الحراره على 24 لو محدش فى المكان اكثر من شخصين او نضبط على درجه 22 لو المكان به اكثر من 3 اشخاص و السبب اننا درجه حرارتنا فى الصيف بتبقى من 37 الى 39 يعنى لو شخصين جلسوا فى غرفه جنب بعض يبقى اكنهم بيشعوا حراره من 37 الى 39 * 2 .
- نضبط المروحه عند اول التشغيل على سرعه عاليه و نخلى موجهات الهواء للاعلى علشان نقلب الهواء الساخن اللى فى الغرفه بسرعه - زى ما بنعمل فى تكييف العربيه ) و بعدين نقلل درجه سرعه المروحه الى اقل درجه و طبعا الهوايات للاعلى لو الجهاز من النوع الشباك او الموجهات ( swing ) لو الجهاز من النوع السبليت.
علشان الهواء الساخن بيصعد لاعلى و البارد الى تحت .
ويا سلام لو المكان واسع و حطيت مروحه بوكس صغيره علشان تساعد فى تقليب الهواء - هيبقى ثلاجه ...

طب نيجى بقى لتوفير الاستهلاك :-

بعض اجراءات بسيطه لما بنقوم بيها بتوفر الاستهلاك زى :-

- لو هنشغل اكثر من جهاز فى وقت واححد يبقى بالتتابع - موش مره واحده علشان ميحصلش صدمه للعداد و يلف بسرعه جداا ( قراءه كاذبه ) و يعلى الاستهلاك.
- نتجنب الاماكن اللى فيها تسريب ( باب مفتوح - شباك موارب - مصدر تسخين او حراره ( مكواه - ثلاجه - غلايه مياه .او اى من مصادر مشعه للحراره )خصوصا اللمبات الفتيل ( التنجستين ) بلاعه استهلاك و بتخلى المكيف بيفصل متاخر و ده بيعلى الاستهلاك جدا - ممكن نغيرها باللمبات الموفره للطاقه و فى منا الابيض و الدافء ( لون لمبات الفتيل ) و علشان تعرف الوات بتاعه تضرب الرقم اللى عليها 15 وات مثلا * 5. = 75 وات .
- نجيب الاجهزه بتاعتنا من الانواع المضمونه و المشهود ليها بالكفاءه علشان بيبقى فى معظمها دوائر و دارات كهربيه لضبط ثبات التيار الكهربى الداخل للجهاز و بالتالى تحسين استهلاك الكهرباء-
اهم بند غايب علينا - و هو توصيلات الاجهزه وده موضوعه طويل بس الخصه كما يلى :
1- نختار سلك معتمد و اوعى تخلى الكهربائى يشتريه بنفسه - هات انت السلك بمعرفتك من مكان معتمد و مشهود ليه بالكفاءه و السعر
2- افضل الانواع بحكم خبرتى فى اعمال التشطيب و الديكورات الداخليه هو السويدى و السويدكس و فيه انواع جيده اخرى زى السمكتين / سيمون ....الخ بس الاضمن السويدى و سويدكس.
3- اوعى تعمل مفتاح فصل ( البيتشينو ) جنب المكيف ( معظم الكهربائيه بيركبوه علشان يزود المصنعيه - المفتاح تركيبه ب من 30 الى50 جم متوسط ) و الاصح الكابل يمشى من مكان تركيب الجهاز بزياده 50 سم مثلا الى مفتاح الاوتوماتيك اللى فى علبه الكهرباء الرئيسيه - علشان كتر القطع فى سلك التغذيه بيولد مقاومه تضعف قوه التيار و بالتالى الجهاز يستهلك كهرباء اعلى ناهيك عن مشاكل الصيانه المتعدده.
4- نراعى قطرسلك التغذيه من مكان تركيب الجهاز الى مكان تركيب مفتاح الاوتوماتيك باللوحه الرئيسيه .
يعنى لو جهاز 2.25 حصان شباك او سبلت و مكان تركيب اللوحه الرئيسيه من 15 متر يبقى قطر السلك 3 ملم و لو المسافه الى 20 م مثلا يبقى 4 ملم قطر السلك مناسب تماما. و هكذا لان القطر لما بيزيد و كمان المسافه بتتولد مقاومه و ضعف فى التغذيه.
5- بالنسبه للجهاز الشباك و احنا بنجهز الاعمال الكهربيه فى البدايه بنعمل مكان التغذيه على شكل بريزه قوى ( بعلبه ماجيك عاديه ) و الكابل اللى نازل من الجهاز بنركب عليه فيشه قوى معتمدة ( المانى - ايطالى - يليهم التركى ) و ده احسن فى عمليات الصيانه و خصوصا عند سحب الجهاز و غسله فى الحمام - الزملاء بالمنتدى المقيمين بالخليج هتلاقى النظام ده عندهم .
- الاهتمام بصيانه الفلاتر و دى سهله نعملها بنفسينا
- غلق البوابه الخارجيه للاجهزه الشباك علشان الهواء الخارجى ميدخلش و يخلى الكباس يشتغل مدد اكثر.
1- تنظيف الوحده الخارجيه ( السبليت ) بالمياه موش بضاغط الهواء - البلاور - كالتالى :-
2- نفك وش الوحده الخارجيه من الاعلى بمفك صليبه قصير ( حوالى 15 الى 20 مسمار ) نجد الوحده مقسمه الى 1/3 به الدواير الكهربيه و ده بنغطيها بكيس بلاستيك كويس جدا مع فصل التيار الكهربى طبعا و 2/3 الباقى عباره عن الكباس ووحده المبخر ( السربنتينه و امامها او خلفها المروحه ) و دى بيت القصيد عامله زى رادياتير العربيه لما بيتوسخ التبريد بيقل والاستهلاك يزيد وعلشان ننضفها خرطوم ميا محترم و نرش من فوق او الجنب علشان ريش وزعانف المبخر ماتتعوجش - طب ليه مبنستخدمش البلاور - علشان بيزعبب التراب على الللى حواليك و الجيران بتشتكى من الصوت و الغسيل اللى اتبهدل - مافيش اجمل من المياه - و لو الخرطوم صعب - يبقى رشاش الزرع اللى بالضغط بس الانواع الكبيره طبعا.


وكده باقى من اجراءات توفير الاستهلاك 2 زرار هما الاهم :-

1/ الدراى او الجاف ( dry )وده بنشغله لما الحر يكون شديد و محتاجين الجو البارد يبقى جاف تماما مع ملاحظه اننا لما بنشغل الخاصيه دى هنلاقى الجهاز بعد مايشتغل شويه يفصل ذاتيا خالص لما يوصل لدرجه البروده المطلوبه و يشتغل مثلا بعد 10 دقائق او 1/4 ساعه و ده بيقلل استهلاك الكهرباء لدرجه كبيره.
2/ زر سليب او النوم (sleep ) و الزر ده وظيفته لما نيجى ننام بليل نشغله عند درجه 23 مثلا وده بيعمل على تاخير تشغيل الكباس عن الفترات العاديه علشان منبردش و احنا نايمن خصوصا و احنا بنتقلب علشان المكان بتاع حضرتك دافى و لما تتقلب على جنب مختلف ممكن ناخد برد .

اخيرا ان تشغيل المؤقت ( timer ) التشغيل خصوصا بليل من 11 مساء الى السادسه صباحا يعمل على توفير للاستهلاك و بيخلى الغرفه بارده و تتجه للحراره بالتدريج علشان تخش تاخد حمام الصبح الدافى و بالتالى متبردش من صدمه جو الغرفه البارد الى الحمام الدافئ.



اسف طولت عليكم --

و انا فى خدمه اعضاء المنتدى لاى افكار بخصوص التركيبات الداخليه

دمتم بود