السياره للبيع .... هل اصبح عيب حاليا مع انه ميزه !!!!!!!!!!!!!!!

السلام عليكم


ايام زمان كنا بنلاقى على بعض العربيات معلقه ورقه السياره للبيع ومع تقدم الناس اصبح الكلام انجليزى ولكن بعد شويه كمان اصبح عيب ان الواحد يعلق ورقه على العربيه بيقول انها للبيع والبديل حاليا يا انا المواقع يا اما السوق



والسوق كله تجار والنت بقا اغلبه ناس فاضيه بتتكلم بهدف التهريج او وقت فاضر وبيتسلى او تجار واغلب الناس بتخاف تشترى من النت


الميزه فى الورقه انك بتعرف ان العربيه للبيع وفى نفس الوقت انك شايف العربيه على ارض الواقع من محتاج اى حد يقولك ظروفها ايه علشان انت شايفها على ارض الواقع


انتم رايكم ايه يا شباب هل البيع عن طريق تعليق ورقه على السياره اصبح عيب حاليا ولا بيجيب نتيجه ممتازه انتم ايه رايكم

أنا لما جيت أجيب عربيتي الأولى كنت بدور على النت و في الوسيط لكن لما ربنا قدر اشتريت عربية كانت معلقة ورقة للبيع

فى نظريه (مش مقتنع بيها) بتقول ان الى يعلق ورقه ده جاب اخره و مش عارف يبيعها ..
مش عارف يبيعها ليه ؟
اكيد فيها حاجه
ده تلاقيه عرضها على تجار و معارض و على النت و مش راضيه تتباع ..

اقتباس:

---

المشاركة الأصلية كتبت بواسطة khaled ayman

فى نظريه (مش مقتنع بيها) بتقول ان الى يعلق ورقه ده جاب اخره و مش عارف يبيعها ..
مش عارف يبيعها ليه ؟
اكيد فيها حاجه
ده تلاقيه عرضها على تجار و معارض و على النت و مش راضيه تتباع ..

---

متفق معاك جدا لان فى ناس كتير اوى مش فاضيه انها تنزل السوق او مش عايز يسيبها فى معرض عشان ما تتبهدلش او يطلعو بيها مشاوير من ورا صاحبها او اى حاجه تحصل فيها و يمكن عنده ظروف و مستعجل فى بيعها و بعدين اللى بيعلق ورقه ده يعنى من الاخر كده راجل جاد فى بيع العربيه مش نازل بقى يضيع وقته فى السوق و يا جاله زبون او ماجالوش او رايح يقعد يسمع اسعار و يمشى

انا شايف انه عادي واحد مش عاوز يوجع دماغه ويروح ويلف ويكتب فقال يعمل اعلان على عربيته على عربيته

أحيانا بتكون عربيات نضيفه..
صاحبها معندوش وقت يروح لمعرض أو حاجه..
و في نفس الوقت مش قادر يسيبها و يركنها عند المعرض.
مش عايز سمسره في الموضوع..
كده يعني..

والله انا برضوا وجهه نظرى زيكم يا شباب بس اغرب حاجه ان فى ناس بتقول انها حاجه تكسف ان الواحد يعلق ورقه على العربيه مع انى شايف انها حاجه عاديه جداااااااااااااا وكويسه كمان علشان انت بتشوف العربيه قدام عينك مباشره

انا شايف انها طريقة حلوة ولو عجبتك العربية توقفه وتعيانها وتخلص كمان انا شوفت بى ام نظيفة جدا كانت حاطة ورقه من دى عادى يعنى

اقتباس:

---

المشاركة الأصلية كتبت بواسطة eslam.elrefaey

انا شايف انها طريقة حلوة ولو عجبتك العربية توقفه وتعيانها وتخلص كمان انا شوفت بى ام نظيفة جدا كانت حاطة ورقه من دى عادى يعنى

---

انا قلت اخد رايكم يا شباب قبل ما اعمل كدا لتكون حاجه عيب وانا مش واخد بالى ولا حاجه

تعلق ورقة ع العربية ؟؟؟
ازاي تعمل كدة ؟؟؟
انت عاوز تضيع سمعة العيلة وتمرمغ تاريخها في التراب
لو عملت كدة العيلة كلها ح تتبرى منك
خالك شوكت
عمك سنجر
عمك كاظم
عمك ناظم
...
وش سراج منير وهو عامل تركي
...
بص يا باشا
انا عندي مبدأ
اللي مش عاجبه مايبصش .... طالما مش بتعمل حاجة غلط
بالتوفيق ان شاء الله

هيا فعلا طريقه عمليه يعني اللي بيشتري بيشوفها علطول ولا ميعاد ولا غيره

انا شايف ان الموضوع عادى وبإذن الله لما اجى ابيع عربيتى حاحط ورقة عليها وبرضو حانزل اعلان على النت