الموضوع يخص اي حد اتسرق في التوكيل
السلام عليكم
اولا احب اشكر اداره المنتدي علي تنظيم و متابعه المنتدي بشكل رائع
ثانيا
الموضوع ده يخص اي حد اتسرق في التوكيل او بمعني اخر اتسرق حاجه من عربيته في الصيانه
انا اسف اني هطول في الموضوع شويه بس انا حابب اقول كل التفاصيل
انا عربيتي نيو اكسنت 2010
و للأسف بروح اعمل صيانه في ابو رواش في غبور
و النهرده كانت صيانه 35000 حجزت و روحت زي اي حد ما بيروح
طبعا مش هاقدر اوصف الشباب اللي واقفين في الامن حاجه حلوه اوي تحس انهم عايزين يسألوك هما واقفين هنا بيعملوا ايه !
المهم ربنا كرمني و عديت من الامن و دخلت و كالمعتاد و المتعارف عليه جوه انك تفتش علي المهندس اللي هيستلم العربيه ( المهندس بيشوي)
الحمد لله ربنا اكرمني و لقيته و الراجل بصراحه كان قمه في الاحترام و الامانه لدرجه اني صدقت بجد اني هروح مبسوط النهرده !
المهم الراجل المحترم استلم العربيه و قالي لم حاجتك عشان زي ما كلنا عارفين انك بتمضي علي ورقه انك مسؤل عن اي حاجه تسيبها في العربيه (لزوم التظبيط)
الحمد لله ربنا كرمني و لميت كل حاجه ماعدا الدرج الصغير اللي تحت الكاسيت
الدرج كان فيه شويه فولس فضه و 2 فلاش ميموري و دبلتي
سيبت العربيه و انتظرت لحد ما تخلص
و جاء الخبر اليقين اني هروح مبسوط و هو ان العربيه خدت 3 ساعات و نص بس :Ta_clap[1]: تقريبا كده كنت قربت ازغرط و قولت لأ انا كده لما اخلف اول ولد لازم يبقي اسمه غبور !
جريت عشان استلم العربيه و دفعت و ظبت الدنيا و طبعا النظام الجديد بقي انك تفتش علي المهندس عشان تستلم منه العربيه .. و بعد فتره طويله من البحث و الانتظار و انا طاير من الفرحه وصلت الحمد لله للمهندس و سلمني العربيه
المهم استلمت العربيه و قعدت احط حاجتي فيها من تاني و انا ضحكتي جايبه وداني
دورت العربيه و قولت اشغل الكاسيت بدور علي الريموت قولت اه ده في الدرج خلاص يا سيدي افتح الدرج لم اكن ادري اني سينطبق علي اسطوره الصياد اللي فتح السمكه و ملاقاش الخاتم
فعلا مالقيتش الريموت في الدرج و وشي اتقلب و نزلت من العربيه ادور عليه
الحمد لله لقيته مرمي تحت الدوسات
طب ايه اللي جابه هنا !!! ده كان في الدرج , دورت في الدرج ملاقيتش الفلوس الفضه قولت يعني هتعمل مشكله علي 2 و لا 3 جنيه
ساعتها ابتدي وشي يتقلب و افتركت قاعده غبور الاساسيه في الصيانه وهي انك لازم تروح مغموم !
المهم وصلت للبوابه و اخدت وقت طويل جدا طبعا علي ما الشباب الواعي بتوع الامن فهموا اني خلصت صيانه و عايز اروح !!!!!!!!!
المهم روحت علي ما وصلت البيت و طلعت افتكرت ان كان فيه 2 فلاش ميموري بتوع الشغل و الدبله في الدرج
نزلت جري و انا بهدوم البيت ادور عليهم زي المجنون و انا بقول لنفسي لأ يا اخي ده اكيد ان شاء الله هتلاقيهم ده مش ممكن يعني هو انت يا ابني كنت في محطه مصر ! هتلاقيهم اكيد
و قد كان طبعا نزلت العربيه و قلبتها و لا لقيت 2 فلاش ميموري و لا الدبله , تخيل بقي انك تتسرق منك فلاشات فيها معلومات و شغل و فييين , في التوكيل بتاع العربيه اللي بتتشمبر فيه فلوس و كلنا عارفين
ساعتها طبعا وشي قلب تماما و تحولت الي انسان غير ادمي بالمره
اول حاجه فكرت فيها اتصلت علي رقم الشكاوي و انفجرت في وشهم
وصلنا في الاخر انو قالي هنسجل شكوه حظرتك و هيترد عليها في خلال 48 ساعه !
دريت طبعا و قولتله انا مش هستني انا رايح علي هناك و فعلا ركبت عربيتي و سايق زي المجنون و علي ابو رواش تاني
واحد كلمني و انا في الطريق من الشكاوي بيقولي حضرتك اتصلت و اشتكيت من كذا كذا قولتله اه قالي طيب !
قولتله طيب ايه ؟ قالي هيترد عليها في خلال 48 ساعه (تقريبا هيتصلوا بيا تاني يحلفوا انها هيترد عليها في خلال 48 ساعه ) قولتله انا مش هستني و انا رايح التوكيل قالي خلاص اوك اوصل و ادخل للمدير
المهم وصلت التوكيل و دخلت و قابلت المهندس ياسر مدير الاستقبال
و مش هقول اللي حصل عشان تقريبا المنتدي كله عارف الدنيا هناك ماشيه ازاي و اللي عايز يعرف يقرأ الموضوع بتاع ابو مارو هنا في المنتدي
الخلاص وقفت و اتكلمت معاه قالي انو في غايه الخجل !
قولتله طب ايه العمل ؟
قالي طب ثواني
قعد يلف و يروح و يجي و اختفي شويه و انا قاعد في مكاني في الاستقبال
شويه و جالي قالي انا في غايه الخجل !!!!!!
قولتله من الاخر انا عارف اني كده كده انتو بتمضوا العميل علي ورق انو مسؤل عن اي حاجه في العربيه
بس دي مش اي حاجه دي حاجه مش سهله كده تعدي
قالي انا دخلت و فتشت الورشه كلها (اقسم بالله العظيم 3 انا متأكد انو مامدش ايده و فتش حد)
جاب شويه عمال معاه في محاولات انو يقنعني انها وقعت !!!!!!!!!!!!!!!!!!!!!!!!!!!!!!!!!!!!!!!!
يعني نطت من الدرج و هو مقفول !!!!!!!!!!!!!!!!!!
طب الريموت كمان فتح الدرج و نط ؟؟؟؟؟؟؟؟؟؟؟؟؟؟؟؟؟؟؟؟؟؟؟
بلاش الفلوس الفضه دابت ؟؟؟؟؟؟؟؟؟؟؟؟؟؟
هو كان ناقص يقولي ما يمكن الفلاشات سرقت الفضه و هربت !
فضل يدور و قلب العربيه في محاولات انو يلاقي حاجه
و طبعا لم يجد شئ لانهم مع الحرامي !
اكيد كلكوا دلوقتي عارفين قالي ايه :D:D:D:D
مظبوووووووووووط قالي انو في غايه الخجل :D:D:D:D:D
طبعا دي مكانتش اول مره اتسرق هناك
دي تاني مره
اول مره في صيانه ال 5000 و جت في اريال العربيه
النهايه خرجت من هناك و انا في غايه الخجل انا كمان :D
كلمت بتوع الشكاوي و حكيتلهم المنظر و اللي حصل هناك
ردوا عليا الناس بأحترام و قالوا انهم مقدرين جدا المشكله و مانسيوش طبعا انهم يأكدوا علي ال 48 ساعه (سياسه الحفظ) و انهم حاجه من 2 يا هيجيبولي حاجتي يا هيبقي في كلام تاني
من بعد المكالمه دي قررت اني مش هسكت و لازم ارجع اللي اتسرق مني
قررت اني اكتب الموضوع ده عشان نعمل حصر للناس اللي اتسرقت خلال الصيانه في غبور و نبتدي ناخد خطوات ايجابيه شويه و مينفعش نسيب حقنا
اللي اتسرق و شايف انو مينفعش يسيب حقه ياريت لو يسيب كومنت ايه اللي اتسرق منه و امتي
انا مجهز حمله محترمه بس طبعا لازم نتفق كلنا عليها و مش هقولها الا لما اشوف الكومنتات