شئ مستفز جدا انك تستني واحد يعدي ومايعبركش
لو الشارع ضيق وماينفعش تعدوا مع بعض بيضطر واحد فينا يستني التاني وبعد ماتستني البيه يعدي ولا حتي يبصلك ولو بصلك مايهونش عليه حتي يرفع ايده كنوع من التحية او الشكر لأنك استنيتوه
نفس الشئ لو في تقاطع وانت استنيت حد بردو مايرفعش ايده حتي بالتحية
وكأنك من واجبك تنتظره او دة فرض عليك كأنه عربية التشريفة مش مثلا دة ذوق منك واخلاق
في البداية قولت يمكن عشان عربيتي اقدم من عربيته او ارخص من عربيته وهو ياعيني محدث نعمة راكب عربية غالية
ركبت عربية اخويا عربية ماشاء الله عليها فخمة وستايل بردو نفس البرود وقلة الذوق
غيرت عربيتي بعربية احدث واشيك وبردو نفس الموضوع
بجد حاجة تحرق الدم ولاحظت ان الي بيعمل كدة مش بس اصحاب السيارات الفارهة لا كمان العربيات الكنب بيعملوا كدة
علي عكس سائقي الاجرة لو استنيته يضربلك كلاكس ويرفع ايده ويقولك متشكرين يا برنس او ياذوق او ياباشا او يانجم
وياسلام لو عايز تعدي تقاطع لا يمكن حد يقفلك
ولو بتلف يو ترن U-Turn ممكن تبيت يومين لما الشارع يفضي وتلف
ليه السائق المصري ماعندوش ذوق وفن واخلاق
ليه بيتعلم بس السواقة (بنزين ودبرياج)
ليه بيسقط في امتحان الاشارات
ليه انعدم من عنده الصبر
ليه بيبص دائما لأصحاب السيارات القديمة علي انه مش بيفهم وانه اكمنه راكب عربية موديل السنة يبقي بيسوق احسن منه
ليه بيتعامل بقلة ذوق وبيفترض دائما ان الطريق حق مكفول ليه وحده فقط ومحدش ليه نفس الحق زيه
ليه مش بيهدي (بل بيدوس بنزين اكتر) وانت بتعدي الشارع علي رجلك ويطلع راسه من الشباك ويشتمك ولو مشغل التكيف تحس كأنه بيشتمك من غير ماتسمع شتيمتك
ليه ......
ليه ......
ليه ......
اتمني فيوم اشوف مصر الي كانت صاحبة الحضارة والامجاد ترجع تاني ليها التحضر وتبدأ تتعلمه من جديد
التحضر مش عربيات احدث موديل (سيراتو مثلا) ولا عمارات شاهقة الارتفاع
التحضر اننا نعامل بعض زي البني أدمين مش انا بس بني أدم وغيري ..............
التحضر ان تعامل الناس كما تحب ان يعاملوك
والله المستعان
،
،
المفضلات