عرض للطباعة
السلام عليكم ورحمه الله وبركاته
ازيكم يا شباب
أنا ادامي هوندا سيفيك موديل 88 وهوندا اكورد موديل 82 الاتنين فول اوبشن بس الاكورد اوتوماتيك
ايه اخبار العربيات دي لو حالتهم معقوله طبعا
يعني قطع الغيار والميكانيكيه وفهمهم ليهم والامورد دي
محتاج رأيكم ومشورتكم ضروري وبسرعه عشان اخد قرار
كان ياريت لو تقييم لسعرهم مبدأي
السيفيك علي 26000
والاكورد علي 22000
ايه الاخبار كده يا جماعه
وجزاكم الله خيرا
الهوندا السيفيك الـ 88 الجيل الرابع بتتميز بالشكل الكلاسيكى لهواة الشكل الكلاسيكى .
والماتور بتاعها فيه منه الـ 1500 وفيه منه الـ 1600 وفيه الكربراتير وفيه الانجيكشن وبتتراوح قدرته الحصانية ما بين 105 : 130 حصان حسب طريقة حقن الوقود .
ومواتيره متوفرة وقطع غيارها موجودة سواء كانت جديدة او استراد .
واكسسوارتها هيا اللى ممكن تكون عزيزة شويتين جديدة لاكن ممكن تلاقيها استراد بوفرة بس فى بورسعيد وبعض الاماكن فى الحرفيين .
والجيل الرابع مابيختلفشى فهم الميكانيكية ليه عن الجيل الخامس ... ميكانيكية الهوندا بيشتغلوا كويس من الجيل الرابع للسادس بدون مشاكل .
بالنسبة للسعر بصراحة معرفشى ... بس اعتقد ان السعر اللى انت بتقول عليه ده ممتاز ازى كانت العربية فابريقة ومش محتاجة لمصاريف اساسية .
لان من متابعتى لاسعار الجيل الرابع مشفتش عربية أقل من 30 الف الا وفيها مصاريف اساسية تعديها الـ 30 الف مستريح .
ده اللى اقدر اقولهولك كدة بسرعة ... وبالنسبة للأكورد 82 بصراحة مقدرشى افيدك انتظر ملاكها هنا هيفيدوك أكتر منى فيها .
وده لينك للجيل الرابع حاول تقرأه للافادة .
http://www.nilemotors.net/Nile/191861-a.html
وانت مغمض السيفيك
الاكورد حاجاتها قليلة وخصوصا اكسسواراتها واجزاء الصالون والفوانيس والكلام دة وقليلة جدا استيراد كقطع غيار عفشة والكلام دة ولو العربية بماتورها الاصلى حاجتة قليل جدا وغالية جدا
جزاكم الله خيرا والله علي سرعه الرد والاهتمام
بالمناسبه الاكورد موديل 84 مش 82
انا وانا بدور علي النت الومنتديات لقيت الموضوع ده.....كللهم أجمعوا ان الاكورد احسن واحلي واقوي...وقطع غيارها موجوده
وانتو بتقولوا العكس....انا احترت جدا
ده اللنك للافاده...ولو ممنوع ممكن المشرف يشيله انا مش عارف مسموع بوضع لنكات وللا لا....بس انا قصدي الافاده
http://www............com/vb/showthr...t=22486&page=7
عموما هو انت ماينفعش تحت لينكات لمنتديات تانية عشان تبقى عارف لكن لو فيديو من يوتيوب او مقالة من ويكبيديا مافيش مانع
بس عموما اللى احنا بنقولهولك هو الصح
طيب انا آسف جدا لوضع اللنك...للاسف مفيش امكانيه التعديل....بتأسف للاداره
عموما انا رايح بكره ان شاء الله تعالي اشوف الاكورد...وممكن اشوف السيفيك بردو لو قدرت لاني حا اضطر اسافر لها عشان اشوفها
طيب بالنسبه للاسعار حضرتك شايف ان اسعارهم مناسبه وللا غاليه وللا لقطه
ومتشكر ليكم جداا
لو السيفيك فول اوبشن ( 4 زجاج كهرباء - سنتر- تكييف- باور ) يبقى تمام اوى 26 الف ولقطة فعلا طبعا بالاضافة للحالة الجيدة جدا على الاقل , اما لو الفاضية يبقى 26 الف دية لازم تبقى حالتها ممتازة
بالنسبة للاكورد سعرها ينزل الفين لان اكيد هتلاقيى فيها حاجات
هو بالنسبه للسيفيك انا لسه مكلمه دلوقتي هي فول اوبشن فعلا بس قلقت من حاجه....العربيه توكيل وبقالها معاه شهر
وهو مش تاجر المفروض
قلقان يحسن يكون لقي فيها حاجه وعايز يخلص منها ...هي رشه دواخل شنطه والتكييف عطلان وباقي الاوبشن تمام...ومانوال
بالنسبه للاكورد فول اوبشن بردو وأوتوماتيك ومعمولها عامره من شهرين ورشه نضافه بره بس وجوه لا... والراجل بيقوللي ما فيهاش غير الاتنين كوبلن الاودام عايزين بس يتغيروا ....غير كده العربيه علي كلامه زي الفل وتكييفها تمام و4 ازاز وفتحه سقف شغالين كهربه
وبجد بجد انا والله متشكر جدا لذوقك ومتابعتك معايا......وياريت بردو لو في حد من الشباب اصحاب الخبره يقولولنا رأيهم لأني رايح بكره اشوف....ومش عايز البس....دي اول عربيه ليا وانا داخل علي جواز.....ومش طالبه بهدله :)
طبعا ربنا يوفقك فى البداية للى فيه خير ليك
والعربيتين حلوين طبعا بس الاختيار بيتوقف على الاولويات
السيفيك طبعا ممتازة وقطع غيارها متوفرة واسعارها كويسة
والاكورد اكيد برضه ممتازة بس مشكلتها زى ماسمسم قال ان قطع غيارها مش متوفرة بنفس درجة السيفيك واسعارها اغلى شوية لكن ممكن تسال عنها فى الحرفيين وبورسعيد
وزى ماقولت ان السيفيك مانيوال والاكورد اوتوماتيك والاتنين فول اوبشنز اعتقد فى راييى الحالة اكبر دليل يحدد الاختيار وان شاء الله ربنا يوفقك فى اختيار الانسب والافضل ليك وربنا يوفقك فى مشوارك باذن الله شوف الاتنين وقيم حالتهم كويس وياريت يبقى معاك ميكانيكى لو قدرت وان شاء الله خير
بس عشان نكون واضحين اكيد الاكورد احسن من السيفك وده كلام عالمي وشركة هوندا مرتباها كده اكورد سيفك سيتي
بس نرجع نتكلم عن السوق المصري
لو ملكش سكة في قطع الغيار وطولة بال خليك في السيفك
الف الف شكر ليكم يا شباب الخير
انا تقريبا لغيت فكره الاكورد خلاص لان كميه الناس اللي بتحذرني منها كتير بسبب قطع الغيار طبعا....لكن كعربيه واضح انها محترمه....بالنسبه للسيفيك تقريبا العربيه دي فيها حاجه
لان سعرها غريب فعلا علي تحفه زي دي ومكملتش شهر مع صاحبها وعايز يبيعها ......تقريبا انا مضطر اصبر شويه كمان لغايه ما ربنا يكرمني ويوفقني في عربيه كويسه سواء هوندا أو غيرها
وبجد يا شباب متشكر ليكم جدا وجزاكم الله كل خير وجعل الله نصائحكم الغاليه في ميزان حسناتكم ان شاء الله علي
الاكورد ال 82 عربيه فى منتهى الجمال و موتورها 1600 و بسم الله ماشاء الله قوى مع العربيه
زماااااان من حوالى 8 سنين كده كان عندنا اكورد 82 الهاتش باك كانت عربيه تحفه فى كل حاجه و مصرفتش عليها جنيه صيانه غير الزيت وز الفلاتر و الكلام الاساسى بس
بس طبعا السيفيك سوقها احسن و اسرع و قطع غيارها متوافره و موجوده بسهوله
ممكن لو السيوله الماديه تسمح شويه ممكن تعلى و تجيب سيفيك 90 برضو كانت عربيه ممتازه
متشكر جدا يا استاذ عمر علي الافاده....وأنا صرفت نظر فعلا عن الاكورد بسبب موضوع الصيانه وقطع الغيار ولسه بدور ....وربنا يوفق ان شاء الله....وجزاكم الله خيرا علي النصح والافاده