الزمان : اليوم الساعه 4.15 الرابعه والربع عصراً
المكان :صلاح سالم تقاطع مجرى العيون
السيارة : 127 بتاعه زوجتى
الطريق : زحمه بس ماشى على الهادى
الشهود : مش اقل من 1000 نعم الف مواطن مصرى بكل اعمارهم وطوائفهم
انا : طولى 179 سم مليان فى الاربعينات ملتحى
ومعايا صاعق فى العربيه وسلاح.
...يعنى مش فى الصحراوى ولا فى الفجر ومش مرسيدس ولا بى ام ولا سيراتو ومش روش ولا فافى ولا هفأ
... داخل على مجرى العيون ولقيت فسبا وعليها اتنين بيكسر عليا والراكب ورا نط والسواق راح راميها على الارض قدامى يعنى منعنى من الحركه نهائى وسب دين وشتيمه وانت خبطنى
نزلت
طبعا عيل وشه متشرح وايده متخيطه
قولت له عيب يا ابنى
لو انا خبطك تعالى اصلحهالك ...
قالى لاء عاوز 300 جنيه
ليه يابنى
هو كده لاعورك وراح مطلع كذلك مصدى
يا بنى معيش 300 وانا هعملها لك
لا ء
لقيت الى معاه بيقلب العربيه
بتعمل ايه يا ابنى
هوب لقيت الزجاج الجانبى عندى بيسقط واحد ورا التانى والزجاج الامامى تحمل الضربات
وادى الفلوس لبتاع الازاز احسن!
وهوب نطوا على الفسبا وجريوا
الفسبا بدون نمر
طبعا انا بلمت مش عارف افكر
اجرى وراهم !
اخبطه بالعربيه!
اضربه!
على فكرة الحمد لله انا اقدر عليه بس الصدمه
ولو استعملت سلاح ؟؟؟؟
عربيتى عليها نمر
وهو مجهول
ولو قتلته هشيل ذنبه علشان ازاز عربيه بـ100جنيه
او قتلنى هكون شهيد علشان ازاز عربيه بـ100جنيه
والناس الى اتفرج ومشى
والى سب للثورة
بس محدش اقترب لمسافه 5 متر
ياترى حد هايشهد معايا
ولا هبقى قتلت شاب يعول اسرة
وهو امل مصر
وقعد فى التحرير 17 يوم علشان حريتنا
لقيت مقدم جيش كان جنبى قولتله منور يا باشا
قالى هو فى ايه
قولت له ابدا انا غلط واتربيت
ومشيت
بس
حسيى الله ونعم الوكيل
فوضت امرى الى الله
فيه
وفى الشرطه المستخبيه
وفى الجيش الى سايبنا كده وبيتفرج