مشكلة واتدخلت فييها وعايز النصيحة منكم

اولا أنا هاحكي الاحداث بالترتيب عشان ماحدش يتوه مني
واحد صاحبي من أكتر من 10 سنين شغال في شركة بتاعت اقمشة وجرت العادة إنه يعمل شغل لنفسه بما إنه ليه في صناعة الملابس قابل مايشتغل في الال شركة دي
المهم هو بدأ يورد ملابس يونيفورم ل معظم الفنادق وكده
لحد أما جت قدامه شركة سياحة عايزة 1000 طقم سرير ل فندقها بشرم الشيخ
فـدخَل مع واحد صاحبه في العملية دي عشان المبلغ كان كبير عليه
الحمد لله ربنا كرامه وادم عرض السعر وال شروط
الشركة وافقت بس بدون شرط المقدم ... صاحبي وشريكه وافقوا
وردوا البضاعة في شهر اتناشر اللي فات وال فترة تم استلمها في الشركة بتاريخ 20/12 ومن ساعتها وهم مخدش أي حاجة من فلوسهم اللي كان مجموعها في الفاتورة 63000 جندي
جت الثورة بعد كده وال سياحة اتضربت وشكرا كده مفيش فلوس
المهم راحواا قاللهم طب احنا مش معقولة هاندفعلكم الضريبة ؟ ادونا الضريبة على الأقل ... قاموا صارفينلهم شيك ب 5000 جنيه و الكلام ده كان من 4 شهر كده
وصاحبي عمال يحكيلي كل شوية إنه بيروح ومفيش فايدة
صاحبي كَتب كتابه من شهرين كده وأعد زعلان إن فلوسه مش عارف ياخدها
فـاقتراح عليَّ إني أدخل في الموضوع بصفتي مدير التوريدات واخلصله الموضوع
رحت معاهم قابلت الاخ مدير الحسابات المسئول هناك
ولقيته معندوش كلمة غير السياحة واقفة والصبر علينا شوية .. المهم رزلت معاه عشان ده مش زمبنا ... واحنا المفروض كنا ناخد فلوسنا من 20/1/2011 وكده المهم بعد نص ساعة من الكلام اللي ملوش لازمة قال لي تعالا خد شيك يو الخمس 9/6/2011 رحت طبعا في اليوم ده لقيت مفيش أي حاجة من دي حصلت ولا خط شيك ولا نيلة وقال لي كلام مايخشيش عقل عيل صغير .. أصل الشيك متمضاش مع العلم إني كنت عنده يوم الحد 5/6/2011 يعني خمس تيام وبرده متمضاش
طب وإيه الحال دلوقتي قال لي الصبر شوية
قلتله أنا هاجي السبت - قال لي السبت قافلين - قلتله بسيطة آجي الحد
قال لي انشاء الله تيجي تلاقيه مامضي.
رحت بقى يوم الحد 12/6/2011 وبعد انتظار أكتر من ساعة ونص كالعادة طلعلي وبيقولي لسة واللهِ قلتله
لو حضرتك مش قادر تحليلي مشكلتي هاتلي صاحب الشركة اتفهم معاه
قال لي خلاص استنا هنا لما اقوله
أنا كنت داخل الشركة اليوم ده الساعة 12.30 بالضبط وخرجت منها 4.30 بالتمام
استنيت لقيت واحد من الإدارة القانونية جاي بيقولي مستر أشرف عارف بالمشكلة وعايز حضرتك تصبر شوية
مقتنعتش طبعا ورفضت الكلام ده وقلتله لا أنا لازم اقابله
المهم دخَل وطلع بنفس الرد بعد ساعة كده
وأنا فضلت ماسك برأي إني لازم اقابله فـدخَل وطلع بنفس الرد
ساعتهها بقى اتنرفزت وقلتله أنا مش ماشي إلى لما قابله
واعادة لحد ماشفت واحد واخد في إيده باب الرسبشن وبيبصلي قوي كده وخرج
سالي البنت بتاعت الرسبشن
قالتلي آه هو ده مستر أشرف
قمت طالع جاري وراه ومنادي عليه وبصراحة عشان كنت متنرفز هزاتو بالذوق
وفي ال أول عمل مش عرفني
إنت مين وكده
قلتله أنا اللي حضرتك رفض تقابله
المهم خلصت الكلام الراجل قال لي إنه هيدفع بس أصبر عليه شوية
ومختش منه كلام واضح
بس المصيبة الكبيرة بقى إني وانا أعد في الرسبشن لقيت واحد بياخد شيك (يوم الخمس 9/6/2011) وكان ب 37000 وكسر ولما عرفت كده يومها زعقت في وش مدير الحسابات
أما يوم الحد فلقيت ناس كتير جاية ليها فلوس وكده
600000 ل تاجر خضار وفاكهة
200000 مش عارف لمين كده
33000 لواحد كان أعد معانا في الرسبشن
يانهار أبيض
الراجل طلع مدين لشوشته وشكله مش هيدفع إلا لما السياحة تقوم تاني .
أعمل إيه أنا بقى
مع العلم إن الشركة كتبت ورقة لنا ولغيرنا باجمالي المستحقات اللي عليها لينا
ومختومة طبعا
وصاحب الشركة ده ليه مازرعتين نعام في طارق اسكندرية الصحراوي
وفندقين في شرم
انصحني أعمل أنا إيه بقى في المشكلة دي

تحليلي للموضوع من خلال ما ذكرته, ان صاحب الشركه لم يدفع مقدم طب ليه؟؟؟؟ ده شيء غريب , المفروض يدفع مقدم قبل التوريد و يبقي في شرط جزائي طب ده ليه ما حصلش حتي لو الصفقه صغيره ؟؟؟ يبقي كده هو مأمن نفسه و كتبلك حاجه زي ايصال , والله الموضوع يخضع لتقديرك لهذا الرجل , بمعني انك تحاول تسأل عنه و تعرف دي طبيعته في المماطله و تأخير مستحقات الغير , و يفاصلهم , و لا الظروف و نقص السيوله علي الكل هو المشكله و بمجرد توفرها هيسدد , لو طلع من النوع اللي بيماطل يبقي لا تتردد في اتخاذ اجراء قانوني و تحاول تجمع عدد معاك ممن لهم حقوق عنده , اما لو طلع من النوع المحترم ممن تنطبق عليهم مقوله ارحموا عزيز قوم ذل يبقي برضه الخيار ليك لو صبرت عليه ممكن تكسبه زبون دائم ليك ده طبعا لو هو راجل و بيوزن المواقف , او تتخذ ضده اجراء قانوني كضمان لحقك , و لكني في رأيي ان النوع المحترم اصبح نادر الوجود لحد الانقراض في السوق المصري اللي اغلب طبيعته قائمه علي العشوائيه و النصب و السرقه .

اقتباس:

---

المشاركة الأصلية كتبت بواسطة زهير فكري

تحليلي للموضوع من خلال ما ذكرته, ان صاحب الشركه لم يدفع مقدم طب ليه؟؟؟؟ ده شيء غريب , المفروض يدفع مقدم قبل التوريد و يبقي في شرط جزائي طب ده ليه ما حصلش حتي لو الصفقه صغيره ؟؟؟ يبقي كده هو مأمن نفسه و كتبلك حاجه زي ايصال , والله الموضوع يخضع لتقديرك لهذا الرجل , بمعني انك تحاول تسأل عنه و تعرف دي طبيعته في المماطله و تأخير مستحقات الغير , و يفاصلهم , و لا الظروف و نقص السيوله علي الكل هو المشكله و بمجرد توفرها هيسدد , لو طلع من النوع اللي بيماطل يبقي لا تتردد في اتخاذ اجراء قانوني و تحاول تجمع عدد معاك ممن لهم حقوق عنده , اما لو طلع من النوع المحترم ممن تنطبق عليهم مقوله ارحموا عزيز قوم ذل يبقي برضه الخيار ليك لو صبرت عليه ممكن تكسبه زبون دائم ليك ده طبعا لو هو راجل و بيوزن المواقف , او تتخذ ضده اجراء قانوني كضمان لحقك , و لكني في رأيي ان النوع المحترم اصبح نادر الوجود لحد الانقراض في السوق المصري اللي اغلب طبيعته قائمه علي العشوائيه و النصب و السرقه .

---

هو لو محترم كان قابله من اول مره مش هرب منه وسابه ومشى

وبعدين لو هو محترم برضه كان اداله جزء من المبلغ طالما هو عمال يوزع فى الفلوس على المديونيات

لكن واضح عشان الناس دى اتساهلت فى حقها من الاول ووافقت على الشرط بتاع عدم دفع المقدم فهو استهيفهم (مع الاعتزار بس دى الحقيقه )

طبعااااااا حخليك وراه وحاول توصله انك لو مخدتش حقك حتلجأ للنيابه

انت ملكش ذنب والسياحه من زمان معروفه انها زى البورصه يوم فووووووووق ويوم فى االارض ومن كلامك ده شكله واحد معاه فلوس مش فقير ولا عليه مديونيات

بس الناس دى بتحب تلبس طاقيه ده لده ومطلعش مليم من السيوله اللى معاها

والله انا اعرف ناس بتكسب من تأخير الديون (اعرف الناس دى شخصيا مش اتحكالى )

انت راجل اديت للشخص ده شغل بمبلغ 100000 جنيه والشغل اتباع وطلع المفروض تاخد منه فلوسك بعد يوم او يومين هو يقولك لا فلوسك حتاخدها اخر الاسبوع
ال 100000 دول فى الاسبوع بيشغلهم اما فى البورصه او العمله او يشغلهم فى تجاره سريعه او اضعف الايمان يحطهم فى رصيده فى البنك فى حساب يوم بيوم
شوف المكسب بتاع المبلغ ده كام بقى وهو مدفعش مليم وكسب من فلوس مش فلوسه فى الاسبوع ده
وبعد نهايه الاسبوع يديك 50000 ويقولك الباقى كمان يومين وادينى شغل جديد عشان محتاج شغل وهكذا العجله دايره

عشان كده هو لو معاه فلوس مش حيطلعها بالساهل فى الايام دى

هو السوق ماشى كده مع العلم ان دى فلوس حرام طبعا عشان كده ربنا بيديهم على اد نيتهم

نصيحه متصبرش اكتر من كدا وارفع مامعاك من ورق وخد حقك علشان اللي يماطل 5 شهور هياطل سنه واتنين وتلاته

شكرا للسادة الاعضاء
بس أنا شفت ناس واخدة فلوس وناس ليها فلوس هناك. فـمش قادر أحكم عليه بصراحة
اللي مضايقني إنه لو كان نيته نصب وكده وشوية تلاكيك عشان مايدفعش فـأنا موقفي القانوني مش حلو متهيألي عشان كل اللي معايا ورقة بال مستحقاتي المالية
زاد امر التوريد زاد امر التسليم زاد صورة من الفاتورة موقعه بالاستلام
أعتقد إن كل دول مالهمش لازمة عشان دي مش اوراق مالية زي الشيك والكمبيالة وإيصالات الامانة .

أنا انشاء الله هرُوح يوم الحد - ادعولي بقى
على فكرة أنا مسجل نمرة واحد ليه عندهم 600000 ودايخ عليهم من شهر 5/2010
وهو طمّني بصراحة وقال لي إنه شغال معاه من 11 سنة ودي أول مرة تحصل معاه

على فكرة أنا كمان بسجل صووت أول أما أدخل الشركة . فـمسجل المقابلة كلهها عشان اسمعهها ل صاحبي عشان يقولي لو أنا اتصرفت غلط ولا حاجة بدل ما أحكي كل اللي حصل
إيه رايكم

متنسوش تدعولي بقى

اقتباس:

---

المشاركة الأصلية كتبت بواسطة moatazbunny

متنسوش تدعولي بقى

---

شكل كده في حد دعا عليَّ :crying2:
وانا رايح وفوق كبري أكتوبر العجلة اللي ورا طرقعت
نزلت فكتها ولقيتها متنفعش ببصلة
رت مركبها ونزلت بيها من على الكوبري عشان الزحمة وراكنة ونزلت فكتها تاني وخطها في تاكسي ورحت أشتري واحدة جديدة :untitled 1: ولما رحت قلت اغير الاربعة كلهم أحسن عشان كله بايظ
فأصالة الباشا قلتله عندكم visa قال لي آه قلتله خلاص هادفع تمن العجلة دي واخدها هي وال صبي وأروح اركبها وآجي اغير الاربعة كلهم وأملاهم نيتروجن بالمرة
بالفعل خط العجلة ورحت ركبتها ورجعت تاني للراجل ودفعت بالفيزا عشان ماكانش معايا يكفي وظبطه هم التظبييييط
الفردة goodyear ب 300 بالترصيص.وال تركيب و خمسة جنيه الفردة نيتروجن (الخمسة عجلات ب 20 جنيه)بس إيه بقى أنا بقيت راكب عربية تانية خالص ...

اشتغل علي محورين
1-افضل زن عليهم واقعد لهم واسالهم حتي لو يكتبوا شيكات لضمان الحق
2-اعمل بلاغ ومحضر بالورق والعقد
وربنا يوفق وان شاء الله خير